Ol Ailan i Trip Long Raunwara Titikaka
WANPELA MAN LONG PERU I RAITIM DISPELA STORI BILONG KIRAP!
OL AILAN i trip antap long wara? Yes, dispela raunwara long Saut Amerika i narapela kain tru—ol ailan i trip antap long wara, na ol man i save sindaun long ol ailan.
Raunwara Titikaka i stap long boda bilong Peru long hap wes na Bolivia long hap is, na i stap antap inap 3,810 mita, na i no gat narapela raunwara i antap olsem. Ol bikpela sip i save raun long en. Longpela bilong en em inap olsem 190 kilomita long hap not-wes i go inap long hap saut-is, na braitpela bilong en long hap i op tru, em inap 80 kilomita.
I gat planti ailan long raunwara Titikaka na sampela i trip antap long wara ol i olsem traipela mat ol i bin wokim long totora o wel pitpit bilong wara i drai pinis. Dispela pitpit i save kamap long ol hap bilong raunwara i no daun tumas. Rop bilong pitpit i pas long as bilong wara na pitpit i save kam antap inap planti mita na winim wara i go antap sampela mita moa. Bilong wokim kain ailan olsem, ol man i no kamautim rop bilong pitpit, nogat; ol i save brukim pitpit na wokim olsem mat na dispela i save slip antap long wara olsem plua. Nau ol i putim graun malumalum na sampela pitpit moa ol i bin katim bilong strongim dispela plua. Ol man i sanapim haus long ol dispela ailan i trip antap long wara na ol i save wokim haus long pitpit.
Buk The Encyclopædia Britannica i tok, inap longpela taim ol man i bin stap long ol dispela ailan. Na buk i tok: ‘Ol man i stap long dispela raunwara i save wokim narapela kain kanu ol i kolim bolsa. Ol i katim na bungim pitpit i drai pinis na pasim wantaim bilong wokim kain kanu olsem. Dispela kanu i wankain olsem kanu bilong ol Isip bilong bipo na ol Isip i bin malenim long ol traipela haus ston bilong ol.’
Nau ol Witnes Bilong Jehova i kisim wanpela bot bilong autim tok long ol man long ol ailan bilong raunwara Titikaka. Bot i gat mota na 16 man inap raun long en. Ol Witnes i tok, taim ol i wokabaut antap long pitpit bilong autim tok long ol haus, pitpit i meknais liklik. Gutpela tru, nau ol man i sindaun long ol dispela ailan i stap longwe na ol i trip antap long wara, ol tu i harim tok bilong Kingdom bilong God!