Ol Man i Askim
Bilong Wanem God i Larim Pen na Hevi i Stap?
God i no as bilong ol pen na hevi i painim ol man. Baibel i tok: “God I Gat Olgeta Strong i no inap mekim pasin nogut. Nogat tru.” (Jop 34:10) Orait husat tru i as bilong ol pen na hevi?
Jisas i bin kolim Satan olsem “hetman i save bosim dispela graun.” (Jon 14:30) Tru, Jehova em i King Bilong Heven na Graun. Em i no inap larim narapela i kisim dispela namba. Tasol inap sotpela taim God i bin larim Satan i bosim dispela graun.—1 Jon 5:19.
Satan em i wanem kain hetman? Kirap long taim em i toktok wantaim namba wan meri long Iden, Satan i stap man bilong kilim man i dai na man bilong giaman. Em i save kamapim kain kain hevi na bagarap. Jisas i tok long em olsem: “Bipo yet em i stap man bilong kilim ol man i dai. Na em i no bihainim pasin i tru, long wanem, pasin i tru em i no i stap long em. Tok giaman em i save mekim, dispela em i tok bilong em stret. Em i man bilong tok giaman, na em i papa tru bilong pasin bilong tok giaman.” (Jon 8:44) Na Jisas i tok, ol man i wok long painim rot bilong kilim em i dai, ol i pikinini bilong namba wan kilman. Ol i bihainim pasin bilong em na long dispela rot ol i kamap pikinini bilong em. I gat wanpela savetok olsem: Ol pikinini i save bihainim pasin bilong papa.
Satan i wok yet long putim tingting nogut bilong kilim i dai man long bel bilong ol man. R. J. Rummel, bipo em i profesa bilong Yunivesiti Bilong Hawaii, Amerika, em i tok, namel long yia 1900 na 1987, sampela gavman i bin kilim i dai 169,198,000 manmeri long taim ol i laik pinisim lain bilong wanpela gavman, o ol i laik pinisim wanpela lain olgeta, o ol i bagarapim nating ol manmeri. Na i gat planti milion moa ol i bin dai long ol woa insait long ol dispela yia.
Orait sapos God i no as bilong ol pen na hevi, bilong wanem em i larim dispela pasin i stap? Long wanem, sampela bikpela tok i bin kamap long bipo yet, long wanem samting i stret na wanem samting i no stret, na olgeta lain long heven na graun i insait long ol dispela bikpela tok. Orait nau yumi ken stori long wanpela.
Taim namba wan man na meri, em Adam na Iv, i kamap, ol i go long sait bilong Satan. Ol i sakim wok bos bilong God na ol i laik bosim ol yet, tasol tru tru em Satan yet i bosim ol.—Stat 3:1-6; KTH 12:9.
Jehova i ting i no stret sapos em i kirap stretim dispela bikpela tok na em i no larim haptaim i lus pastaim bilong kamapim long ples klia tru olsem ol man bilong graun inap bosim ol yet o nogat. Orait wanem samting i kamap klia? Taim ol man yet i bosim graun na Satan i stiaim ol, dispela i kamapim pen na hevi tasol. God i larim haptaim i lus na dispela i bin helpim ol man. Em i helpim ol olsem wanem? Ol man i skelim gut ol samting i bin kamap insait long dispela taim na ol i luksave olsem ol man i no inap bosim ol yet, ol i gat rot long kamapim bel bilong ol, em ol i laik bai God i bosim ol. Ol man i kisim save long ol samting God i laik bai ol i mekim, na ol i bihainim long i stap bilong ol, ol i gat rot long i stap oltaim oltaim.—Jon 17:3; 1 Jon 2:17.
Tru, long nau Satan i bosim strong ol man bilong graun. Tasol em i no gat longpela taim moa. Klostu nau, long rot bilong Pikinini bilong em, Jehova bai “bagarapim na rausim wok bilong Satan.” (1 Jon 3:8) Jisas bai wok aninit long God na pinisim olgeta pen na bel hevi bilong ol man na stretim bek sindaun bilong ol. Em bai kirapim bek planti bilion man i bin kisim bikpela pen na hevi na ol i dai insait long planti tausen yia i go pinis, na ol bai stap laip gen long graun.—Jon 11:25.
God i bin kirapim bek Jisas long matmat na dispela i soim olsem em i daunim ol wok bilong Satan—dispela em i piksa bilong gutpela samting bai painim ol man i laik bai God i bosim ol. (Aposel 17:31) Bilong yumi ken tingim dispela gutpela taim bihain, Baibel i mekim gut bel bilong yumi na i tok: “God . . . bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”—KTH 21:3, 4.