“Mekim Planti Gutpela Pasin Bilong Helpim Ol Arapela”
1 Long ol laspela yia bilong em long givim bel long mekim wok autim tok, aposel Pol i bin wok gut wantaim Timoti na Taitus. Em i raitim ol wankain tok liklik long tupela bilong strongim bel bilong ol. Em i tokim Taitus olsem “ol manmeri i bilip long God,” ol i mas “wok strong long mekim ol gutpela pasin.” (Ta. 3:8) Em i tokim Timoti olsem ol lain i bilip na wetim God long helpim ol, ol i mas “mekim planti gutpela pasin bilong helpim ol arapela.” (1 Ti. 6:17, 18) Em gutpela tok tru bilong yumi olgeta i ken tingim! Tasol wanem samting bai kirapim yumi long mekim ol gutpela pasin long i stap bilong yumi? Na yumi inap mekim wanem ol pasin long ol de bihain?
2 Yumi bilip na laikim tru Jehova na yumi wetim gutpela samting em bai kamapim long bihain, na dispela i kirapim yumi long mekim planti gutpela pasin bilong helpim ol arapela. (1 Ti. 6:19; Ta. 2:11) Long dispela taim bilong yia, yumi tingim gen olsem Jehova i bin salim Pikinini bilong em i kam long graun bambai Jisas inap kamapim klia olsem i stret Jehova i stap King, na tu, bilong opim rot na bai ol man inap kisim laip. (Mt. 20:28; Jo. 3:16) Long Memorial bilong tingim indai bilong Krais, long Mas 28, tok ol i mekim bai kamapim klia ol dispela samting. Yumi gat rot bilong kisim laip oltaim, olsem na dispela i mas kirapim yumi long “mekim planti gutpela pasin bilong helpim ol arapela,” a? Tru tumas, dispela i mas kirapim yumi long mekim olsem! Yumi inap mekim wanem ol gutpela pasin long nau?
3 Ol Gutpela Pasin Bilong Mekim Long Mun Mas na Bihain Long En: Yumi bai go long Memorial—em nambawan bikpela bung bilong ol Witnes Bilong Jehova long olgeta hap. (Lu. 22:19) Tasol yumi laik bai planti moa i ken amamas long dispela bung. Lukim ripot bilong wok long Wastaua bilong Janueri 1, 2002, pes 19-22, na bai yu lukim olsem las yia long Papua Niugini, namba bilong ol man i bung long Memorial i winim namba bilong ol pablisa inap 5-pela taim. Planti bilong ol lain i kam long Memorial ol i bin mekim olsem, long wanem, wanpela i bin singautim ol i go. Olsem na kirap long nau i go inap long Mas 28, yumi laik lusim bikpela hap taim long singautim ol man long kam long Memorial, na helpim ol long kisim save olsem God inap kisim bek ol.
4 Long mun Epril, olsem wanem yumi inap kamapim klia olsem yumi “mekim planti gutpela pasin bilong helpim ol arapela”? Yumi inap mekim olsem long rot bilong givim bel tru long autim gutnius, na “wok strong long mekim olgeta kain gutpela pasin.” (Ta. 2:14; Mt. 24:14) Sapos yu no bin inap long mekim wok painia haptaim long Mas, yu ting yu inap mekim long Epril o Me o tupela mun wantaim? Sapos yu mekim wok painia haptaim long Mas, yu ting yu inap mekim yet dispela wok?
5 Sampela em ol i mekim wok mani, ol i lukim olsem ol inap lusim wanpela o tupela aua samting long autim tok taim ol i go long ples wok, o autim tok long rot, o long ol man i wok long ol bisnis i save mekim wok long moning yet. Sampela narapela ol i save makim hap taim bilong belo long autim tok. Sampela i save mekim Baibel-stadi wantaim wanpela wanwok long dispela hap taim bilong belo. Planti sista em ol i no mekim wok mani ol i save makim taim bilong i go autim tok taim ol pikinini i stap long skul. Ol i save kirap kwik long sampela moning na mekim ol wok bilong haus, na long dispela rot ol i gat bikpela taim moa bilong autim tok na skulim ol man.—Ef. 5:15, 16.
6 Maski sapos yu no inap long mekim wok painia haptaim, ating yu ken wokim sediul bilong mekim bikpela wok moa bilong autim tok, na wok strong long ‘mekim planti gutpela pasin bilong helpim ol arapela na givim planti samting long ol manmeri i sot,’ na lainim ol narapela long tok i tru.—1 Ti. 6:18.
7 Tingim Gutpela Pasin Bilong Kamapim Ol Disaipel: Long olgeta yia, ol man i laik kisim sampela save moa ol i save kam long Memorial. Olsem wanem? I gat rot long sampela long kongrigesen i ken helpim ol lain i kam long Memorial tasol i no gat man i stadi wantaim ol? Yu inap go bek lukim ol na tingting long helpim ol long kamap strong long ol samting bilong spirit? Ating sampela bilong ol lain i kam long Memorial ol i wanblut bilong sampela Witnes. Ating sampela ol i bin stadi bipo, olsem na yumi ken strongim ol long kirap gen long stadi na kam oltaim long ol miting. Yumi bai kisim bikpela amamas tru long lukim ol i kamap wokman bilong Jehova wantaim yumi!
