Bung Bilong Ol Samting Ol i Wokim Long Ais Long Saporo
Wanpela man long Japan i raitim dispela stori bilong Kirap!
LONG taim bilong kol, ais i save karamapim graun long biktaun Saporo long noten Japan. Olsem na inap 5-pela mun samting ol man bilong taun i no inap mekim planti samting bilong painim amamas. Olsem na kaunsil i bin pasim tok long wokim wanpela bung i gat ol bikpela piksa ol i sapim long ais olsem pes bilong man samting.
Long 1950 ol man i helpim sampela sumatin bilong haiskul long sapim 6-pela piksa ais, bikpela bilong ol i olsem 3 mita samting. Inap 50,000 manmeri i kam lukim ol dispela bikpela piksa, nem bilong wanpela em “Venus de Milo.” Olsem na taim Yuki Matsuri (Bung Bilong Ol Samting Ol i Wokim Long Ais) i kirap ol man i amamas long en.
Inap planti yia nau ol i sapim planti piksa ais na planti man i amamas long kam lukim. Long olgeta yia inap 2 milion turis, em planti bilong ol i kam long ol narapela kantri, ol i kirap nogut tru taim ol i lukim ol planti handet piksa ais. Dispela bung i no bilong lotu na em i stap inap 7-pela de na i no gat planti narapela bung i save kamap long Japan long taim bilong kol olsem dispela bung.
Raun Lukim Ol Samting
I gat 3-pela ples bung, na Odori Pak namel long Saporo i nambawan bilong ol. Bipo Odori Pak i ples bilong tromoi pipia ais. Mak bilong en i olsem mak bilong 11-pela blok long wanpela biktaun. Long Odori Pak na long Makomanai klostu, ol man inap lukim ol nambawan bikpela piksa ais. Sampela i makim ol piksa komik long televisen o long ol buk komik, em ol pikinini i save laikim. Ol pikinini i kirap nogut long lukim ol dispela samting ol i bin sapim long ais. Wanpela em Supaman ol manki i amamas long makim taim ol i pilai. Narapela em pikinini Chibi Maruko-chan na ol pren bilong em. Planti pikinini i amamas long lukim Chibi Maruko-chan long televisen.
Na samting i pulim ai bilong ol man em wanpela haus singsing ol i bin sapim long ais na mak bilong en i wankain long bikpela haus singsing long Paris. Ol i bin sapim bilas bilong ol banis bilong en na antap long rup ol man bilong wokim musik i stap, em ol i sapim long ais tu. Na ol i bin sapim Diet House bilong Jemani. Na i no hatwok long ol man i save long bikpela haus Arabian Castle bilong Aladin, em man i gat wanpela lam majik.
Na long Sitisen Skwea i gat sampela piksa ais ol i no bikpela tumas. Planti ol i save makim sampela bikpela samting i bin kamap, olsem: Taim ol man i lukim piksa ais bilong Brandenbek Get, ol inap tingim taim Is na Wes Jemani i kamap wanpela kantri. Sampela piksa ais i makim tingting bilong planti man, ol i tingting planti long ol samting i wok long bagarap nau long graun olsem win, wara, ol animal.
Na long Odori Pak i gat wanpela hap ol i kolim Intenesenel Skwea. Ol tim bilong planti kantri i kam long hia bilong resis long sapim ol samting long ais. Sampela ol i wok mani long sapim ol samting long ston o diwai. Ol wan wan tim i save kisim hap ais i strong pinis na em inap olsem 3-pela mita. Ol i mas sapim samting ol i tok pinis ol bai sapim, na ol i mas pinisim insait long 3-pela de.
Tasol olsem wanem ol man inap sapim ol dispela traipela piksa ais na ol mak bilong en i stret tru?
Rot Bilong Wokim
Ol i hatwok tru long sapim wanpela traipela piksa ais. Klostu wanpela mun ol bai wokim. Tasol sapos wanpela man i sapim, em bai wok 1,500 de samting. Wanpela tim i bin wokim Flindes Strit Stesen long Melbon, Ostrelia. Longpela bilong en i olsem 35 mita; braitpela, 35 mita; bikpela, 15 mita. Ol i mas kisim 7,000 ton ais bilong wokim, olsem na wanpela trak bilong karim 5-pela ton ais i mas go i kam 1,400 taim. Em bikpela wok tru, olsem na kirap long 1955 ol ami Japan na ol paiaman, ol tasol i mekim bikpela hap wok bilong sapim kain samting olsem. Orait, yumi laik save long dispela bikpela wok bilong ol.
Pastaim ol i mas tingim wanem samting ol bai wokim, na ol bai bungim ol piksa na save long en. Bihain ol bai wokim piksa bilong en long strongpela graun o pepa samting. Wanpela mun paslain long dispela bung ol i bungim klinpela ais. Ol i pulimapim ais long wanpela traipela bokis plang na ais i save go strong taim ol i kapsaitim wara long en. Bihain ol i rausim bokis plang. Nau ol i sanapim sampela plang bilong ol man i ken sanap long en na wok.
Planti taim ol i wok nait na em i kol nogut tru. Taim ol i kirap nupela long sapim piksa ol i mekim wok long akis na savol, na bihain ol i mekim wok long ol liklik tul bilong wokim gut olgeta mak bilong en.
Planti man i ken insait long dispela amamas—olgeta wan wan o ol grup. Ol i kamautim nem bilong ol long wanpela samting olsem laki-tiket bilong makim husat i ken insait long dispela samting. Long olgeta wan handet wan handet man, ol saveman long wokim piksa ais i save helpim 30. Olgeta wan wan man bai kisim hap ais, bikpela bilong en i olsem 2 mita, bilong wokim piksa bilong em.
Samting Bilong Pulim Ol Man
Ol i save wokim ol nambawan piksa long ais tru tru. Planti man i save wokim, ol i insait long klap Ice Carvers Union. Planti bilong ol, ol i man bilong kukim na bilasim kaikai long ol bikpela hotel. Ol i amamas tru long kam long Saporo na kamapim save bilong ol.
Na long dispela bung bilong ais ol i pilaim musik, na danis, na mekim planti samting moa bilong amamas. Namel long ol piksa ais ol i bin wokim wanpela samting ol pikinini i amamas long pilai long en. Ol i go antap long en; sindaun; taitim lek na sut i kam daun.
Nait i gutpela taim bilong raun lukim ol piksa ais, long wanem, i gat planti planti liklik lait long ol diwai i no gat lip na ol i hangamap i stap. Sampela lait i waitpela na sampela i gat kala kala. Na taim ol lait i holim ol piksa ais, ol piksa i lait tru. Man! Sapos yu lukim dispela kain samting, yu bai kirap nogut tru long ol samting ol man inap tingim na wokim long han bilong ol, em ol samting God yet i bin givim long man.
[Ol Piksa long pes 23]
Braitpela bilong sampela traipela piksa ais olsem dispela daunbilo i olsem 35 mita. Bikpela bilong en i olsem 15 mita. Ol man i mas kisim 7,000 ton ais bilong wokim kain piksa olsem