Hatwok Long Wokim Rot Insait Long Solwara

WANPELA MAN LONG BRITEN I RAITIM DISPELA STORI BILONG KIRAP!

“EM NAMBAWAN bikpela wok i kamap long taim bilong yumi.” Sampela man i tok olsem long wanpela rot i go insait long solwara namel long Inglan na Yurop.

Long dispela bikpela wok ensinia, inap 15,000 man bilong Briten na Frans i bin wok wantaim. No gat narapela rot insait long solwara ol ensinia i bin wokim i winim dispela. Ol i bin mekim wok long ol traipela masin bilong boaim rot insait long solwara, na wan wan masin i gat nem olsem: Brigit, Katrin, Paskalin, Virjini, na Yuropa. Rot i kirap long hap ol Briten i kolim Channel i go inap long hap ol Frans i kolim la Manche.a Em bikpela wok tru, tasol sampela hevi i bin kamap na 9-pela wokman i bin dai.

Mekim Traim Planti Taim

Long 1936, wanpela man bilong gavman, em Winston Churchill, em i tok: ‘I no gat planti bikpela wok ol man i laik mekim na ol man i bel nogut long en, olsem dispela wok bilong wokim rot bilong tren i go insait long solwara namel long Dova na Kale.’ Long 1858 Palamen Bilong Briten i harim tok olsem, i gutpela long wokim wanpela rot i go insait long solwara long hap bilong Channel. Taim Lord Palmerston bilong palamen i harim dispela tok em i tok, ol i no amamas long givim mani long wokim wanpela kain rot olsem.

Long 1802 wanpela ensinia bilong Frans (Albert Mathieu-Favier) i tok, i gutpela long wokim wanpela rot i go insait long solwara, na putim ol lam i lait, na wokim ol bikpela paip i go antap winim solwara bambai ol man i raun long hos na wilka insait long rot, ol inap pulim klinpela win i save kam insait. Tasol ol i no gat rot long wokim kain rot olsem.

Long 1856 narapela ensinia bilong Frans, em Thomé de Gamond, i tok, i gutpela sapos ol i wokim rot bilong tren namel long Inglan na Frans. Ol Frans i laik, tasol ol Inglan i gat tupela tingting. Tasol de Gamond i no tingting planti, em i toktok wantaim wanpela ensinia bilong Briten, em William Low. Long 1872, Low na narapela ensinia bilong Briten, Sir John Hawkshaw, ol i bin wokim wanpela kampani bilong helpim ol long kisim mani bilong wokim rot namel long Inglan na Frans. Long 1880 sampela masin bilong boaim graun, em ol masin wanpela bikman (Beaumont) i bin wokim, i kirap wok long hap bilong Sekspia Klif, klostu long Dova. Na sampela masin moa i wok long hap bilong Sangat, long Frans. Ol i wok i go inap 1,000 mita na ol i lusim. Gavman bilong Briten i pret, nogut ami bilong wanpela kantri i kam pait long ol.

Long yia 1920 samting ol i kirap gen long wokim rot. Ol i mekim traim long boaim wanpela rot klostu long Fokston, Inglan, longpela bilong en i olsem 130 mita. Tasol ol i lusim​—Briten i pret gen long wanpela kantri i kam pait long ol. Long 1970 samting ol i kirap gen long wokim rot insait long solwara. Ol i wok i go inap long taim gavman bilong Briten i no laik helpim moa dispela wok.

Long 1986 Briten na Frans i sainim wanpela kontrak (Channel Treaty). Na long 1987 ol i orait long wok i kirap gen.

Hevi Long Mani

Sampela kampani bilong Briten na Frans i bung wantaim na kamapim kampani Eurotunnel. Dispela kampani i bin givim orait long kampani Transmanche-Link (TML), em 10-pela kampani konstraksen i insait long en, long tingim na bihain wokim rot i go insait long solwara. Gavman i strong long ol i no ken mekim wok long mani bilong gavman, ol i mas kisim mani long ol bisnis na kampani samting.

