Haus Paua i Stap Insait Long Wanpela Maunten

LONG ol liklik buk bilong ol turis ol i stori long saut-wes bilong Saut Ailan bilong Nu Silan olsem: “Dispela raun bai yu tingim oltaim oltaim.” Na ol dispela liklik buk i tok tru. Taim mi lusim biktaun Manapori i go long ples Doubtful Sound na brukim wara na ol maunten, mi lukim planti narapela kain gutpela wok ol saveman i bin mekim na mi kirap nogut long en​—em wanpela haus paua ol i wokim insait long wanpela maunten.

Taim mi raun mi tingim ol Mauri bilong Nu Silan​—em ol man i bin i stap paslain long ol narapela lain i kam sindaun long Nu Silan. Mi tingim ol stori bilong ol Mauri ol i tok, “Manapori” i olsem ‘raunwara bilong sori o aiwara,’ o narapela tok, ‘raunwara bilong bel hevi.’ Long mi, dispela nem “Manapori” em nem bilong biktaun mi laik kirap long en bilong raun lukim ol samting.

Mi Lukim Ol Samting Mi Ting Mi No Inap Lukim

Dispela raunwara i stap isi tru na bot mipela stap long en i ron gutpela tru. Mipela lukim ol gutpela ples daun na ol bikpela maunten. Mipela amamas, long wanem, long dispela de san i lait. Long dispela hap long olgeta yia inap olsem 7,600 milimita ren i save pundaun, olsem na san i no save lait tumas! Olsem na i gat bikpela bus na ol gutpela gutpela diwai na plaua samting, kirap long arere bilong wara i go antap long ol maunten. Em i gutpela ples bilong ol man i laik kisim piksa. Mipela ron long bot inap 75 minit na ensin bilong dispela bot tasol i pairap taim mipela brukim raunwara i go long narapela hapsait. Tasol mipela go we?

Mipela go long wanpela ples mipela ting mipela i no inap lukim​—dispela ples i stap long hapsait tru bilong wara, ol i kolim West Arm. Long dispela hap mipela lukim wanpela ples ol transfoma bilong wanpela haus paua i sanap. Long dispela hap i no gat biktaun o man samting, olsem na mi ting, wanem samting i kirapim ol man long wokim wanpela haus paua long dispela hap? Ating gutpela graun na wara samting bilong dispela hap tasol inap kirapim wanpela ensinia o man i save makim graun samting long kirapim wanpela haus paua long dispela hap.

Long yia 1904 dispela tingting i bin kamap long wanpela man (P. J. Hay) i save makim graun samting. Em i save gutpela wok inap kamap long dispela bikpela raunwara. Dispela wara i stap olsem 180 mita antap long mak bilong solwara na em i go daun klostu 450 mita, na as bilong raunwara i go daun 260 mita daunbilo long mak bilong solwara! Tasol solwara i stap longwe olsem 10-pela kilomita long dispela raunwara na ol bikpela maunten i banisim. Tasol 60 yia i pinis pastaim na ol man i kirap long mekim wok long dispela bikpela wara. Wanem samting i kirapim ol man long mekim wok long dispela wara? Wanpela kampani bilong Ostrelia i wok long Nu Silan na ol i gat wok long kisim ain long graun; ol i gat wanpela haus faktori bilong kukim ain long ples Tiwai Poin, tasol ol i mas i gat paua bilong mekim dispela wok. Tasol olsem wanem ol bai kisim paua?

Samting Ol i Tingim i Kamap Tru

Wanpela kampani bilong ol ensinia long Amerika (Bechtel) i ting long wokim wanpela rot i go insait long wanpela maunten (Leaning Peak) na wokim wanpela haus paua daunbilo tru long arere bilong dispela wara Manapori. Olsem na wara bilong dispela raunwara inap pundaun insait long sampela rot na dispela wara bai kirapim 7-pela masin bilong kamapim paua. Na dispela paua bai go antap long dispela hap em transfoma i stap long en arere long raunwara. (Lukim piksa long pes 17.) Tasol olsem wanem ol dispela wara bai ron? Ol wokman i mas wokim narapela rot insait long ol maunten na dispela rot i mas i go inap olsem 10-pela kilomita insait long ol maunten. Dispela bai larim wara i ron i go bungim narapela wara (ol i kolim Doubtful Sound). Bilong wokim dispela rot i go insait long ol maunten, ol i mas rausim planti ston inap olsem 760,00 kubit mita.

Tingim ol planti planti ston ol i mas rausim long dispela maunten bilong wokim ol liklik rot bilong wara i ken ron na pundaun insait long en, na tu, bilong wokim bikpela haus masin, bilong putim ol masin em wara bai tantanim na kamapim paua. Dispela haus bilong putim ol masin long en na bai wara i ken tantanim, em i no liklik​—longpela bilong en i olsem 111 mita na i go antap inap 39 mita na braitpela bilong en i olsem 18 mita. Yumi ken tingim longpela bilong en i olsem mak bilong wanpela graun bilong pilai kikbal. Olsem na pastaim ol i mas wokim wanpela rot i go insait long graun na bai ol i ken wokim dispela haus bilong putim ol dispela masin long en, na ol jenereta tu. Dispela em i bikpela wok tru!

Longpela bilong dispela rot insait long graun i olsem 1.6 kilomita na em i go daun long ples dispela haus masin i stap long en. Taim bas bilong mipela i go insait long dispela maunten mi tingting olsem mipela go daun tru insait long graun​—olsem mipela go daun long as bilong graun.

