Baibel i Tok Wanem?

Wanem Kain Pasin Long Katim Marit God i Nolaik Tru Long En?

MAN bilong wanpela meri Kristen i bin pamuk. Meri i tok: ‘Taim mi katim marit mi kisim planti hevi. I hatwok long lain long nupela sindaun. Mi mas stretim tingting na bel bilong mi. Na sindaun bilong mi long mani na ol samting bilong spirit, em tu i senis. Mi bin tingting planti​—Jehova bai blesim samting mi bin mekim, long wanem, mi save Baibel i tok, Jehova i nolaik tru long pasin bilong katim marit.’

Taim marit i bruk, ol hevi i no pinis, nau ol nupela hevi i kamap​—tingting bilong man o meri i no stap isi, na em i pilim olsem em i stap wanpis olgeta, na bel i kotim em. Na sapos tupela i gat pikinini, kot bai tok husat bai holim pikinini. Pikinini bai pret na krai nogut long papa o mama. Na planti hevi long mani samting bai kamap. Na i hatwok tru long daunim bel taim bel i kirap na i strong long mekim maritpasin.

Na yumi mas pilim tingting bilong Jehova. Baibel i tok, God i “no laikim tru pasin bilong brukim marit.” (Malakai 2:16) Olsem wanem? Dispela tok i makim olsem God i no save laikim olgeta pasin bilong katim marit? Kristen i mas ting em i mekim rong sapos em i katim marit taim poroman bilong em i pamuk? Bilong kisim bekim yumi ken tingim ol samting i kamap long taim bilong Malakai na i kirapim God long tok, em i nolaik tru long pasin bilong katim marit.

‘No Ken Tru Mekim Pasin Nogut’

Malakai i autim tok profet bilong em bihain long yia 443 paslain long Krais, em klostu 100 yia bihain long ol Juda i lusim kalabus long Babilon. Ol Juda i mekim pasin nogut tru na ol pris i mekim moa yet ol pasin nogut. (Malakai 2:​7-9) Planti Israel i mekim tok giaman, bagarapim marit, paulim mani samting, na mekim hatpela pasin long narapela man. (Malakai 3:5) Ol dispela pasin nogut i mekim na sampela i bin tok: “Yumi lotu long God na God i no helpim yumi.”​—Malakai 3:14.

Long taim bilong Malakai ol man i no bihainim moa stretpela pasin o givim bel long lotu, olsem na yumi save ol i no tingting tumas long marit bilong ol i mas i stap gut. Ating planti Israel i rausim meri bilong ol, long wanem, ol i laik kisim ol yangpela meri haiden. Olsem na meri tru bilong ol i bin go long haus lotu bilong Jehova na krai nogut tru. Aiwara bilong ol i kapsait antap long alta bilong Jehova.​—Malakai 2:​13-15.

Jehova i ting olsem wanem long pasin bilong ol long katim marit? Malakai i tok: “Yupela i mas lukaut gut bai yupela i no brukim promis yupela i bin mekim wantaim ol meri bilong yupela taim yupela i marit. God . . . i tok olsem, ‘Mi no laikim tru pasin bilong brukim marit. . . . Yupela i mas lukaut gut long laip bilong yupela, na no ken tru mekim pasin bilong trikim na giamanim ol arapela.’ ” (Malakai 2:​15, 16) Wanpela buk (Theological Wordbook of the Old Testament) i tok: Long tok Hibru dispela tok, “trikim na giamanim” i olsem “giamanim o i no stap gut long narapela.” Long sampela Baibel, Song 59:5 i kolim dispela tok Hibru olsem “man i no stap gut long narapela.”

Taim yumi tingim ol dispela samting i kamap bipo long lain Israel, em i helpim yumi long save gut long tok bilong Jehova long Malakai 2:16: “Mi no laikim tru pasin bilong brukim marit.” Jehova i nolaik tru long pasin bilong rausim poroman na maritim narapela. Olsem: Man i pamuk na bihain em i katim marit maski meri bilong em i laik lusim tingting long rong bilong em, o em i subim meri long katim marit inap long em i ken maritim narapela, dispela man i save mekim pasin nogut tru long poroman tru bilong em. Dispela kain pasin em i mekim long poroman i bikpela rong long ai bilong God. Man i save amamas wantaim meri bilong em taim em i yangpela yet na bihain taim meri i go lapun liklik em i rausim em bilong painim amamas wantaim narapela poroman, em i man nogut tru.a

Tasol olsem wanem long poroman i no gat asua na em i laik katim marit? God i nolaik tru long dispela kain pasin tu?

Pasin God Yet i Mekim

Olsem wanem? God inap pilim bikpela traim i painim poroman i no gat asua, taim em i gat tupela tingting long katim marit? Baibel i tok piksa long Jehova olsem em i “man” bilong lain Israel bilong bipo, long wanem, em i bin wokim kontrak wantaim ol. (Aisaia 54:​1, 5, 6; 62:​1-6; Jeremaia 31:​31, 32) Olsem man marit, Jehova i bin stap gut long dispela lain, em i no givim bel long narapela lain. (Song 147:​19, 20; Amos 3:​1, 2) Tasol olsem wanem long lain Israel? Ol i bin stap olsem wanem kain meri?

Planti taim Israel i bikhet na sakim tok bilong kontrak. Na bihain ol i go nogut olgeta olsem beten bilong Daniel i kamapim. Daniel 9:​5, 6 i tok: “Mipela i bin mekim sin na mekim rong long yu. Mipela i bin sakim tok bilong yu, na mipela i no mekim ol gutpela na stretpela pasin yu bin tokim mipela long mekim. Mipela i no harim tok bilong ol wokman bilong yu, em ol profet. Ol i bin autim tok bilong yu long ol king na ol hetman na ol tumbuna na long olgeta manmeri bilong mipela.” Long ai bilong Jehova dispela ol pasin nogut ol i mekim i olsem pasin pamuk meri marit i mekim taim em i prenim narapela man.​—Jeremaia 3:1.

Inap planti handet yia Jehova i karim hevi na em i no les long lain Israel. Tasol bihain em i mekim wanem? Jehova i givim strafe long ol. Pastaim em i rausim ol lain bilong not i go kalabus long narapela hap, na bihain em i rausim ol lain bilong saut i go kalabus. (Jeremaia 3:8; Daniel 9:​11, 12) Olsem na taim yumi tingim ol samting Jehova i bin mekim, yumi save Jehova i no bel nogut long poroman i no gat asua i katim marit, long wanem, poroman bilong em i no bin stap gut long tok promis ol i mekim taim ol i marit.

Marit i samting holi long Jehova na ol marit i mas tingim gut ol tok promis bilong marit. (Hibru 13:4) Tasol sapos poroman marit i brukim tok promis na em i pamuk, God i orait long poroman i no gat asua long tingim wanem samting em i laik mekim​—em i laik lusim tingting long rong bilong poroman o em i laik katim marit​—laik bilong em. (Matyu 19:9) Em bikpela samting poroman i no gat asua i mas tingim. Narapela i no ken tokim em long samting em i mas mekim. Sapos em i laik katim marit, em i no ken tingting planti. Tingim: I no olsem Jehova i nolaik tru long olgeta pasin bilong katim marit. Nogat. Pasin Jehova i no laikim, em pasin i save kalapim lo bilong Baibel taim wanpela i rausim poroman bilong inapim laik bilong em long maritim narapela.b

[Ol Futnot]

[Piksa Kredit Lain long pes 20]

Historic Costume in Pictures/Dover Publications, Inc., New York