Tupela yia bihain long wok i kirap, ol i mas tingim gen pe bilong en. Pastaim ol i ting ol bai tromoi 5.23 bilion paun, tasol bihain ol i ting ol bai tromoi 7 bilion paun. Tasol long 1994 ol i ting pe bilong rot bai go antap inap olsem 10 bilion paun.

Bikpela Wok

Dispela rot insait long solwara i no wanpela rot tasol, em tripela rot. Long Disemba 15, 1987, namba wan masin TBM bilong boaim rot, i kirap wok long Inglan, na narapela masin TBM i gat nem Brigit, i kirap wok long Februeri 28, 1988, long Frans. Dispela tupela masin i wokim wanpela rot, braitpela bilong en i olsem 4.8 mita. Sapos bihain ol i mas stretim ol tren o wanpela bagarap i kamap long tren, ol bai stretim long dispela rot. Sampela bikpela masin TBM i boaim ol bikpela ston bilong wokim tupela bikpela rot, braitpela bilong wan wan i olsem 7.6 mita.

Wanpela man, em Paul, em i bin wok long dispela rot na em i tok: ‘Long Sekspia Klif mipela i bin go daun tru insait long wanpela liklik rot. Taim mipela go daun, mipela pilim kol. Na long as bilong liklik rot, win i pulap long smel bilong disel bilong ol masin. Taim mipela wokabaut i go insait long rot, win i hat moa yet.’

Insait long rot, 11-pela masin TBM i wok. Tripela masin i kirap long Sekspia Klif na boaim graun i go inap long wanpela hap klostu long Fokston, em ples ol man bai wetim tren bilong kisim ol i go long rot i go insait long solwara. Na tripela masin moa i wok i go insait long solwara bilong bungim tripela masin bilong Frans i bin kirap long hap bilong Sangat. Na tupela masin moa i kirap long Sangat na boaim graun i go inap long Kokel, klostu long Kale, em ples ol man long hap bilong Frans bai wetim tren.

Masin Brigit inap mekim tupela kain wok. Taim em i boaim wanpela kain ston i no strong tumas het na bodi bilong en i save wok. Olsem na ol i mas pasim gut het na bodi bilong en, long wanem, hevi bilong wara i bikpela tru inap 11-pela kilo long wanpela sentimita; em i winim tru hevi bilong win inap 10-pela taim. Tasol taim masin i kamap long graun i olsem sok namel long 25 na 40 mita daun tru long as bilong solwara, em inap spit tru. Nau em i wok i go stret bilong bungim wankain masin i bin kirap long hap bilong Inglan na i wok i kam.

Olsem Brigit, olgeta masin TBM i olsem haus faktori i gat wil. Kirap long het bilong en i go inap long tren bilong en long baksait, longpela bilong wanpela i olsem 260 mita! Ol piston haidrolik bilong masin i wok long subim het bilong masin i go pas, na ol naip long het bilong masin i tantanim tupela o tripela taim insait long wanpela minit na katim ston. Insait long wanpela wik, wanpela TBM i katim rot, longpela bilong en i olsem 426 mita, na em i rausim ol pipia ston na banisim arere arere bilong rot. I no gat narapela masin i bin mekim olsem.

Lainim Gut Rot

Bilong helpim masin long ran stret, man bilong stiaim masin TBM i save lukim piksa long kompyuta em monita bilong televisen i save kamapim paslain long ol i kirapim wok. Satelait i bin helpim ol long makim stret rot na olgeta samting bilong en. Ol liklik boa i bin wokabaut 150 mita paslain long masin bilong painim ston i olsem sok, na dispela i makim rot ol i mas bihainim. Na lait bilong masin lesa i bin sutim wanpela samting long TBM na man bilong stiaim i save wanem rot em i mas bihainim.

Sikspela i go inap 8-pela kilomita samting insait long solwara namel long 2-pela rot, ol i bin wokim wanpela traipela hul na long dispela hap ol tren inap lusim rot na go long narapela rot sapos ol i mas stretim tren samting. Long olgeta 375 mita, ol i wokim ol liklik rot i save bungim ol bikpela rot.

