Bihainim Pasin Bilong Jehova Long i No Ken Les Kwik

“Bikpela i no save wok isi isi long kamapim samting em i bin promis long mekim . . . Tasol em i . . . isi long yupela na em i wet i stap yet.”​—2 PITA 3:9.

1. Wanem gutpela presen tru Jehova i laik givim long ol man?

JEHOVA i laik givim wanpela samting long yumi em ol narapela man i no inap givim long yumi. Em wanpela samting ol man i laik tru long kisim na pe bilong en i antap tru, tasol man i no inap baim o mekim sampela wok bilong kisim dispela samting. Samting em i laik givim olsem presen em laip oltaim​—long klostu olgeta bilong yumi em laip oltaim hia long graun long wanpela paradais. (Jon 3:16) Bai yumi amamas tru long kain taim olsem! Ol samting bilong mekim yumi bel hevi bai pinis​—olsem pasin pait, stap rabis, pasin raskol, sik, na i dai. Ol manmeri bai stap bel isi tru na wanbel aninit long Kingdom Bilong God. Yumi laik tru long i stap long dispela Paradais!​—Aisaia 9:​6, 7; KTH 21:​4, 5.

2. Bilong wanem Jehova i no pinisim yet dispela graun bilong Satan?

² Jehova tu i amamas long tingim dispela taim we em bai kamapim Paradais hia long graun. Em i tingim dispela taim, long wanem, em i laikim tru stretpela pasin. (Song 33:5) Em i no amamas liklik long lukim ol manmeri bilong dispela graun em ol i no tingim o laikim ol stretpela stiatok bilong em, na ol i sakim wok bos bilong em na mekim nogut long ol manmeri bilong em. Tasol i gat as na em i no kirap yet long pinisim dispela graun bilong Satan. Em i mekim olsem, long wanem, i gat tok i kamap long i stret Em i stap nambawan bos o nogat. Bilong stretim dispela tok, Jehova i kamapim wanpela gutpela pasin, em wanpela pasin planti manmeri bilong nau ol i no gat​—em pasin bilong i no les kwik.

3. (a) Wanem mining bilong tok Grik na tok Hibru i stap long Baibel ol i tanim olsem “i no les kwik”? (b) Bai yumi skelim wanem ol askim?

³ I gat wanpela tok Grik long Baibel, mining bilong en i olsem “wet longpela taim,” na ol i tanim olsem “i no les kwik long” na “isi long.” Long tok Grik na tok Hibru dispela tok “i no les kwik long,” i gat mining olsem isi long man na no ken belhat kwik. Olsem wanem pasin bilong Jehova long i no les kwik i helpim yumi? Pasin bilong Jehova na ol gutpela wokboi bilong em long ol i no les kwik na ol i isi long man i givim wanem skul long yumi? Olsem wanem yumi save pasin bilong Jehova long i no les kwik i gat mak bilong en? Bai yumi skelim.

Jehova i No Les Kwik

4. Aposel Pita i bin tok wanem long pasin bilong Jehova long isi long o i no les kwik long ol man?

⁴ Aposel Pita i stori long pasin bilong Jehova long i no les kwik olsem: “Ol pren tru, yupela i no ken lusim tingting long dispela wanpela samting. Long tingting bilong Bikpela wanpela de i olsem 1,000 yia, na 1,000 yia i olsem wanpela de. Bikpela i no save wok isi isi long kamapim samting em i bin promis long mekim, olsem sampela man i save tok. Nogat. Tasol em i no laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet.” (2 Pita 3:​8, 9) I gat tupela poin dispela skripsa i kamapim inap helpim yumi long kliagut long pasin bilong Jehova long i no les kwik long man.

