“Mekim Gutpela Pasin” Long Olgeta Man
1 “Autim Tru Olgeta Tok Bilong God” na “Mekim Planti Gutpela Pasin Bilong Helpim Ol Arapela,” em ol het-tok bilong ol pepa yumi kisim wantaim Wok Kingdom bilong Februeri na Mas 2002. (Kl. 1:25; 1 Ti. 6:18) Ol dispela pepa i bin kirapim yumi long wok strong moa long helpim ol man i laik harim tok long i kam long Memorial, na helpim ol pablisa i lusim wok autim tok long wok gen wantaim kongrigesen, na helpim ol pikinini na ol Baibel-stadi i winim mak long kirap autim tok. Ating sampela gutpela samting i bin kamap taim yumi wok strong olsem. Long nau, “taim yumi inap mekim gutpela pasin long ol arapela, yumi mas mekim.”—Ga. 6:10.
2 Singautim Ol Long Kam Gen: Long Papua Niugini, insait long 3-pela yia i go pinis, winim 12,000 manmeri em ol i no pablisa, ol i bin kam long Memorial. Ol i bin kam long Memorial, long wanem, ol i laik long harim tok. Olsem na yumi mas mekim wanem bilong kirapim ol man em ol inap “kisim laip i stap gut oltaim” na bai ol i kamap “ol manmeri i bilip”? (Ap. 13:48) Kirapim ol long i kam kwik long ol miting bilong kongrigesen.
3 Yu ken singautim wanpela man i laik harim tok long i kam long Buk-Stadi Bilong Kongrigesen, na em i ken stadi long ol tok profet bilong Daniel. Sapos dispela man i wanblut o pren bilong yu, na yu gat wanpela tok bilong mekim long Skul Tiokratik Bilong Autim Tok, orait yu ken singautim em i kam long harim tok bilong yu. Toksave long em long ol het-tok bilong ol pablik-tok bai kamap. (Long notis-bot i gat sediul bilong ol pablik-tok.) Painim rot bilong kirapim laik bilong dispela man long lotuim Jehova. Na sapos wanpela long kongrigesen i no stadi yet wantaim em, orait long gutpela pasin yu ken tokim em olsem yu laik stadi wantaim em.
4 Wok Long Strongim Ol Pablisa i Lusim Wok Autim Tok: Planti bilong ol manmeri i kam long Memorial, ol i dediket pinis long Jehova. Tasol ol i no insait moa long wok bilong autim gutnius. Tasol Pol i kirapim yumi long “mekim gutpela pasin long ol arapela manmeri i bilip long Bikpela.” (Ga. 6:10) Olsem na yumi mas tingting strong long helpim ol pablisa i no autim tok moa.
5 Ating sampela bilong ol i bihainim pinis tok bilong ol elda na ol narapela brata sista, na ol i insait gen long wok autim tok. Sapos ol elda i makim yu long wok wantaim wanpela pablisa i kirap autim tok gen, yu mas save olsem pasin bilong yu long laikim tru Jehova na wok autim tok, dispela bai strongim em. Soim em pasin bilong yu long mekim kain kain wok autim tok na bai em i ken amamas long mekim, na stap strong long wok autim tok, na pilim ol gutpela samting Jehova i givim long em.
6 Helpim Ol Nupela Pablisa na Bai Wok Bilong Ol i Kirap Gut: Taim wanpela meri i luksave olsem em i painim pinis trupela oganaisesen bilong God, em i laik kirap hariap long mekim wok autim tok. Bihain long em i kisim save long ol samting em i mas mekim, em i tok: “Mi laik kirap kwik long mekim dispela wok.” Sapos yu stadi wantaim wanpela na ol elda i orait long em i ken insait long wok autim tok, helpim em long pilim olsem em i bikpela samting long “kirap kwik long mekim dispela wok.” Taim yu mekim olsem, yu bai helpim dispela nupela pablisa na bai wok bilong em i gat gutpela kirap bilong en. Helpim em long kisim pasin bilong redi gut na autim tok long olgeta wik.
7 Sapos pikinini bilong yu yet i kamap nupela pablisa i no baptais yet, wok wantaim em bilong helpim wok bilong em i kamap gutpela moa inap long skel bilong krismas na save bilong em. Taim yu helpim em liklik, ating bai yu kirap nogut long lukim pasin bilong em long toktok gut wantaim ol man, ritim ol tok long Baibel, na tilim ol nius samting. Taim em i bungim wanpela man i amamas long harim tok, lainim em long pasin bilong mekim gobek na helpim dispela man long kisim sampela save moa.
8 Mekim Wok Bilong Yu Yet i Kamap Bikpela: Olsem wanem? Sindaun bilong yu i orait long yu ken mekim bikpela wok moa bilong autim tok long taim bilong Memorial na bihain long en? Yu inap skruim wanpela o tupela aua moa long hap taim yu save lusim bilong autim tok long olgeta wik? Yu tingting long mekim gen wok painia haptaim long ol mun bihain? O yu inap stretim sindaun bilong yu na bai yu ken autim tok fultaim? Olgeta wok yumi mekim bilong autim tok inap helpim wanpela man long kisim tok i tru! (Ap. 8:26-39) Taim yumi wet long ol samting i laik kamap, oltaim yumi mas “strong long mekim gutpela pasin long ol manmeri bilong God na long olgeta manmeri.”—1 Te. 5:15.
[Blok long pes 3]
Wok Yet Long Helpim:
□✔ Ol manmeri i kam long Memorial
□✔ Ol pablisa i autim tok gen
□✔ Ol nupela pablisa i no baptais