Skulim Ol Pikinini Bilong Yu

Mak i No Givap

MAK i raitim wanpela bilong ol 4-pela buk bilong Baibel i stori long laip bilong Jisas. Dispela buk i sotpela long ol arapela na i no hatwok long ritim. Mak em i husat? Yu ting em i save long Jisas?​​—a Orait nau yumi ken stori long sampela bikpela traim i painim Mak na kisim save long as na Mak i no lusim wok Kristen.

Namba wan taim Baibel i kolim nem bilong Mak, em bihain long taim King Herot Agripa i putim aposel Pita long kalabus. Wanpela nait, wanpela ensel i kisim bek Pita long kalabus, na kwiktaim em i go long haus bilong mama bilong Mak, em Maria, long Jerusalem. Dispela samting i bin kamap 10-pela yia bihain long ol i kilim Jisas i dai long Pasova 33 C.E.​​—Aposel 12:​1-5, 11-​17.

Yu save bilong wanem Pita i go long haus bilong Maria?​​—Ating em i save long sampela bilong famili bilong em, na em i save ol disaipel bilong Jisas i mekim ol miting long haus bilong em. Kandere bilong Mak, Barnabas, i bin stap disaipel longpela taim liklik, olsem kirap long taim bilong Bikpela De Bilong Pentikos 33 C.E. Baibel i tok em i bin givim planti mani bilong helpim ol nupela disaipel long dispela taim. Olsem na ating Jisas i bin save long Barnabas, na tu anti bilong em Maria, na pikinini man bilong Maria, em Mak.​​—Aposel 4:​36, 37; Kolosi 4:​10.

Long Gutnius Mak i raitim em i tok olsem long nait ol birua i holimpas Jisas, i gat wanpela yangpela man i stap em i werim wanpela laplap tasol “long bodi bilong em.” Taim ol i holimpas Jisas, Mak i tok dispela yangpela i ranawe. Yu ting dispela yangpela man i husat?​​— Yes, ating em Mak! Taim Jisas na ol aposel i bin lusim haus we ol i bin bung long dispela nait, i luk olsem Mak i bin pasim wanpela laplap na bihainim ol i go.​​—Mak 14:​51, 52.

Tru tumas, i gat planti taim we Mak i bin bung wantaim ol wokman bilong God. Ating em i bin stap long bung taim God i kapsaitim holi spirit long Pentikos 33 C.E., na em i save gut long ol gutpela wokboi bilong God, olsem Pita. Tasol em i save raun tu wantaim kandere bilong em Barnabas husat i bin kamapim Sol long Pita 3-pela yia bihain long Jisas i bin kamap long Sol long wanpela visen. Sampela yia bihain, ol i salim Barnabas i go long Tarsus bilong painim Sol.​​—Aposel 9:​1-​15, 27; 11:​22-​26; 12:25; Galesia 1:​18, 19.

Long 47 C.E., ol i makim Barnabas na Sol bilong mekim wok misineri. Tupela i kisim Mak i go wantaim ol, tasol bihain, Mak i lusim ol na i go bek long Jerusalem. Baibel i no tokaut long as na Mak i mekim olsem. Sol, nem Rom bilong em Pol, em i kros. Na em i no lusim tingting long samting em i ting i bikpela rong Mak i mekim.​​—Aposel 13:​1-3, 9, 13.

Taim Pol tupela Barnabas i kam bek pinis long raun bilong ol long mekim wok misineri, ol i stori long ol gutpela samting i bin kamap. (Aposel 14:​24-​28) Sampela mun bihain, tupela i laik go bek na lukim ol nupela disaipel long ol hap we ol i bin autim tok. Barnabas i laik kisim Mak i go wantaim ol, tasol yu ting Pol i gat wanem tingting?​​—Em i tok ol ‘i no ken kisim Mak i go wantaim ol,’ long wanem, bipo Mak i bin lusim ol na i go bek long ples. Orait nau samting i kamap em ating i mekim Mak i bel hevi tru!

Pol tupela Barnabas i kirap na “tok kros planti,” na tupela i bruk. Barnabas i kisim Mak i go wantaim em bilong autim tok long Saiprus, na Pol i kisim Sailas i go wantaim em long lukim gen ol nupela disaipel, olsem em i gat tingting pastaim long mekim. Ating Mak i bel hevi stret long em i bin kamapim hevi namel long Pol na Barnabas!​​—Aposel 15:​36-​41.

Yumi no save long as na Mak i bin go bek long ples. Ating em i pilim olsem i gat as tru na em i mas i go bek. Tasol maski i gat wanem as, ating Barnabas i bilip strong olsem dispela samting i no inap kamap gen. Na tru tumas, dispela samting i no kamap gen. Mak i no givap! Bihain em i mekim wok misineri wantaim Pita long longwe ples Babilon. Long dispela hap, Pita i salim gude, na i tok: “Pikinini bilong mi, Mak, em tu i gude long yupela.”​​—1 Pita 5:​13.

Pita na Mak i pas gut wantaim! Dispela samting i kamap ples klia long Gutnius Mak i raitim. Mak i stori long ol samting Pita i bin lukim na i tokim em long en. Olsem: Skelim ol stori bilong bikpela win na si i bin kamap long raunwara Galili. Mak tasol i kolim hap long bot we Jisas i slip na samting em i slip long en, em ol samting man bilong kisim pis, olsem Pita, inap luksave long en. Gutpela yumi ritim na skelim ol stori bilong dispela samting long Matyu 8:​24; Mak 4:​37, 38; na Luk 8:​23.

Bihain, taim Pol i stap long kalabus long Rom, em i tok amamas long Mak long em i bin stap gut long em na helpim em. (Kolosi 4:​10, 11) Na taim ol i kalabusim Pol gen long dispela hap, em i raitim pas long Timoti na askim em long bringim Mak i kam wantaim em. Em i tok: “Em i gutpela man bilong helpim mi long wok.” (2 Timoti 4:​11) Tru tumas, Mak i bin insait long planti gutpela wok tru, long wanem, em i no givap!

Ol Askim:

○ Mak i stap we, na i gat wanem as na yu inap tok em i save long Jisas?

○ Husat i bin helpim tru Mak?

○ Wanem samting inap mekim na Mak i givap?

○ Olsem wanem yumi save olsem bihain aposel Pol i orait gen long Mak?

[Futnot]

[Piksa long pes 25]

Ating dispela yangpela em i husat? Wanem samting i painim em, na bilong wanem?

[Piksa long pes 26]

Mak i no givap, olsem na em i kisim wanem ol blesing?