Ol Gutpela Samting Bilong Bikpela Raunwara Bilong Sentral Amerika

MASKI Nikaragua em i wanpela liklik kantri, namba wan bikpela raunwara bilong Sentral Amerika i stap long en​—em raunwara Nikaragua. Samting i narapela kain long en em i olsem: raunwara i no gat sol long en, tasol i gat ol kain pis bilong solwara olsem ol sak, swordfish, na tarpon i stap long en. Ol saientis i bilip olsem bipo dispela raunwara em hap bilong solwara Pasifik, tasol volkeno i bin pairap na i pasim maus bilong pasis na mekim em i kamap raunwara. Taim strong bilong sol i wok long pinis, isi isi ol pis i lain long dispela na ol i stap yet long en.

Dispela raunwara​—longpela bilong en inap olsem 160 kilomita na wanpela hap bilong en i braitpela moa inap olsem 70 kilomita​—em i stap antap long mak bilong solwara inap 30 mita. I gat olsem 400 ailan long raunwara Nikaragua, na inap olsem 300 bilong ol dispela ailan i stap long poin bilong Asese, klostu long taun Granada long hap not bilong raunwara. Ol i kolim ol olsem Ol Ailan Bilong Granada.

Bikpela ailan long raunwara em ailan Ometepe, em i stap long namel bilong raunwara. Longpela bilong en inap olsem 25 kilomita na braitpela bilong en inap olsem 13 kilomita. Ometepe i gat tupela volkeno na i gat hap graun namel i joinim tupela wantaim. Bikpela volkeno Concepción i antap moa inap 1,610 mita. Em i save pairap na em i stap long hap not bilong ailan. Narapela volkeno em Madera, em i antap inap 1,394 mita na em i no save pairap moa. Bikbus i karamapim Madera na long het bilong en i gat raunwara em klaut i karamapim.

Raunwara Nikaragua, em wanpela bilong ol samting i save pulim ol turis i kam long dispela ples. Ol i save kam bilong lukim ol gutpela samting bilong dispela ples na lukim tu ol samting em ol man i bin wokim long bipo na i stap yet long nau. Tasol i gat narapela gutpela samting bilong raunwara Nikaragua em yumi mas kisim save long en.

Wanpela Ples Antap Long Wara

Ol kain kain gutpela diwai na ol animal samting i pulap long Ol Ailan Bilong Granada. I gat ol naispela plaua tru i stap long ol bus i karamapim ol dispela ailan i gat volkeno. Arere long nambis, i gat ol naispela pisin bilong wara olsem blue heron, great egret, osprey, anhinga, na cormorant. Long arere bilong bus, i gat haus bilong ol pisin Montezuma oropendola i hangamap long ol bikpela diwai na win bilong raunwara i sakim ol i go i kam.

I gat ol man i sindaun long sampela bilong ol dispela ailan. Ol dispela ailan i gat ol haus bilong ol man bilong kisim pis na ol naispela bikpela haus bilong ol maniman em ol i save kam holide long en. Na tu, i gat ol skul, ples matmat, na ol haus kaikai na haus dring. Ol dispela ailan i stap klostu klostu wantaim na i luk olsem wanpela haus lain i stap antap long wara.

Long olgeta moning, wanpela bot i gat waitpela na blupela kala long en i save go long ol ailan na kisim ol sumatin bilong bringim ol i go long skul. Wanpela stua antap long kanu i save go raun long olgeta ailan na salim ol prut na ol kaikai bilong gaden. Long olgeta de bai yu lukim ol man i tromoi umben bilong kisim pis na ol meri i wasim klos long raunwara.

Ol Witnes Bilong Jehova tu i save givim bel long mekim wok bilong ol long ol dispela ailan. Ol i save kalap long bot na i go lukim ol manmeri bilong autim gutnius bilong Kingdom Bilong God. (Matyu 24:14) Ol maunten na wara samting i mekim na dispela ples i gat hatwok bilong en: Ol bai mekim we ol miting bilong stadi long Baibel? Baibel i tok long “no ken lusim pasin bilong bung wantaim,” olsem na ol i tingting long wokim namba wan Haus Kingdom bilong Nikaragua bilong trip tasol antap long wara!​—Hibru 10:25.

Haus Kingdom i Trip Antap Long Wara

Tupela marit Witnes em ol i save mekim wok autim tok fultaim, ol i go sindaun long Ol Ailan Bilong Granada long Novemba 2005. Sampela mun bihain, taim ol i singautim ol manmeri bilong ples long kam bung wantaim ol long Memorial bilong tingim indai bilong Krais, ol i kirap nogut olsem 76 manmeri i kam bung. Dispela i kirapim tru bel bilong tupela long mekim ol miting Kristen long olgeta wik long dispela ples. Tasol i no gat gutpela hap bilong mekim ol miting, olsem na tupela marit i tingting long wokim wanpela samting. Tupela i tingting long wokim wanpela Haus Kingdom bilong trip antap long wara na ol i ken pulim i go long narapela narapela ples i stret long ol manmeri.