Na wanpela bikpela paip i skruim 2-pela rot wantaim na i stap antap long dispela rot sapos ol i mas stretim tren samting. Paul i tok: ‘Wok bilong en i olsem pam bilong wilwil. Sapos yu putim pinga antap long valv bilong pam, bai yu pilim hat bilong en. Bikpela hat i kamap long ol tren tu, olsem na ol valv bilong paip antap i save op na hat bilong ol tren inap raus long rot.’

Brigit na wankain masin i bin kirap long Inglan, ol i kam klostu inap olsem 100 mita. Nau isi isi wanpela boa i wokim wanpela hul long ston i olsem sok, braitpela bilong hul i olsem 4-pela sentimita. Long Disemba 1, 1990, ol wokman bilong Inglan na Frans i bung wantaim. Longpela bilong rot long hapsait bilong Inglan em 22.3 kilomita, na long hapsait bilong Frans em 15.6 kilomita. Ating yu ken pilim amamas bilong ol dispela wokman taim ol i save inap sampela sentimita tasol tupela rot i no lain gut! Orait, ol i lusim TBM bilong Briten klostu long Brigit na ol wokman i mekim wok long ol liklik masin na stretim dispela hevi. Bihain tupela rot i lain wantaim. Ol i no rausim ol masin TBM bilong Briten long rot insait long solwara, tasol ol masin bilong Frans ol i brukim na rausim.

Em i Spit Moa

Paul i tok: ‘Banis long arere arere bilong rot em simen tasol​—i no gat wanpela gutpela samting bilong lukim​—ol paip bilong rausim hat bilong ol tren, em tasol.’ Ol i opim dispela rot long Me 6, 1994, tasol ol man i mas wet liklik bilong raun insait long en. Em bai wok olsem wanem?

Bilong save, yu mas lusim haiwe long Fokston o Kale, na go insait long hap bilong wetim tren, na baim tiket. Long sampela mun, tiket bilong wanpela ka i olsem K390, na sampela mun, em K550. Nau bai yu draivim ka long hap ol ofisa bilong kastam i stap long en. Bihain, bai yu draiv i go inap long tren. Dispela tren ol i kolim Le Shuttle em i narapela kain tren stret​—ol ka i kalap long en. Orait, 35 minit bihain bai yu kamap long narapela hapsait​—long Inglan o Frans​—em longwe olsem 50 kilomita. Taim yu lusim tren yu bai draivim ka i go stret long haiwe. Gutpela tru, i no olsem yu mas mekim planti samting bilong kam hariap long hap yu laik go long en. Sapos yu laik go stret long Landon o Paris, yu no ken lusim tren. Tren bai spit olsem 290 kilomita insait long wanpela aua bilong go long Paris, na bilong go long Landon, tren bai spit olsem 80 kilomita insait long wanpela aua. Tasol ol man i mas wet inap long yia 2002 na tren bai kirap long Fokston na i go stret long Landon!

Tasol i gat hevi i stap yet. Sampela i tok pait long rot bilong tren namel long Landon na rot i go insait long solwara​—ol i no amamas tren bai spit tru long dispela hap. Tasol yumi mas tingim ol TBM​—ol i bin mekim bikpela wok tru, ol i no bin malolo. Wanpela TBM i sanap ausait long bikpela haus olsem ples ol man i kam lukim ol samting bilong dispela rot, na ol i putim toksave olsem: “Bilong Baim​—Wanpela Gutpela Papa Tasol i Bin Lukautim.” Tru tumas, masin i redi long hatwok gen!

[Ol Futnot]

[Mep long pes 15]

(Bilong save ol dispela rait i stap we long pes, lukim buk o magasin)

Inglan

Fokston

Kale

Frans

[Ol Piksa long pes 15]

Daunbilo: Ol wokman i amamas taim rot i go insait long solwara i pinis; no gat narapela longpela rot i go insait long solwara olsem dispela

Han Sut: Wanpela TBM

[Kredit Lain]

Workers: Eurotunnel Ph. DEMAIL; TMB: Eurotunnel