Skulim Ol Pikinini Bilong Yu

Ol Man Husat i Bin Raitim Ol Stori Bilong Jisas

YU SAVE amamas long ritim ol stori bilong Jisas wantaim ol arapela?​—a Sampela man i kirap nogut long save olsem Jisas yet i no bin raitim wanpela tok insait long Baibel. Tasol 8-pela man husat i bin raitim Baibel, ol i stori planti long Jisas. Olgeta i bin stap long taim Jisas i stap long graun, na ol i tokim yumi long ol samting em i bin skulim ol man long en. Yu inap kolim nem bilong ol dispela 8-pela man?​— Em Matyu, Mak, Luk, na Jon. Ol narapela 4-pela em Pita, Jems, Jut, na Pol. Yu gat wanem save long ol dispela man bilong raitim Baibel?​—

Pastaim yumi ken stori long 3-pela man bilong raitim Baibel em ol i bin insait long 12-pela aposel bilong Jisas. Yu save long nem bilong ol?​— Em Pita, Jon, na Matyu. Pita i bin raitim 2-pela pas long ol wanbilip Kristen. Em i tokim ol long ol samting em Jisas i bin mekim na ol tok em i bin mekim, em ol samting Pita yet i save long en. Opim Baibel i go long 2 Pita 1:​16-18, na ritim stori Pita i kamapim long ol samting em i harim taim God Jehova long heven i toktok i kam daun long Jisas.​—Matyu 17:5.

Aposel Jon i bin raitim 5-pela buk bilong Baibel. Taim Jisas i mekim laspela kaikai wantaim ol disaipel bilong em, Jon i bin sindaun klostu long em. Na tu, Jon i stap wantaim Jisas taim em i dai. (Jon 13:​23-26; 19:26) Jon i bin raitim wanpela bilong ol 4-pela Gutnius bilong Baibel, em ol i stori long i stap na wok bilong Jisas. Na tu, em i bin raitim ol tok bilong Buk Kamapim Tok Hait, em ol tok hait Jisas i bin givim long em, na 3-pela pas long Baibel em ol i kolim Jon. (KTH 1:1) Namba tri man husat i bin raitim Baibel na em i kamap aposel bilong Jisas, em Matyu. Bipo em i wanpela man bilong kisim takis.

Tupela narapela man bilong raitim Baibel i bin save gut long Jisas. Em tupela yangpela brata bilong Jisas, na ol i pikinini bilong Josep na Maria. (Matyu 13:55) Taim Jisas i kirap mekim wok bilong autim gutnius, ol i no bin kamap disaipel bilong em. Ol i kisim tingting olsem em i longlong liklik, long wanem, em i wok strong tru long autim tok. (Mak 3:21) Husat dispela tupela brata?​— Wanpela em Jems. Em i bin raitim Buk Jems bilong Baibel. Narapela em Judas, em ol i save kolim em Jut. Em i bin raitim Buk Jut bilong Baibel.​—Jut 1.

Tupela arapela husat i bin raitim laip stori bilong Jisas em Mak na Luk. Mama bilong Mak em Maria, em i gat wanpela bikpela haus long Jerusalem na ol Kristen bilong pastaim i save bung long en, na aposel Pita tu i save bung wantaim ol. (Aposel 12:​11, 12) Sampela yia paslain long dispela, long nait Jisas i bin mekim laspela Pasova wantaim ol aposel bilong em, ating Mak i bin bihainim ol taim ol i go long gaden Getsemani. Taim ol i arestim Jisas, ol soldia i traim long holim Mak, tasol em i ranawe lusim laplap bilong em.​—Mak 14:​51, 52.

Luk i bin skul gut na kamap wanpela dokta, na ating em i kamap wanpela disaipel bihain long taim Jisas i dai. Em i bin stadi na skelim gut ol samting i bin painim Jisas, na em i raitim klia na stret ol dispela stori. Bihain, Luk i poroman na raun wantaim aposel Pol, na tu, em i raitim Buk Aposel bilong Baibel.​—Luk 1:​1-3; Aposel 1:1.

Pol em i namba 8 man long raitim stori bilong Jisas. Em i bin kisim skul aninit long wanpela tisa bilong Lo i gat nem, em Gamaliel. Pol i bin kamap bikpela wantaim ol Farisi na em i kisim skul long ol tu. Bipo, ol i kolim nem bilong em Sol. Em bin heitim tru ol disaipel bilong Jisas na em i insait long pasin bilong kilim ol i dai. (Aposel 7:58–8:3; 22:​1-5; 26:​4, 5) Yu save olsem wanem Pol i kisim save long Jisas?​—

Taim Pol i wok long i go long Damaskus long holimpas ol disaipel bilong Jisas, wantu tasol wanpela strongpela lait i kam daun long heven na i mekim em i aipas. Em i harim wanpela nek i singaut olsem: “Sol, Sol, bilong wanem yu wok long bagarapim mi?” Em Jisas tasol i toktok! Em i tokim Pol long i go long Damaskus. Nau Jisas i tokim disaipel bilong em Ananaias long toktok wantaim Pol, na bihain Pol i kamap wanpela disaipel bilong Jisas. (Aposel 9:​1-18) Pol i bin raitim 14 buk bilong Baibel, kirap long Buk Rom na i go inap long Buk Hibru.

Olsem wanem? Yu kirap pinis long ritim ol dispela buk bilong Baibel o yu bin askim wanpela long ritim long yu?​— Wanpela gutpela samting tru yu inap mekim long laip bilong yu, em long kirap nau taim yu yangpela yet long kisim save long ol stori bilong Jisas long Baibel.

[Futnot]

OL ASKIM:

▪ Wanem ol aposel bilong Jisas i bin raitim Baibel?

▪ Husat dispela tupela brata bilong Jisas em ol i bin raitim Baibel?

▪ Bilong wanem Mak i save long Jisas? Bilong wanem Luk i no bin save long Jisas?

▪ Olsem wanem Pol i bin kamap wanpela disaipel bilong Jisas?

[Ol Piksa long pes 25]

Jut

Mak

Pita

Matyu

Pol

Jems

Luk

Jon