Maski dispela tupela marit i no bin wokim kain samting olsem long bipo, tupela i kirapim wok. Tupela wantaim 6-pela narapela ol i mekim dispela wok insait long wanpela mun. Dispela nupela ples bilong miting em i olsem wanpela bikpela bet. Ol i wokim ol bun bilong haus long ain paip em ol i weldim wantaim na aninit long en i gat 12-pela bikpela dram em ol i pulimapim win long en bilong mekim em i trip. Na plua bilong en ol i wokim long plang na ol i putim sel olsem rup bilong en. Ol wokman i save beten long olgeta nait bilong wok i ken kamap gutpela, long wanem, ol i no save yet olsem dispela haus bai i trip antap long wara o nogat. Tasol taim ol i pinisim haus, em i trip antap long wara!

Ol i yusim Haus Kingdom long mekim namba wan Pablik Miting long Jun 10, 2006. Long de bihain, ol i pulim i go long ol narapela ailan long mekim dispela wankain miting wantaim ol manmeri long hap. Namba bilong ol manmeri i kam long dispela tupela bung wantaim em 48, maski sampela bilong ol i mas wokabaut long bikbus inap klostu wanpela aua. Olgeta i amamas olsem ol i gat ples bilong mekim lotu!

Ol manmeri bilong ples i amamas long mekim miting long dispela Haus Kingdom. Taim brata i mekim tok, odiens inap harim pairap bilong wara i kam paitim ston o sampela taim ol inap harim singaut bilong monki i stap longwe tru. I no longtaim na ol man bilong ailan i lain pinis long lukim dispela Haus Kingdom. Ol i save tromoi han taim ol i lukim ol brata i pulim Haus Kingdom i go long narapela ailan. Long olgeta wik, winim 20 manmeri i save kam long dispela Haus Kingdom long bung wantaim olsem ol Kristen na skul long ol tok bilong Baibel. Dispela Haus Kingdom em i wanpela gutpela samting tru!

Long Ailan Ometepe

Ailan Ometepe i stap longwe long Granada, inap olsem 50 kilomita long hap saut. Ol gutpela samting bilong dispela ples na graun i gat gutpela gris i mekim em i kamap wanpela gutpela hap tru bilong sindaun long en. Ol samting bilong bipo ol man i bin painim i soim olsem em i namba wan ples long Nikaragua we ol man i bin kirap long wokim gaden. Nau i gat olsem 42,000 manmeri i sindaun long Ometepe, em ol i save kisim pis, planim kon, ol banana, kofi, na ol narapela kaikai bilong gaden. Na tu, i gat planti kain kain animal na ol diwai samting bilong bus. I gat planti kain pisin kalangar, na ol pisin magpie-jay em ol i save soim ol blupela na waitpela kala long gras bilong ol taim ol i flai namel long ol diwai, na i gat ol monki i gat waitpela pes em planti man i save laikim tru.

Na tu, ol man bilong autim gutnius bilong Kingdom Bilong God, ol i save autim tok long ol manmeri bilong Ometepe. Long 1966, inap 8-pela manmeri i bin kisim baptais, tasol namba bilong ol Witnes i go antap inap 183 insait long 4-pela kongrigesen i stap long Ometepe. Olgeta wan wan kongrigesen i gat Haus Kingdom bilong ol yet. Long olgeta 230 manmeri, wanpela namel long ol em i Witnes.

Ol Witnes Bilong Jehova long Ometepe i bin karim sampela hevi long ol yia i go pinis. Olsem: Long 1980, ol man i birua long ol na i kukim Haus Kingdom long Mérida. Ol i wokim gen narapela Haus Kingdom long 1984. Ol i bin yusim dispela Haus Kingdom i kam inap long 2003, na ol i wokim wanpela naispela Haus Kingdom na 60 bratasista i save bung long en ol i amamas tru.

Long Moyogalpa, ol i wokim Haus Kingdom we planti manmeri inap bung long en, na ol inap mekim tu ol bikpela kibung long en. Ol i save skruim rup long baksait bilong haus na aninit long en ol i wokim pletfom. Long fran bilong pletfom i gat ol sia i stap aninit long rup ol i wokim long sel, na dispela rup em i longpela i go inap long baksait bilong haus. Ol Witnes long dispela hap wantaim ol pren bilong ol, ol i save kam bung long dispela hap long taim bilong ol bikpela kibung. Long ol dispela kibung, raunwara Nikaragua i stap olsem gutpela ples bilong baptaisim ol nupela disaipel bilong Jisas Krais.​​—Matyu 28:19.

Ol Gutpela Samting​—Ol Bai Lukautim Gut?

Raunwara Nikaragua i stap gut yet long nau, long wanem, em i bikpela raunwara. Tasol long nau ol man i mas lukautim gut dispela raunwara. Ol samting i wok long bagarapim wara, em ol marasin nogut bilong wokim gaden na bilong faktori, na graun long ol hap ol i katim ol diwai long en em ren i wasim i go insait long wara.

Yumi no save sapos gavman na ol man i sindaun long hap bilong raunwara bai mekim sampela samting bilong stretim dispela hevi o nogat. Maski ol i no inap mekim, Man Bilong Wokim olgeta samting bai lukautim gut ol gutpela samting bilong dispela graun, em ol naispela raunwara, ol naispela ailan, na ol gutpela diwai na ol animal samting bilong bus, na bai ol man i bihainim tok bilong em ol i ken kisim long bihain. Baibel i tokim yumi olsem: “Ol stretpela man bai i kisim graun God i givim ol, na bai ol i stap oltaim long en.”​​—Song 37:29.

[Piksa long pes 26]

Haus Kingdom bilong mekim ol miting bilong Baibel, i trip antap long wara