Man na Meri—Tupela Wantaim i Gat Gutpela Wok
GOD JEHOVA i bin wokim Adam pastaim, na bihain em i wokim Iv. Taim God i no wokim yet Iv, Adam i bin wok long kisim save long i stap bilong em hia long graun. Long dispela taim, Jehova i givim sampela tok long em. (Stat 2:15-20) Adam i stap olsem mausman bilong God, na ol tok God i givim long em, em i mas autim long meri bilong em. Olsem na i stret Adam bai go pas long ol samting bilong lotu.
Long kongrigesen Kristen i gat wanpela pasin i kain olsem dispela, na taim yumi skelim dispela pasin em inap helpim yumi. Aposel Pol i tok: “Mi no save larim ol meri i bosim ol man . . . Ol meri i mas pasim maus na harim tok tasol. Harim. God i wokim Adam pastaim, na bihain em i wokim Iv.” (1 Timoti 2:12, 13) Dispela i no makim olsem ol meri i mas pasim maus olgeta na ol i no inap mekim sampela tok long ol miting bilong kongrigesen Kristen. Nogat. Mining bilong dispela tok pasim maus i olsem em i no ken tok pait o tok resis wantaim wanpela man. Em i no ken rabisim wok man i holim, o traim long skulim kongrigesen. God i givim wok bilong lukautim na skulim kongrigesen long ol man, tasol ol meri i helpim gut ol miting taim ol i insait long ol samting i kamap long ol miting.
Aposel Pol i givim save long yumi long wok God i givim long ol man na ol meri, em i tok: “God i no bin wokim man long bodi bilong meri. Nogat. Em i wokim meri long bodi bilong man. . . . Tasol long lain bilong Bikpela, ol meri i no i stap ol yet, na ol man tu i no i stap ol yet. Nogat. Meri i stap helpim bilong man, na man i stap helpim bilong meri. Pastaim God i bin wokim meri long bodi bilong man, tasol nau man i save kamap long bodi bilong meri. Na God yet em i as bilong olgeta samting.”—1 Korin 11:8-12.
Ol Meri i Gat Gutpela Wok Bilong Mekim
Long Lo God i givim long lain Israel, ol meri i gat planti gutpela wok ol inap mekim na ol inap bihainim tingting bilong ol yet long mekim ol dispela wok. Olsem: Sindaun 31:10-31 i stori long marit “meri i gat gutpela pasin tru” na dispela meri i save kisim ol gutpela tret samting na wokim gutpela klos bilong famili bilong em. Na tu, em “i save samapim ol gutpela klos . . . na ol bisnisman i save kam baim”! (Sindaun 31 Ves 13, 21-24) “Olsem ol bikpela sip i save mekim,” dispela gutpela meri i save kisim planti kain kaikai, maski em i mas go longwe long painim. (Sindaun 31 Ves 14) “Hapmeri olsem i save lukluk gut pastaim long graun em i laik baim, na bihain em i baim. Na bihain, em i . . . baim ol yangpela diwai wain bilong planim.” (Sindaun 31 Ves 16) “Bisnis bilong en i go het gut,” olsem na em i kisim winmani. (Sindaun 31 Ves 18) Na tu, “em i lukautim ol samting long haus bilong en” yet. Dispela meri bilong wok na pret long Jehova i save helpim ol narapela husat i sot. (Sindaun 31 Ves 20, 27) Olsem na i gat as na ol i litimapim nem bilong em!—Sindaun 31 Ves 31.
Ol lo Jehova i givim long rot bilong Moses i helpim tru ol meri long kamap strong long ol samting bilong lotu. Olsem: Long Josua 8:35, Baibel i tok: “Josua i ritim olgeta tok bilong lo bilong Moses na olgeta man bilong Israel i harim. Na ol meri na ol pikinini na ol manmeri bilong ol arapela ples, ol tu i stap wantaim ol na ol i harim dispela tok.” Baibel i stori long pris Esra olsem: “Em i sanap na ritim dispela lo long ol manmeri long moningtaim tru i go inap long belo kaikai. Na ol i putim yau gut long tok bilong Esra. Na ol pikinini inap long putim yau gut na kisim save long tok, ol tu i stap long dispela bung.” (Nehemia 8:2, 3) Taim ol i ritim Lo olsem, dispela i helpim ol meri. Na tu, ol i save selebretim ol bikpela de bilong lotu. (Lo 12:12, 18; 16:11, 14) Na samting i bikpela moa, ol meri long Israel bilong bipo, ol yet i ken pas gut wantaim God Jehova na ol yet i ken prea long em.—1 Samuel 1:10.