8 Taim yumi mekim bikpela wok moa bilong autim tok long mun Mas, na bihain long en, rot bai op long yumi inap painim ol man em yumi inap mekim gobek long ol. Traim long lusim wanpela askim long ol. Taim yu kamapim askim pinis, orait pasim tok long stori long bekim bilong dispela askim taim yu go bek lukim em. Taim yumi mekim olsem, dispela bai opim rot long yumi inap mekim gobek long man. Gutpela samting bai kamap sapos yumi mekim kwik ol gobek. Sapos yumi no bin kirapim Baibel-stadi long namba wan taim yumi bungim man, orait yumi mas traim long kirapim wanpela Baibel-stadi taim yumi mekim gobek.
9 Taim yumi autim tok long rot, yumi mas tingting long kirapim tok wantaim ol man. Sapos yumi kisim nem, atres, o telefon namba bilong wanpela man yumi bungim taim yumi autim tok long rot, yumi mas wok strong long mekim gobek long em. Sapos man yu bungim em i no stap long teritori bilong yu, orait yu mas toksave long pablisa bilong narapela kongrigesen bambai em inap mekim gobek long dispela man. Kuskus bilong kongrigesen bai helpim yu sapos i gat wok long mekim olsem. Sampela taim, em inap salim toksave i go long brens-ofis na ol inap stretim dispela samting. Long dispela rot, dispela man inap kisim sampela save moa.
10 Sapos yu bin kisim telefon namba tasol yu no bin kisim atres, orait yu ken ringim dispela man na long dispela rot yu mekim gobek. Redim gut ol tok yu bai kamapim. Putim buk Toktok Gut i stap klostu bambai yu inap lukim kwik ol tok. Sampela i mekim gutpela wok long stadi wantaim ol man long rot bilong telefon, na ol i mekim olsem wantaim ol man em ol i hatwok long bungim ol long haus. Wanpela sista i askim ol meri em i bungim long haus long telefon namba bilong ol, na long dispela rot em i bin kirapim tupela Baibel-stadi.
11 Wok Gut Wantaim Ol Elda Long Helpim Ol Man i Lusim Wok Autim Tok: Ol elda i gat laik tru long helpim ol man i lusim wok autim tok. Planti bilong ol kain lain olsem ol yet i bin kirap gen long go long ol miting bilong kongrigesen. Ol i luksave olsem em i bikpela samting long pas gut wantaim oganaisesen bilong Jehova, na bai ol inap i stap gut long ol samting bilong spirit olsem Buk Song 91 i stori long en. Sampela ol i redi long insait long wok autim tok gen. Sapos sampela moa em ol i bin lusim wok autim tok, ol i kam long Memorial long dispela mun, ating ol bai amamas long wanpela i laik mekim Baibel-stadi wantaim ol. Sapos olsem, ol elda bai stretim rot long wanpela i ken stadi wantaim ol. Sapos ol elda i askim yu long givim kain helpim olsem, ol bai amamas tru long pasin bilong yu long wok gut wantaim ol.—Ro. 15:1, 2.
12 “Wok Strong Long Mekim Ol Gutpela Pasin”: Planti em ol i bin mekim wok painia haptaim inap wanpela o tupela mun samting, ol i lukim olsem wok autim tok bilong ol i kamap bikpela moa long ol mun bihain. Ol i bungim ol man em ol i laik kisim sampela save moa na ol i mas mekim gobek long ol. Dispela i kirapim ol long insait moa yet long wok autim tok na bai ol inap bungim gen ol man i laik kisim sampela save moa. Sampela i kirapim ol Baibel-stadi, na dispela i kirapim ol long mekim bikpela wok moa long autim tok.
13 Sampela moa ol i kisim bikpela amamas taim ol i mekim bikpela wok moa long wok bilong autim tok na kamapim ol disaipel, na dispela i kirapim ol long skelim wanem ol samting i stap namba wan long i stap bilong ol. Olsem na sampela ol i lusim hap taim ol i save tromoi bilong mekim wok mani, na ol i wok oltaim long mekim wok painia haptaim. Sampela ol i kirap insait long wok painia oltaim. Ol i bilip na wetim God long helpim ol, ol samting bilong dispela graun nogat. Ol i lukim olsem pasin bilong “givim planti samting” na “mekim gut long ol arapela,” long dispela rot Jehova i mekim gut long ol, na tu, dispela i strongim bilip bilong ol long wet long kisim gutpela samting bihain, em “laip tru.” (1 Ti. 6:18, 19) Taim planti moa i mekim wok painia, dispela i save helpim kongrigesen olgeta. Ol painia i save stori long ol narapela long ol ekspiriens bilong ol, na kirapim ol narapela tu long insait wantaim ol long mekim wok bilong autim tok long olgeta de, na dispela i save helpim olgeta long kongrigesen long tingim moa yet ol samting bilong spirit.
14 Yumi olgeta i ken wok long “mekim planti gutpela pasin bilong helpim ol arapela” nau long dispela taim bilong Memorial, na long ol mun bihain taim yumi mekim wok Kristen bilong yumi i kamap bikpela moa. Jehova i bin opim rot bilong yumi long i stap oltaim long nupela graun em stretpela pasin tasol bai i stap long en, olsem na yumi olgeta i ken kamapim olsem yumi pilim tru dispela gutpela samting.—2 Pi. 3:13.