Oltaim Yu Laik i Stap Namba Wan?

YU SAVE long wanpela man em oltaim em i laik i stap namba wan?— Ating taim em i sanap long lain, em i pusim narapela i go na bai em i ken sanap long fran. Yu bin lukim dispela samting i kamap?— Bikpela Tisa i bin lukim ol bikpela man tu i laik kisim ol nambawan gutpela ples bilong sindaun. Na em i no laikim dispela pasin. Yumi ken lukim wanem samting i bin kamap.

Baibel i stori olsem ol i bin singautim Jisas i go long wanpela bikpela kaikai long haus bilong wanpela Farisi, em i wanpela bikman bilong lotu. Taim Jisas i kamap pinis, em i lukluk i stap long ol arapela man i kam na ol i go makim ol namba wan sia bilong sindaun long en. Olsem na em i mekim wanpela stori long ol man i stap long dispela kaikai. Yu laik harim dispela stori?—

Jisas i tok: ‘Sapos wanpela man i singautim yu i go long bikpela kaikai bilong marit, yu no ken i go sindaun long namba wan sia.’ Yu save bilong wanem Jisas i tok olsem?— Em i stori olsem nogut ol i bin singautim wanpela man i gat bikpela namba moa. Olsem yu ken lukim long piksa, man i bin singautim ol man i kam kaikai em bai kam na tok: ‘Yu givim dispela namba wan sia long dispela man na yu go sindaun long hap.’ Yu ting man hia bai pilim olsem wanem?— Em bai sem, long wanem, olgeta arapela man bai lukluk long em taim em i kirap i go sindaun long baksait.

Jisas i soim olsem i no stret long yumi laik kisim namba wan gutpela sia. Olsem na em i tok: ‘Sapos wanpela man i singautim yu i go long bikpela kaikai bilong marit, yu mas go na sindaun long baksait tru. Bihain, dispela man i bin singautim yu bai kam na tok, “Pren, yu kam na sindaun long namba wan sia.” Yu bai kisim biknem long ai bilong olgeta man taim yu go sindaun long namba wan sia.’​—Luk 14:​1, 7-​11.

Yu kliagut long samting Jisas i laik skulim ol man long en?— Orait yumi ken stori long sampela samting na bai yu ken save yu kliagut o nogat. Tingim olsem yu laik kalap long wanpela bas i pulap long ol pasindia. Yu ting i stret long yu hariap i go sindaun long sia na larim wanpela man i bikpela moa long yu i sanap?— Yu ting Jisas bai amamas sapos yu mekim olsem?—

Ating sampela man bai tok Jisas i no tingim ol samting yumi mekim. Tasol yu ting dispela tok i stret?— Taim Jisas i bin stap long dispela bikpela kaikai long haus bilong Farisi, em i lukluk long ol man taim ol i go makim ol sia bilong sindaun. Olsem na long nau tu em i tingim tru ol samting yumi save mekim, a?— Nau Jisas i stap long heven, na em inap tru long lukim olgeta samting yumi mekim.

Taim man i laik stap namba wan, dispela inap kamapim ol hevi. Planti taim tok pait i kamap na ol man i kros. Sampela taim dispela samting i save kamap taim ol pikinini i raun wantaim long bas. Taim ol i opim dua bilong bas, ol pikinini i save resis long i go pas. Ol i laikim ol gutpela hap bilong sindaun, em ol sia i stap klostu long windo. Wanem samting inap kamap?— Yes, ating narapela bai kros long narapela.

Pasin bilong i laik stap namba wan inap kamapim planti hevi. Dispela pasin i bin kamapim hevi namel long ol aposel bilong Jisas tu. Olsem yumi bin lainim long Sapta 6 bilong dispela buk, ol i tok pait namel long ol yet long husat i nambawan. Jisas i mekim wanem?— Yes, em i bin stretim ol. Tasol bihain ol i tok pait gen. Yumi ken lukim olsem wanem dispela samting i bin kamap.

Em laspela taim bilong ol aposel, na ol arapela tu long wokabaut wantaim Jisas i go long Jerusalem. Jisas i bin toktok long ol long Kingdom bilong em, olsem na Jems na Jon i bin tingting long mekim wok king wantaim em. Ol i bin toktok tu long dispela samting wantaim mama bilong ol, Salome. (Matyu 27:56; Mak 15:40) Olsem na taim ol i wokabaut i go long Jerusalem, Salome i kam long Jisas, brukim skru, na askim em long wanpela samting.

Jisas i askim em: “Yu laikim wanem samting?” Em i tok em i laik bai Jisas i orait long tupela pikinini bilong em i sindaun klostu long em long Kingdom, wanpela long han sut na narapela long han kais. Orait, taim ol arapela 10-pela aposel i harim tok long samting Jems na Jon i tokim mama bilong ol long askim Jisas long en, yu ting ol i pilim olsem wanem?—

Yes, ol i kros nogut tru long Jems na Jon. Olsem na Jisas i givim sampela gutpela tok long olgeta aposel bilong em. Jisas i tokim ol olsem ol bikman bilong graun i save laikim tumas long kisim bikpela strong na namba. Ol i laik bai ol i gat bikpela namba na bai olgeta man i ken bihainim tok bilong ol. Tasol Jisas i tokim ol disaipel bilong em olsem ol i no ken mekim kain pasin olsem. Jisas i tok: “Man i laik i stap bikman namel long yupela, em i mas i stap wokman bilong yupela.” Man! Tingim dispela samting!​—Matyu 20:​20-​28.

Yu save long ol samting wokboi i save mekim?— Em i save mekim wok bilong helpim ol arapela man, na em i no ting ol arapela i mas mekim wok bilong helpim em. Em i save sindaun long baksait tru, em i no save kisim namba wan sia. Em i save daunim em yet, na em i no mekim pasin i olsem em i gat biknem. Na tingim, Jisas i tok man i laik i stap namba wan, em i mas i stap wokboi bilong ol arapela.

Orait, olsem wanem long yumi?— Yu ting wokboi bai tok pait wantaim bos bilong em long husat i ken kisim namba wan sia? O yu ting em bai tok pait long husat bai kaikai pastaim? Yu ting olsem wanem?— Jisas i tok oltaim wokboi i save tingim bos bilong em pastaim na em yet bihain.​—Luk 17:​7-​10.

Olsem na yumi no ken traim long i stap namba wan, tasol yumi mas mekim wanem?— Yes, yumi mas i stap wokboi bilong ol arapela. Na dispela i makim olsem yumi tingim ol arapela pastaim na yumi yet bihain. Yumi mas tingim olsem ol arapela i bikpela moa long yumi. Olsem wanem? Yu inap tingim sampela samting yu ken mekim bilong tingim ol arapela pastaim?— Gutpela yu opim buk i go bek long pes 40 na 41 na lukim gen sampela samting yu ken mekim bilong tingim ol arapela pastaim long rot bilong mekim wok bilong helpim ol.

Yu bai tingim olsem Bikpela Tisa i bin tingim ol arapela pastaim long rot bilong mekim wok bilong helpim ol. Long laspela nait em i stap wantaim ol aposel bilong em, em i bin brukim skru na wasim lek bilong ol. Sapos yumi tingim ol arapela pastaim long rot bilong mekim wok bilong helpim ol, yumi bai amamasim Bikpela Tisa na Papa bilong em, God Jehova.