5. Tingting bilong Jehova long ol mun na yia samting i save mekim wanem long ol samting em i mekim?

⁵ Namba wan poin i olsem: Tingting bilong Jehova long ol mun na yia samting i no wankain long tingting bilong yumi. Long tingting bilong dispela Man i save stap oltaim oltaim, wan tausen yia i olsem wanpela de tasol. Olsem na em i no sot long taim. Tasol em i no isi isi tumas long mekim ol samting, nogat. Savetingting bilong em i no gat pinis bilong en, olsem na Jehova i save long taim stret bilong mekim samting bilong helpim ol man, na em i no les kwik long wetim dispela taim i kamap. Tasol yumi no ken kisim tingting olsem Jehova i no save pilim ol hevi ol wokboi bilong em i save karim taim em i wetim taim bilong mekim samting. Em i God bilong “bikpela marimari,” na as bilong pasin laikim. (Luk 1:​77, 78; 1 Jon 4:8) Em inap pinisim olgeta hevi i bin kamap long pasin nogut em i bin larim i stap inap liklik haptaim.​—Song 37:10.

6. Yumi no ken kisim wanem tingting long God? Bilong wanem yumi no ken mekim olsem?

⁶ Tasol i no isi long wetim samting yu gat laik tru long kisim. (Sindaun 13:12) Olsem na taim ol manmeri i no truim hariap ol tok promis bilong ol, ol arapela i ting ol i no inap truim tok bilong ol. I no stret yumi ting olsem long God! Sapos yumi ting pasin bilong God long i no les kwik i makim olsem em i wok isi isi long kamapim ol samting, orait taim ol yia i kam i go, dispela inap mekim na yumi bel hevi na kisim tupela tingting na slip long ol samting bilong spirit. Na samting i moa nogut i olsem: Ol man Pita i bin tok lukaut long ol​—em ol man i no bilip na ol i tok bilas​—ol inap pulim yumi long lusim bilip. Ol i save tok bilas olsem: “Em i bin tok olsem em bai i kam bek gen, a? Orait em i stap we? Em i no inap i kam. Taim ol tumbuna i dai, na i kam inap long nau, olgeta samting i stap wankain olsem bipo tru, taim graun i kamap.”​—2 Pita 3:4.

7. Olsem wanem pasin bilong Jehova long isi long man i wok wantaim laik bilong em long ol man i mas tanim bel?

⁷ Namba tu poin yumi ken kisim long tok bilong Pita em Jehova i save isi long ol man, long wanem, em i laik bai olgeta man i tanim bel. Jehova bai bagarapim ol man i no laik lusim ol pasin nogut bilong ol. Tasol God i no save amamas taim man nogut i dai. Tasol em i save amamas taim ol manmeri i tanim bel, lusim ol pasin nogut, na ol i stap laip. (Esekiel 33:11) Olsem na em i wok long isi long ol man na em i kirapim ol wokboi bilong em long autim gutnius long olgeta hap na bai ol manmeri inap kisim laip.

8. Yumi kisim wanem save long pasin bilong God long i no les kwik taim yumi skelim ol samting em i bin mekim long lain Israel?

⁸ Yumi inap kisim save long pasin bilong God long i no les kwik taim yumi skelim ol samting em i bin mekim long lain Israel bilong bipo. Inap planti handet yia em i larim ol i bikhet. Planti taim, long rot bilong ol profet, em i tokim ol: “Yupela tanim bel na lusim pasin nogut bilong yupela na bihainim olgeta lo na tok bilong mi. Ol dispela lo em mi bin givim long ol tumbuna bilong yupela, na ol dispela tok mi bin autim long maus bilong ol wokman bilong mi, ol profet.” Dispela i mekim wanem long ol? Sori tru, ol i “sakim tok bilong en.”​—2 King 17:​13, 14.

9. Olsem wanem pasin bilong Jisas long i no les kwik i wankain stret olsem pasin bilong Papa bilong em?

⁹ Orait bihain Jehova i salim Pikinini bilong em Jisas i kam, na Jisas i wok strong tru long kirapim ol Juda long kamap wanbel wantaim God. Pasin bilong Jisas long i no les kwik i wankain stret olsem pasin bilong Papa bilong em. Maski Jisas i save klostu ol bai kilim em i dai, em i bin tok: “Jerusalem, Jerusalem, yu save kilim ol profet i dai, na yu save kisim ol man God i salim i kam long yu na tromoi ston long ol bilong kilim ol i dai. Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik.” (Matyu 23:37) Dispela i no tok bilong wanpela jas i gat hatpela pasin na i gat bikpela laik long givim strafe long man, nogat. Dispela em i tok bilong wanpela gutpela pren i gat pasin bilong i no les kwik long man. Jisas i gat wankain laik olsem Papa bilong em long heven, em i laik bai ol man i tanim bel na abrusim bagarap. Sampela i bin bihainim tok bilong Jisas na ol i abrusim bikpela bagarap i painim Jerusalem long 70 C.E.​—Luk 21:​20-22.