Long taim bilong Jisas, ol meri i save pret long God ol i bin mekim ol samting bilong helpim Jisas. (Luk 8:1-3) Wanpela meri i bin kapsaitim wel long het na lek bilong Jisas taim em i kisim kaikai long Betani. (Matyu 26:6-13; Jon 12:1-7) Bihain long kirap bek bilong em, Jisas i bin kamap long sampela meri. (Matyu 28:1-10; Jon 20:1-18) Bihain long Jisas i go bek long heven, i gat 120 i bung wantaim na “ol meri, na Maria, em mama bilong Jisas” ol i insait long dispela lain. (Aposel 1:3-15) Yumi ken ting olsem planti o olgeta bilong ol dispela meri i bin bung i stap long rum antap long Jerusalem long de Pentikos 33 C.E., taim holi spirit i kam long ol na long rot bilong mirakel ol disaipel bilong Jisas i mekim kain kain tok ples.—Aposel 2:1-12.
Ol man na meri i bin insait long truim bilong tok bilong Joel 2:28, 29, em aposel Pita i kamapim long de Pentikos: “Bai mi [God] kapsaitim Spirit bilong mi long olgeta manmeri. Na ol pikinini man na pikinini meri bilong yupela bai i autim tok bilong mi olsem ol profet. . . . Na long dispela taim bai mi kapsaitim Spirit bilong mi long ol wokboi na ol wokmeri bilong mi.” (Aposel 2:13-18) Inap sampela haptaim bihain long Pentikos 33 C.E., ol meri Kristen i bin kisim ol gutpela presen bilong holi spirit. Ol i autim ol tok i tru bilong Baibel olsem ol profet na ol i mekim long kain kain tok ples.
Long pas aposel Pol i raitim long ol Kristen long Rom, em i tok olsem em i laik bai ol i mekim gut long “Fibi, dispela susa bilong yumi.” Na tu, em i kolim nem bilong Trifina na Trifosa, em tupela meri ‘i save wok hat long mekim wok bilong Bikpela.’ (Rom 16:1, 2, 12) Maski ol dispela meri i no holim sampela wok insait long kongrigesen Kristen bilong pastaim, ol wantaim planti arapela meri i kisim gutpela wok tru. Dispela wok em olsem: God i makim ol long wok wantaim Pikinini bilong em, Jisas Krais, long Kingdom long heven.—Rom 8:16, 17; Galesia 3:28, 29.
Ol meri long nau ol i gat wanpela gutpela wok tru long mekim! Song 68:11 i tok: “Bikpela i givim tok long ol manmeri bilong en, na planti meri i go autim dispela tok.” Yumi laik tok amamas long ol dispela meri. Ol i save skulim gut ol lain ol i mekim Baibel stadi wantaim na long dispela rot planti i wok long lainim ol tok i tru em God i amamas long en. I stret yumi litimapim nem bilong ol meri Kristen husat i marit na ol i helpim ol pikinini bilong ol long kamap Kristen na ol i sapotim ol man bilong ol, em ol i gat planti wok bilong mekim insait long kongrigesen. (Sindaun 31:10-12, 28) Na tu, God i makim ol gutpela wok ol meri singel i ken mekim. Na man Kristen i “mas mekim wankain pasin long ol lapun meri olsem [em i] save mekim long ol mama bilong [em]. Na [em i] mas mekim wankain pasin long ol yangpela meri olsem [em i] save mekim long ol susa bilong [em], em long pasin i klin tru long ai bilong God.”—1 Timoti 5:1, 2.
Man i Gat Kain Kain Wok
God i makim wok ol man Kristen i mas mekim na Em i laik bai ol man i mekim dispela wok. Pol i tok: “Mi laik bai yupela i save tu long narapela tok olsem. Het bilong olgeta man em Krais, na het bilong meri em man bilong en, na het bilong Krais em God.” (1 Korin 11:3) Man tu i gat het—em Krais. Tru tumas, Krais na God bai skelim ol samting man i mekim. Na God i laik bai man i bihainim pasin laikim taim em i stap olsem het bilong meri. (Efesus 5:25) Dispela laik bilong God i bin i stap, kirap long taim em i wokim man na i kam inap long nau.
Baibel i kamapim klia olsem God i bin givim wok long man i stret wantaim wok bos bilong man. Olsem: Jehova i bin tokim Noa long wokim sip bilong lukautim laip bilong famili bilong em long taim bilong Bikpela Tait. (Stat 6:9–7:24) God i bin promis long Abraham olsem long rot bilong tumbuna pikinini bilong em, olgeta lain pipel bai kisim blesing. Nambawan bilong dispela lain tumbuna pikinini em Krais Jisas. (Stat 12:3; 22:18, NW; Galesia 3:8-16) God i bin makim Moses long go pas long lain Israel na kisim ol i kam lusim Isip. (Kisim Bek 3:9, 10, 12, 18) Long rot bilong Moses Jehova i bin givim ol lo, em ol lo ol i kolim Lo Bilong Moses. (Kisim Bek 24:1-18) Na ol man tasol i bin raitim Baibel, no gat wanpela meri.
