Baibel i Tok Wanem?

Aposel Pol i Daunim Ol Meri?

WANPELA meri, em Jas Cecilie Rushton bilong Oklan, Nu Silan, em i mekim tok long wanpela ripot olsem: ‘Planti taim ol misin Kristen i mekim wok long ol tok bilong Pol bilong daunim ol meri insait long misin.’ Ripot bilong dispela jas meri i bin kamap long kibung Komonwel Lo Konferens long Saiprus long 1993. Em i tok moa olsem: ‘Pas Pol i raitim long Timoti i save kamapim tingting bilong em olsem: “Mi no save larim ol meri i bosim ol man na i skulim ol long tok bilong God. Nogat. Ol meri i mas pasim maus na harim tok tasol.” ’​—1 Timoti 2:12.

Taim Pol i stori long wok bilong ol meri, em tingting bilong em yet o tok bilong em i kam long God? Taim yumi tingim olgeta pas Pol i raitim, tru Pol i bin daunim ol meri? Wanem insait bilong dispela tok Pol i givim long Timoti antap hia?

Bikpela Wok Bilong Pol

Nupela Testamen i gat 27 buk na Pol i bin raitim 14 bilong ol. Yumi save spirit holi i stap wantaim Pol, long wanem, em inap mekim tok long planti kain kain tok ples. Na tu, God i givim ol driman long em. (1 Korin 14:18; 2 Korin 12:​1-5) Pol i no tingim em yet, nogat; em i daunim laik bilong em, na givim bel olgeta long wok em i mekim, na em i laikim tumas ol narapela Kristen na pren gut wantaim ol. (Aposel 20:​37, 38) Ol tok Pol i raitim, na ol tok em i mekim long ol meri tu, “spirit bilong God yet” i bin kamapim, na “dispela tok em i gutpela samting tru bilong skulim yumi.”​—2 Timoti 3:16.

Ol Meri Pol i Stori Long Ol

Long ol pas Pol i raitim yumi ken save Pol i tingim ol meri. Planti taim em i stori long bikpela wok ol i mekim insait long kongrigesen na famili. Long wanpela pas bilong em, Pol i tok, wasman Kristen i mas mekim ol gutpela pasin olsem meri i givim susu long pikinini i save mekim.​—1 Tesalonaika 2:7.

Aposel Pol i save kolim nem bilong planti susa Kristen bilong em na ol gutpela pasin bilong ol. Taim em i givim gude long ol Kristen long kongrigesen long Rom, em i kolim nem bilong sampela meri ol i “hatwok long mekim wok bilong Bikpela.” (Rom 16:12) Taim em i stori long Yuodia na Sintike, em i strongim ol brata long Filipai olsem: “Helpim dispela tupela meri . . . i bin poroman gut wantaim mi long wok bilong autim gutnius.” (Filipai 4:3) Long pas em i raitim long Timoti, Pol i kamapim strongpela bilip bilong tumbuna bilong yangpela man Timoti, em Lois, na mama bilong em, Yunis.​—2 Timoti 1:5.

Na olsem wanem long ol susa Kristen bilong Pol? Ol i bin ting olsem wanem long em? Pol i pilim tru gutpela pasin bilong Akwila wantaim meri bilong em Prisila. Pol i pren gut wantaim tupela marit. Na wanpela taim “tupela i bin redi long i dai bilong helpim [em].”​—Rom 16:​3, 4.

Daunim Ol Meri?

Baibel i tok: “No ken krosim ol lapun man. Nogat. Yu mas stretim ol long tok isi, olsem yu stretim papa bilong yu. Na yu mas mekim wankain pasin long ol yangpela man olsem yu save mekim long ol brata bilong yu yet. Na yu mas mekim wankain pasin long ol lapun meri olsem yu save mekim long ol mama bilong yu. Na yu mas mekim wankain pasin long ol yangpela meri olsem yu save mekim long ol susa bilong yu, em long pasin i klin tru long ai bilong God.” (1 Timoti 5:​1, 2) Olsem na dispela tok Pol i givim long Timoti i kamapim klia olsem Pol i save tingim gut ol meri. Maski em man o meri insait long kongrigesen Kristen, Pol i save givim biknem long em. Pol i tok: “I no gat ol Juda na ol Grik. I no gat ol wokboi nating na ol man i stap fri. I no gat ol man na ol meri. Nau long Krais Jisas yupela olgeta i stap wanpela tru.”​—Galesia 3:28.

Pol i stori long ol marit na wok God i makim bilong ol, olsem: “Yupela meri, yupela i mas aninit long ol man bilong yupela, olsem yupela i save aninit long Bikpela. Long wanem, man em i het bilong meri bilong en, olsem Krais em i het bilong sios. Sios em i bodi bilong Krais, na Krais i bin kisim bek em.” (Efesus 5:​22, 23; skelim wantaim 1 Korin 11:3.) Tru tumas, wok bilong man i narapela kain long wok bilong meri, tasol i no olsem man i nambawan na meri i nambatu, nogat. Wok bilong man i helpim meri na wok bilong meri i helpim man, na sapos tupela marit i wok strong long mekim wok bilong ol, famili bai stap gutpela. Na taim man i bosim meri bilong em, i no olsem em i ken mekim hatpela pasin long em o em i no inap sori liklik long em, nogat. Pol i tok moa olsem: “Yupela man, yupela i mas laikim tru ol meri bilong yupela, olsem yupela i save laikim bodi bilong yupela yet.” (Efesus 5:​28, 29) Na ol pikinini i mas harim tok bilong papa na mama.​—Efesus 6:​1, 2.

Na yumi mas tingim tok bilong Pol long ol samting bilong maritpasin. Pol i no tingim man o meri tasol taim em i tok: “Bodi bilong man i bilong meri bilong en, na man i no ken pasim. Olsem tasol, bodi bilong meri i bilong man bilong en, na meri tu i no ken pasim. Meri i no bos bilong bodi bilong em yet. Nogat. Man bilong en em i bos. Na olsem tasol, man i no bos bilong bodi bilong em yet. Nogat. Meri bilong en em i bos.”​—1 Korin 7:3, 4.

“Meri i Mas Pasim Maus”

Olsem wanem long tok bilong Pol long 1 Timoti 2:​12, em namba wan paragraf bilong dispela stori i kamapim, olsem ol meri i mas “pasim maus”? Pol i mekim dispela tok long wanem em i save daunim ol meri? Nogat! Dispela tok “pasim maus” i olsem man tasol i mas mekim wok tisa na skulim ol man insait long kongrigesen. Dispela i stret wantaim tok bilong God long meri i mas i stap olsem wanem long man.a

Tasol i no olsem ol meri i no inap skulim ol narapela long tok i tru. Pol i bin strongim ol lapun meri long “skulim” ol yangpela meri long “mekim gutpela pasin.” Olsem Yunis na Lois i skulim Timoti, ol mama Kristen i ken skulim pikinini bilong ol long ol pasin God i save laikim. (Taitus 2:​3-5; 2 Timoti 1:5) Long nau, long ol kongrigesen bilong ol Witnes Bilong Jehova, planti handet tausen meri Kristen i amamas long ol samting bilong spirit taim ol i bihainim pasin bilong Yuodia na Sintike long autim tok na helpim ol man na meri long kamap disaipel.​—Song 68:11; Matyu 28:19; Filipai 4:​2, 3.

Olsem na yu ting wanem? Taim yu skelim ol tok bilong Pol, yu ting i stret sapos ol man i tok Pol i birua long ol meri?

[Ol Futnot]