10. Olsem wanem pasin bilong God long i no les kwik i bin helpim yumi?

¹⁰ Pasin bilong God long i no les kwik em i gutpela samting tru, a? Maski ol man bilong graun i bin bikhet nogut tru, Jehova i larim yumi na planti milion manmeri moa, long kisim save long em na yumi bilip na wet long em i kisim bek yumi. Pita i tokim ol wanbilip Kristen: “Bikpela i wet yet na em i isi long yumi. . . . Em i laik kisim bek yumi.” (2 Pita 3:15) Yumi tenkyu tru olsem pasin bilong Jehova long i no les kwik i opim rot long Em i kisim bek yumi. Na yumi prea olsem Jehova i mas isi long yumi taim yumi wok long lotuim em long olgeta de.​—Matyu 6:12.

11. Taim yumi kliagut long pasin bilong Jehova long i no les kwik, dispela bai kirapim yumi long mekim wanem?

¹¹ Taim yumi save long as na Jehova i no les kwik, dispela i helpim yumi long stap isi na wetim em i kisim bek yumi, na yumi no kisim tingting olsem em i isi isi tumas long truim ol tok promis bilong em. (Krai 3:26) Taim yumi wok long prea long Kingdom Bilong God i mas i kam, yumi bilip olsem God i save long taim stret bilong bekim dispela prea. Na tu, yumi bihainim pasin bilong Jehova na kamapim pasin bilong i no les kwik long ol brata bilong yumi na ol manmeri yumi autim tok long ol. Yumi tu i no laik bai ol man i kisim bagarap, yumi laik bai ol i tanim bel na bilip na wetim wankain samting yumi wetim, em laip oltaim.​—1 Timoti 2:​3, 4.

Ol Profet i No Les Kwik

12, 13. Olsem wanem profet Aisaia i bin kamapim gut pasin bilong i no ken les kwik, olsem Jems 5:10 i stori long en?

¹² Taim yumi skelim pasin bilong Jehova long i no les kwik, dispela i save helpim yumi long amamas long pasin bilong i no les kwik na wok long kisim dispela pasin. Em i hatwok long yumi sinman long kisim pasin bilong i no les kwik, tasol yumi inap mekim. Yumi ken kisim skul long ol wokboi bilong God bilong bipo. Disaipel Jems i bin tok: “Ol brata, yupela i mas tingim ol profet bipo ol i bin autim tok long nem bilong Bikpela. Ol birua i bin mekim nogut long ol, tasol ol i bin strongim bel na karim dispela hevi. Yupela i mas kisim dispela pasin bilong ol, na bihainim.” (Jems 5:10) Taim yumi save olsem i gat sampela man i bin karim na winim ol wankain hevi olsem yumi gat, dispela i strongim yumi na mekim isi bel bilong yumi.

¹³ Tingim profet Aisaia, em i mas i gat pasin bilong i no les kwik bilong mekim wok bilong em. Jehova i tokim em olsem: “Go na givim dispela tok long ol manmeri, ‘Yupela i ken harim tok planti taim, tasol bai yupela i no inap save long as bilong en. Yupela i ken lukluk planti taim, tasol bai yupela i no inap luksave long wanpela samting.’ Na tu em i tok olsem, ‘Mekim tingting bilong ol dispela manmeri i pas, na mekim yau bilong ol i les long harim toktok na mekim ai bilong ol i no inap lukluk. Nogut ol i lukim wanpela samting na harim tok na save long as bilong tok, na ol i tanim bel na kam bek long mi na mi mekim ol i kamap orait gen.’ ” (Aisaia 6:​9, 10) Maski ol manmeri i no laik harim tok, Aisaia i no les kwik, em i wok long autim ol tok lukaut bilong Jehova long ol i go inap 46 yia! Pasin bilong i no les kwik bai helpim yumi tu long stap strong na wok long autim gutnius, maski planti manmeri i no laik harim.

