Strongpela Skin—Painim Nupela Rot?
Ol tok bilong strongpela skin, olsem no ken sik tumas, em i nambawan bikpela samting long planti man. Sampela taim i olsem olgeta wan wan dokta i gat narapela narapela tingting long dispela samting. Nius Kirap! i no tok wanpela samting bilong stretim sik i winim narapela samting, nogat; tasol long ol dispela stori, mipela laik toktok long pasin bilong mekim wok long ol marasin samting i narapela kain long marasin bilong ol dokta, em planti man nau ol i wok long kisim. Taim mipela i mekim olsem, i no olsem mipela i tok orait long ol dispela marasin, o ol narapela marasin, nogat. I gat planti kain samting bilong stretim sik em mipela i no stori long en—sampela, planti man i laikim; na sampela, ol man i tok pait long en. Mipela i ting olsem sapos yu kisim save long kain kain rot bilong daunim sik, dispela bai helpim yu, tasol samting yu laik mekim, em samting bilong yu yet.
OLGETA man i laik stap strong long skin. Tasol planti man i gat sik, olsem na yumi save, strongpela skin, olsem no ken sik tumas, em i hatwok long kisim. Sampela man i ting olsem planti man moa long nau ol i gat sik, winim olgeta taim bipo.
Bilong daunim sik, planti dokta i tokim sikman long kisim marasin ol kampani i bin wokim na ol i strong long maketim. Nau long dispela taim, planti man moa yet i save baim marasin ol kampani i wokim. Inap olsem 30 yia i go pinis, ol man i save tromoi 12 bilion dola tasol long olgeta yia bilong baim marasin, tasol nau, ol i save tromoi planti handet bilion dola long olgeta wan wan yia. Orait wanem samting i bin kamap long dispela?
Marasin dokta i raitim pepa bilong kisim i bin helpim planti man. Tasol sik bilong sampela man i kisim marasin em i stap yet, o em i go bikpela. Olsem na sampela i bin kirap na kisim marasin samting i narapela kain long marasin bilong ol dokta.
Samting Ol i Kisim
Long ol hap ol man i save kisim marasin bilong ol dokta, planti man i kirap nau na kisim dispela narapela kain marasin. Nius Consumer Reports bilong Me 2000 i tok: ‘Inap longtaim pinis, samting olsem traipela banis i bin stap namel long marasin bilong ol dokta na ol narapela kain marasin. Tasol nau i luk olsem dispela banis i wok long pundaun.’
Wanpela nius bilong Novemba 11, 1998, i tok: ‘Long planti skul bilong lainim man long mekim wok dokta, ol i no skulim ol long dispela narapela kain marasin bilong stretim sik, na long planti haus sik long Amerika, ol man i no inap kisim dispela narapela kain marasin, tasol ol lain bilong televisen na nius, na ol dokta, na ol lain bilong gavman, na ol man nating, ol i gat bikpela laik long kisim save long dispela narapela kain marasin.’—The Journal of the American Medical Association (JAMA).
Tasol long 1997, wanpela nius i tok: ‘Bipo ol dokta i gat tupela tingting long ol dispela narapela kain marasin, tasol nau long Amerika, long 27 skul [nau 75] bilong lainim man long kamap dokta, i gat wanpela kos bilong lainim ol long dispela narapela kain marasin. Sampela skul i olsem: Havat, Stanfot, Yunivesiti Bilong Arisona, na Yel.’—Journal of Managed Care Pharmacy.
Nius JAMA i stori long samting planti sikman i save mekim bilong daunim sik bilong ol. Nius i tok: ‘Long 1990, long olgeta 5-pela 5-pela man i save go lukim dokta bilong stretim sik bilong ol, wanpela i save mekim wok long narapela kain samting tu bilong stretim sik. Long 1997, planti moa, olsem wanpela long olgeta 3-pela 3-pela ol i bin mekim olsem.’ Nius i tok moa: ‘Ol i skelim ol man long ol narapela kantri, na ol i kisim save olsem planti man long ol kantri i gat planti wok bisnis, ol i laikim dispela narapela kain marasin.’
Nius JAMA i tok, taim ol i skelim hamas man long ol dispela kantri i kisim dispela narapela kain marasin insait long wanpela yia, ol i kisim save olsem i gat 15 pesen long Kanada, 33 pesen long Finlan, na 49 pesen long Ostrelia. JAMA i tok: ‘Planti man tru i laik kisim dispela narapela kain marasin.’ Em samting yumi mas tingim, long wanem, mani bilong insurens i no save baim dispela narapela kain marasin—wan wan taim tasol. JAMA i pinisim tok olsem: ‘Sapos bihain i gat sampela moa kain marasin em insurens bai baim, ating namba bilong ol man i kisim dispela narapela kain marasin bai go antap.’
Long planti kantri, inap longtaim pinis ol i bin mekim wok long marasin bilong dokta wantaim dispela narapela kain marasin. Dokta Peter Fisher (bilong Royal London Homeopathic Hospital) i tok: ‘Long planti hap, ol i save mekim wok long dispela narapela kain marasin. Nau i no gat tupela kain marasin—marasin bilong dokta na dispela narapela kain marasin. I gat gutpela marasin na marasin i nogut, na em tasol.’
Olsem na planti dokta long nau ol i luksave olsem marasin bilong dokta na dispela narapela kain marasin, tupela i gutpela. Ol i no strong long sikman i kisim wanpela kain marasin tasol. Ol i laik bai sikman i kisim wanem wanem samting em inap stretim gut sik bilong em.
Orait wanem sampela bilong ol dispela marasin i narapela kain long marasin bilong ol dokta? Long wanem taim na long wanem hap ol man i bin kisim save long ol? Na i gat wanem as na planti man i save mekim wok long ol dispela narapela kain marasin?