Jisas i stap Het bilong kongrigesen Kristen, na em i “givim ol presen long ol man.” (Efesus 1:22; 4:7-13) Taim Pol i kolim ol mak bilong winim bilong kamap wasman long kongrigesen, em i toktok long ol man tasol. (1 Timoti 3:1-7; Taitus 1:5-9) Olsem na long ol kongrigesen bilong ol Witnes Bilong Jehova, em ol man tasol i save mekim wok elda na kongrigesen sevan. (Filipai 1:1, 2; 1 Timoti 3:8-10, 12) Ol man tasol inap mekim wok wasman insait long kongrigesen Kristen. (1 Pita 5:1-4) Tasol olsem yumi stori pinis, ol meri i gat ol gutpela wok tru em God i givim ol long mekim.
Amamas Long Wok Ol i Mekim
Taim ol man na meri i inapim wok God i givim long ol, dispela i save kamapim bikpela amamas. Ol marit i stap amamas taim ol man na meri marit i wok long bihainim pasin bilong Krais na kongrigesen bilong em. Pol i tok: “Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios. . . . Dispela tok i tok tu long yupela man wan wan long yupela i mas laikim tru meri bilong yupela, olsem yupela i save laikim yupela yet.” (Efesus 5:25-33) Olsem na ol man marit i mas bihainim pasin laikim taim ol i mekim wok bos, ol i no ken tingim ol yet tasol. Ol man insait long kongrigesen bilong Krais ol i no gutpela olgeta. Tasol Jisas i laikim na lukautim ol. Long wankain pasin, man marit Kristen i mas laikim na lukautim meri bilong em.
Meri Kristen i “mas i stap aninit long man bilong en na mekim gutpela pasin long em.” (Efesus 5:33) Long dispela samting em inap bihainim gutpela piksa kongrigesen i makim. Efesus 5:21-24 i tok: “Yupela i mas ting long Krais em i Bikpela bilong yupela, na yupela wan wan i mas i stap aninit long ol arapela manmeri bilong God. Yupela meri, yupela i mas aninit long ol man bilong yupela, olsem yupela i save aninit long Bikpela. Long wanem, man em i het bilong meri bilong en, olsem Krais em i het bilong sios. Sios em i bodi bilong Krais, na Krais i bin kisim bek em. Sios em i stap aninit long Krais. Olsem tasol yupela meri tu, oltaim yupela i mas aninit long ol man bilong yupela.” Ating sampela taim meri i hatwok long daun long man bilong en, tasol em bai mekim, long wanem, “dispela pasin em i stret long ai bilong Bikpela.” (Kolosi 3:18) Em bai isi moa long daun long man bilong em taim em i tingim olsem Bikpela Jisas Krais i amamas long dispela kain pasin.
Maski man bilong em i no wanbilip, meri Kristen i mas daun yet long wok bos bilong em. Aposel Pita i tok: “Yupela maritmeri, yupela i mas aninit long ol man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i inap tanim bel, long wanem, ol i lukim yupela meri i save wokabaut stret na aninit tru long ol.” (1 Pita 3:1, 2) Sara, em i rispektim man bilong em, Abraham, na em i kisim gutpela wok tru, olsem em i karim Aisak na kamap tumbuna mama bilong Jisas Krais. (Hibru 11:11, 12; 1 Pita 3:5, 6) God bai mekim gut tru long ol maritmeri i save bihainim pasin bilong Sara.
Bel isi na pasin wanbel i save stap taim ol man na ol meri i mekim gut wok God i givim long ol. Dispela i save kamapim pasin bilong i stap belgut na amamas. Na tu, taim ol i bihainim ol tok bilong Baibel, dispela i givim biknem long ol long ol gutpela wok ol i mekim, em ol wok God i givim long ol.
[Blok long pes 7]
Tingting Bilong Ol Long Wok God i Givim Ol
Susan i tok: “Man bilong mi i save mekim wok bos bilong em long pasin laikim na gutpela pasin. Mipela i save toktok gut wantaim long ol disisen mipela i mas mekim. Na taim em i pasim tok long wanem samting mipela bai mekim o i no mekim, mi save olsem dispela bai helpim mipela. Pasin Jehova i laik bai ol meri marit Kristen i mas bihainim i save mekim mi amamas na marit bilong mipela i stap strong tru. Mipela i pas gut wantaim na wok gut wantaim long winim ol mak bilong lotu.”
Wanpela meri, nem bilong em Mindy, i tok: “Wok Jehova i givim long ol wokmeri bilong em i kamapim klia olsem em i laikim mipela. Mi pilim olsem taim mi givim ona na rispek long man bilong mi na sapotim em long ol wok em i mekim insait long kongrigesen, dispela em i rot bilong mi long soim Jehova olsem mi amamas long ol wok God i givim long ol meri.”
[Ol Piksa long pes 5]
God i bin givim Noa, Abraham, na Moses ol wok i stret wantaim namba ol i holim olsem het bilong famili
[Piksa long pes 7]
“Bikpela i givim tok long ol manmeri bilong en, na planti meri i go autim dispela tok”