14, 15. Taim Jeremaia i pilim bel hevi na ol man i mekim nogut long em, wanem samting i bin helpim em?

¹⁴ Taim ol profet i autim tok, ol man i no laik harim tok, tasol i no dispela samting tasol. Ol man i mekim nogut tru long ol tu. Ol i bin givim kanda long Jeremaia na putim em long haus kalabus, na putim em insait long wanpela hul bilong wara. (Jeremaia 20:2; 37:15; 38:6) Ol man i mekim nogut long em, em ol lain Jeremaia i laik helpim. Tasol Jeremaia i no bel nogut, na em i no bekim nogut long ol. Inap planti yia em i bin sanap strong na em i no les.

¹⁵ Pasin bilong tok bilas na mekim nogut long em i no bin pasim Jeremaia, na ol kain pasin olsem i no save pasim yumi long nau. Tru, sampela taim bai yumi pilim bel hevi. Jeremaia i bin pilim olsem. Em i bin tok: “Ol man i harim dispela tok na ol i save semim mi na tok nogut long mi oltaim. . . . Mi tok long mi yet long mi no ken tingting moa long yu [God], na mi no ken autim tok moa long nem bilong yu.” Tasol wanem samting i bin kamap? Jeremaia i no autim tok moa o olsem wanem? Em i tok moa olsem: “Mi pilim tok bilong yu i olsem wanpela bikpela paia i stap long bel bilong mi na i olsem paia i lait insait long ol bun bilong mi. Mi trai hat long pasim tok bilong yu, tasol mi no inap.” (Jeremaia 20:​8, 9) Tingim, taim em i tingting long ol tok bilas ol manmeri i mekim, amamas bilong em i pinis. Tasol taim em i tingting long ol gutpela tok em i autim long ol, dispela i bin kirapim gen amamas bilong em. Na tu, Jehova i bin sambai long Jeremaia olsem “wanpela strongpela soldia,” na em i bin strongim em long givim bel long autim tok bilong God na no ken pret.​—Jeremaia 20:11.

16. Wanem samting inap helpim yumi long amamas long autim gutnius?

¹⁶ Yu ting profet Jeremaia i bin kisim amamas long wok em i mekim? Yes! Em i tokim Jehova olsem: “Yu bin givim tok bilong yu long mi na mi kisim, olsem man i kisim kaikai. Na dispela tok bilong yu i mekim mi i amamas na belgut tru, long wanem, mi bilong yu, God Bikpela I Gat Olgeta Strong.” (Jeremaia 15:16) Jeremaia i bin amamas tru long stap olsem mausman bilong God tru na autim tok bilong em. Yumi tu i ken amamas. Na tu, yumi ken amamas wantaim ol ensel long heven, long wanem, planti manmeri long olgeta hap i bin harim tok bilong Kingdom, ol i tanim bel, na ol i bihainim rot i go long laip oltaim.​—Luk 15:10.

Jop i Strongim Bel na Karim Hevi

17, 18. Olsem wanem Jop i bin sanap strong na karim hevi? Wanem samting i kamap long dispela?

¹⁷ Disaipel Jems i bin stori long ol profet bilong bipo, na bihain em i tok: “Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em.” (Jems 5:11) Tok Grik hia ol i tanim olsem “strongim bel na karim hevi” i no wankain long tok Grik Jems i kolim long ves 10. Wanpela saveman i stori long olsem wanem tupela tok i no wankain, na em i tok: “Tok i kamap pastaim (long ves 10) i stori long pasin bilong strongim bel na karim hevi taim wanpela man i mekim nogut long yumi, na narapela tok (long ves 11) i makim pasin bilong strongim bel na karim hevi taim ol hevi i painim yumi long sindaun bilong yumi.”