Taim mipela lusim bas mipela go insait long dispela traipela haus masin i gat ol jenereta long en na mipela kirap nogut tru. Mipela i ting dispela kain samting i no inap i stap insait long wanpela maunten! Tasol mi gat wanpela askim: Olsem wanem ol man i bin kisim dispela ol hevipela masin i kam long dispela ples? Mi ting i no gat rot. Solwara na raunwara tasol i stap. Olsem na ol man i ting, i gutpela sapos ol i kisim ol masin i kam long rot bilong solwara. Tasol long kamap long ples bilong haus paua i gat ol dispela bikpela maunten. Olsem wanem nau? Ol i mas wokim wanpela rot.

No Gat Narapela Bikrot Long Nu Silan i Go Antap Tru Olsem Dispela

Long 1963 ol i kirap long wokim wanpela rot long Deep Cove i go long West Arm. Em i no liklik wok​—em bikpela wok tru. Bilong wanem i hatwok tru long wokim? Long wanem, i gat ren, na ais, na ol wara i gat graun long en, na bikbus i stap. Bipo ol i ting ol bai pinisim dispela rot insait long 12-pela mun, tasol nogat. Ol i wok inap 24 mun. Longpela bilong dispela rot em 23 kilomita na pe bilong wokim i bikpela tru! I no gat narapela bikrot long Nu Silan i olsem dispela​—em i go antap tru, winim ol narapela bikrot. Tasol dispela rot em i bikpela samting, long wanem, ol i karim 79,000 ton ain na masin samting long en. Wanpela taim ol i karim long traipela trak ol samting inap olsem 260 ton, na wanpela buldosa na wanpela strongpela masin greda i mas pulim dispela trak, na narapela buldosa gen i wok long subim dispela trak! Tasol maski dispela i hatwok, ol i pinisim dispela wok.

Ol Samting Dispela i Mekim Long Graun Samting

Dispela kain bikpela samting ol man i wokim, em i mekim wanem long graun samting? Bikpela hap bilong dispela haus paua i stap insait long graun, olsem na yumi no inap lukim planti samting bilong en. Yumi inap lukim tasol ples ol pos ain na transfoma samting i sanap long en na ol waia i save brukim ol maunten. Tasol i gat ol bikpela maunten na bikbus i stap, olsem na ol dispela samting i olsem ol i liklik samting tasol. Tasol i gat narapela askim:

Sapos bikpela hap wara bilong raunwara Manapori i lus, olsem wanem bikpela wara i stap yet long en? Wanpela samting em olsem: I gat bikpela ren i save kam daun long dispela hap. Biktaun Manapori i save kisim 1,250 milimita ren long olgeta yia, tasol dispela haus paua long West Arm i save kisim 3,750 milimita ren. Na tu, ol man i was gut long wara, nogut em i go daun long mak tru bilong en.

Ol Dispela Samting i Helpim Husat?

Dispela haus paua i winim ol narapela long Nu Silan, na planti kantri i bin helpim ol long wokim dispela samting. Ol masin em wara i tantanim, ol i bin wokim long Skotlan, na ol jenereta ol i bin wokim long Jemani, na ol transfoma ol i wokim long Itali. Tasol ol dispela paua i helpim husat? Bikpela hap bilong dispela paua i go long dispela kampani bilong kukim ain long ples Tiwai Poin, na ol narapela i go long ol samting i save wok long paua long Nu Silan. Dispela haus paua long Manapori i bikpela samting tru bilong helpim wok bilong ol kampani i gat wok long kukim ain na ol i ken wok gut. Sapos i no gat paua inap 2-pela aua samting tasol, dispela kampani i no inap wok moa inap sampela mun. Olsem na ol man i wok long haus paua bilong Manapori na ol man i wok long kampani bilong ain, ol i wok gut wantaim.

Bihain bas i kisim mipela i go bek long Wilmot Pas na go daun long wara bilong Doubtful Sound. Mipela lukim ol liklik wara i ron i kam long haus paua bilong Manapori na ron i go long hap bilong Doubtful Sound.

Bihain mipela kisim narapela bot na mipela raun long raunwara. Wanpela taim kepten bilong dispela bot i pasim ol ensin na i no gat liklik pairap long dispela ples​—i olsem paradais stret. Sampela taim mipela i harim gutpela krai bilong wanpela pisin. Dispela i narapela kain long pairap bilong bikpela wara i pundaun long hap bilong haus paua bilong Manapori, em i stap klostu liklik inap olsem sampela kilomita tasol na i stap hait insait long wanpela maunten.​—Em Stori bilong wanpela man.

[Sat/Ol Piksa long pes 17]

(Bilong save ol dispela rait i stap we long pes, lukim buk o magasin)

Ol Samting Long Haus Paua

Raunwara Manapori

Rot bilong lif

Dua bilong pasim wara

Wara i go insait

Rot bilong wara i go long “ Deep Cove”

Rot bilong go ausait hariap

Wanpela haus paua ausait

Ol waia bilong paua

Rot bilong ka i go insait long maunten

Rum bilong transfoma

Haus masin

Rot

[Ol Piksa]

Ples paua

Haus masin

Haus paua long Manapori

[Piksa long pes 15]

Doubtful Sound, New Zealand

[Piksa long pes 16]

Em rot i go insait long maunten na i go daun long haus masin