Olsem Wanem Olgeta Lain Bai Kamap Wanbel
OL MAN i bin wok long bosim dispela graun, tasol wok bilong ol i no kamap gutpela. Ating bai yu wanbel wantaim tok bilong Baibel olsem: “Sampela bikman i wok long daunim ol arapela manmeri na mekim nogut long ol.” (Saveman 8:9) Bilong wanem ol man i no inap bosim gut graun?
Baibel i kamapim as bilong dispela samting: “Mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Tru tumas, i no stret man i bosim em yet o ol narapela man. Dispela i wok bilong Man bilong wokim yumi, God Jehova. Baibel i tok: “Bikpela yet bai i stap king bilong yumi na em yet bai i givim ol lo long yumi na bosim yumi.”—Aisaia 33:22.
Sapos olgeta man i laik i stap aninit long Jehova olsem King bilong ol, em nau, olgeta man bilong graun bai stap wanbel. Tasol yu ting dispela samting inap kamap? Bipo tru wanpela profet bilong God em i stori long “wanpela taim bai i kamap bihain,” na planti manmeri bai tingting long Jehova i mas skulim ol.
Pasin Sekan Long Olgeta Hap
Profet Aisaia i tok: “Wanpela taim bai i kamap bihain na dispela maunten, haus bilong Bikpela i sanap long en, em bai i stap antap tru na i winim olgeta arapela maunten. Na olgeta lain manmeri bai i kam bung long en. Ol lain manmeri . . . bai i tok olsem, ‘Kam, yumi go long . . . maunten bilong Bikpela . . . bilong em i ken skulim yumi long ol pasin em i laik yumi mekim.’ ” Taim yumi kaunim sampela ves moa yumi kisim save long ol samting bai kamap taim Jehova i skulim yumi. Olsem: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.”—Aisaia 2:2-4.
Tru tumas, sapos ol man i bihainim tok God i skulim ol long en, pait bai pinis, maski em pait namel long kain kain lain o ol bikpela pait. Ol bikman i ting ol inap truim dispela tok profet bilong Baibel na laspela tok bilong en, ol i bin raitim long banis bilong Yunaitet Nesen. Tasol pasin birua na pait namel long kain kain lain i stap yet na i go bikpela moa. Olsem na bai yu tok, tok profet bilong God i lus?
Nogat. Dispela tok i stret. Long nau planti manmeri bilong olgeta lain i go long haus bilong Jehova na larim em i skulim ol. Na truim bilong dispela tok profet i bin kamap ples klia long ol “God i Skulim Yumi” Kibung bilong ol Witnes Bilong Jehova long 1993! Ol Witnes i stap olsem lain brata long olgeta hap na ol i no larim wanpela samting, olsem kala bilong skin o kantri o lain, i kirapim ol long birua o kilim i dai brata bilong ol. I olsem dispela lain i paitim pinis bainat bilong ol i kamap olsem ol ain bilong brukim graun, na ol i paitim pinis ol spia bilong ol i kamap olsem ol naip.
Tasol ating wanpela bai tok: ‘Tasol i no olgeta man i laik bihainim tok bilong God long narapela i mas laikim narapela.’ Tru, tasol God i gat strong long rausim olgeta man i no laik bihainim laik bilong em.
Samting God Bai Mekim
Yu save beten olsem Jisas i lainim ol disaipel bilong em long beten? “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:9, 10) Sapos yu beten olsem, orait, yu ken save Papa bilong yumi long heven bai harim beten bilong yu. Em bai harim olsem wanem?
God i makim pinis Pikinini bilong em long stap “King bilong kamapim gutpela sindaun na bel isi,” na em bai bosim gavman bilong God, em dispela Kingdom Jisas i lainim yumi long beten long en. (Aisaia 9:6) Yumi mas i gat strongpela King olsem, long wanem, em tasol inap pinisim ol tingting nogut Satan na ol spirit nogut bilong em i save givim long ol man. Maski ol man i gat laik tru long stretim ol samting, ol i no inap mekim.—1 Jon 3:8; KTH 12:7-12.
Tasol wanem samting bai painim ol gavman i no laik daun long God? Narapela tok profet bilong Baibel i stori long dispela Kingdom Jisas i lainim yumi long beten long en, olsem: “God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong [God] bai i stap oltaim.” Olsem na taim yumi beten long Kingdom bilong God i mas i kam, yumi beten long wanpela gavman bilong bosim olgeta hap bilong graun. Na dispela gavman bai stap long han bilong “King bilong kamapim gutpela sindaun na bel isi.”—Daniel 2:44; Aisaia 9:6.
Bihain taim olgeta manmeri i stap wanbel na sindaun gut aninit long Kingdom bilong God, narapela bai laikim narapela maski ol i bilong kain kain skin na lain. Man! Em bai gutpela taim tru, a? (KTH 21:3, 4) Dispela kain pasin i stap pinis long lain Witnes Bilong Jehova, na mipela i laik bai yu bung wantaim ol na save long dispela samting. Na bihain yu ken amamas wantaim ol na wetim taim olgeta lain man bai stap wanbel na sindaun gut wantaim.
[Piksa long pes 15]
Kingdom bilong God bai helpim olgeta man long stap wanbel na sindaun gut wantaim