¹⁸ Bikpela hevi tru i bin painim Jop. Olgeta mani kago i lus, ol pikinini bilong em i dai, na em i kisim bikpela sik. Na tu, em i tingting planti long tok giaman bilong ol narapela, olsem Jehova i givim strafe long em. Jop i no pasim maus, em i tokaut long ol dispela hevi i painim em; em i krai sori long sindaun bilong em na em i mekim tok olsem pasin bilong em i stretpela moa, winim God. (Jop 35:2) Tasol em i no lusim bilip, em i stap gut long God. Em i no tok nogutim God olsem Satan i tok em bai mekim. (Jop 1:​11, 21) Wanem samting i bin kamap? Jehova “i mekim gut moa yet long Jop. Na las hap bilong laip bilong en i winim tru ol yia em i bin i stap bipo.” (Jop 42:12) Jehova i oraitim sik bilong Jop, dabolim ol mani kago bilong em, na em i amamas wantaim famili bilong em inap planti yia. Pasin bilong Jop long strongim bel na karim hevi i bin helpim em long kliagut moa long pasin bilong Jehova.

19. Yumi kisim wanem save long pasin bilong Jop long sanap strong na karim hevi?

¹⁹ Yumi kisim wanem skul long pasin bilong Jop long sanap strong na karim hevi? Olsem Jop, sampela taim sik o ol narapela hevi inap painim yumi. Ating yumi no kliagut long as na Jehova i larim wanpela traim i painim yumi. Tasol wanpela samting yumi ken save tru long en i olsem: Sapos yumi stap gut long Jehova, bai yumi kisim blesing. Jehova i save mekim gut tru long ol man i wok long painim em. (Hibru 11:6) Jisas i tok: “Ol manmeri i stap strong inap long las de, God bai i kisim bek ol.”​—Matyu 10:22; 24:13.

“De Bilong Bikpela Bai i Kamap”

20. Bilong wanem yumi ken bilip tru olsem de bilong Bikpela bai i kamap?

²⁰ Tru, Jehova i no save les kwik long ol man, tasol em i no inap larim pasin nogut i stap oltaim. Pasin bilong em long i no les kwik i gat mak bilong en. Pita i tok: “Ol manmeri bilong bipo tu, ol i bin givim baksait long God, na em i no larim ol.” Noa na famili bilong em ol i bin abrusim bagarap, tasol bikpela tait wara i bin bagarapim ol man nogut. Na tu, Jehova i bin givim strafe long Sodom na Gomora, tupela taun i paia olgeta. Dispela tupela bagarap i makim samting i mas painim ol man nogut. Samting yumi save tru tru bai kamap i olsem: “De bilong Bikpela bai i kamap.”​—2 Pita 2:​5, 6; 3:10.

21. Yumi ken mekim wanem bilong kamapim pasin bilong yumi long sanap strong na i no ken les kwik? Bai yumi skelim wanem samting long stadi i kamap bihain?

²¹ Olsem na yumi laik bihainim pasin bilong Jehova long i no ken les kwik long man na wok long helpim ol narapela long tanim bel na bai God i ken kisim bek ol. Yumi laik bihainim pasin bilong ol profet na no ken les kwik long autim gutnius maski ol man i no laik harim. Na tu, sapos yumi sanap strong na karim hevi olsem Jop i bin mekim na stap gut long God, orait yumi save Jehova bai mekim gut long yumi. I gat as tru na yumi amamas long wok autim tok bilong yumi taim yumi luksave long ol gutpela samting Jehova i bin mekim long hatwok bilong ol lain bilong em long autim gutnius long olgeta hap. Bai yumi skelim dispela samting long stadi i kamap bihain long dispela.

Yu Inap Tingim?

• Wanem as na Jehova i no save les kwik long ol man?

• Yumi kisim wanem save long pasin bilong ol profet long i no les kwik?

• Olsem wanem Jop i bin sanap strong na karim hevi? Wanem samting i kamap long dispela?

• Olsem wanem yumi save pasin bilong Jehova long i no les kwik i gat mak bilong en?

[Piksa long pes 18]

Pasin bilong Jisas long i no les kwik i wankain stret olsem pasin bilong Papa bilong em

[Ol Piksa long pes 20]

Jeremaia i bin sanap strong na em i no les, olsem na Jehova i bin mekim wanem long em?

[Ol Piksa long pes 21]

Jop i bin sanap strong na karim hevi, olsem na Jehova i bin mekim wanem long em?