Baibel i Tok Wanem?

God i Save Praisim Man?

YES, em i save mekim. Olsem wanem? Man i tingting long God bai praisim em, i gat rong long dispela tingting? Nogat, long wanem, God yet i save tokim man i stap gut long em, em inap kisim gutpela pe. God em i man bilong bihainim pasin i stret na pasin sori, olsem na em bai givim pe long man i mekim wok bilong em. Baibel i tok: “Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.”​—Hibru 11:6.

Man i bilip tru long God, em i stap pren bilong em na kisim gutpela pe. God i save mekim gut long ol man i gat strongpela laik long i stap pren bilong em.

Pasin Sori i As Bilong Praisim Man

Jehova i laik bai yumi save, em i amamas tru long praisim man i givim bel long em. Yumi ken tingim ol gutpela papamama. Papamama i save tingim sampela rot bilong praisim pikinini sapos pikinini i sori long papamama na long laik bilong em yet em i mekim sampela wok bilong haus. Papamama i no ken givim ples slip na kaikai tasol long pikinini, ating ol bai givim wanpela gutpela presen long em tu. Ating sampela taim bai ol i givim liklik mani na pikinini i ken putim long beng bilong helpim sindaun bilong em bihain. God i no olsem sampela man, ol i no pilim o tingim ol man i bin mekim sampela gutpela wok bilong helpim ol. Jehova i gat pasin sori na em i save pas gut wantaim ol pren bilong em. Sapos yu bilip strong long Jehova, bai em i “no lusim yu. Bai [em i] no larim yu i stap nating. Nogat tru.”​—Hibru 13:5.

Jehova i save amamas na mekim gut long ol man i mekim wok bilong em, maski em liklik wok tasol. Em i pilim tru dispela gutpela pasin ol i mekim na em i opim rot bilong ol i ken kisim sampela save moa long em. Tok bilong Jisas i helpim yumi long kisim save long dispela samting: “Man i kisim yupela na i mekim gut long yupela, em i kisim mi na i mekim gut long mi. Na man i kisim mi, em i kisim God, em i bin salim mi na mi kam. Sapos wanpela man i ting, ‘Mi laik helpim profet,’ na em i kisim wanpela profet i kam long haus na i lukautim em, orait God bai i givim dispela man ol wankain gutpela samting olsem ol profet i save kisim. Na man i ting, ‘Mi laik helpim stretpela man,’ na i kisim wanpela stretpela man i kam long haus na i lukautim em, dispela man bai i kisim ol wankain gutpela samting olsem ol stretpela man i save kisim. Na man i ting, ‘Mi laik helpim disaipel bilong Jisas,’ na em i givim kap kol wara tasol long wanpela bilong ol dispela manmeri nating i stap long lain disaipel bilong mi, orait mi tok tru long yupela, pe bilong dispela man bai i no inap lus.”​—Matyu 10:​40-42.

Papa bilong Jisas, em Jehova, i bin salim em i kam long graun. Olsem na man i mekim gut long wanpela disaipel bilong Krais, maski em wanpela profet, o stretpela man, o man nating, i olsem em i mekim gut long Krais na God, em dispela Man i salim Krais i kam. Tru tumas, God bai praisim dispela kain man. Em bai kisim planti samting bilong spirit. Bilong wanem em bai kisim planti samting? Long wanem, Jehova i save tingim olgeta wok yumi save mekim bilong helpim wok bilong Kingdom, maski em bikpela wok o liklik wok. Na em bai praisim dispela wok bilong yumi.​—Hibru 6:10.

Wanpela disaipel bilong Jisas, em Pita, i laik save, em na ol narapela aposel bai kisim gutpela prais o nogat. Olsem na em i askim Jisas: “Lukim! Mipela i bin lusim olgeta samting na bihainim yu. Bai mipela i kisim wanem samting?” (Matyu 19:27) Jisas i no ting em wanpela askim kranki, nogat. Em i tok: “Olgeta manmeri i bin ting long nem bilong mi na i lusim haus o brata o susa o papa o mama o pikinini o gaden, bai ol i kisim 100 moa, na bai ol i kisim laip i stap gut oltaim oltaim.”​—Matyu 19:29.

Gutpela Samting Nau na Bihain

Bekim bilong Jisas i kamapim klia olsem lain bilong em bai kisim ol gutpela samting long nau na long bihain. Wanpela gutpela samting ol inap kisim long nau, em long kam insait long wanpela bikpela famili em ol i bilong olgeta hap na olgeta i stap olsem brata sista long ol samting bilong spirit. Ol lotu i gat nem Kristen, ol i tingting planti, long wanem, planti man i no go moa long lotu. Tasol planti man moa i go long ol ples bung bilong ol Witnes Bilong Jehova. Long olgeta yia planti handet tausen man i kisim baptais na kamap nupela Witnes.

Na narapela gutpela pe ol i kisim em bel isi na amamas, long wanem, ol i save long God na ol i stap pren bilong em. Tru tumas, “sapos yumi bihainim pasin bilong God yumi kisim planti gutpela samting.” (1 Timoti 6:6) Man i stap amamas tru sapos em inap tok olsem aposel Pol i tok: “Mi save pinis long pasin bilong i stap isi, maski wanem kain samting i kamap long mi.”​—Filipai 4:11.

Klostu long taim Pol i dai, em i stori long gutpela pe “liklik lain,” em lain bilong Krais God i bin makim, ol bai kisim bihain​—ol bai kirap bek long indai na kisim laip long heven. Pol i tok: “Bikpela i save bihainim pasin i stret tasol na skelim pasin bilong ol manmeri, na long De bilong bikpela kot bilong em, em bai i givim dispela prais long mi. Na em bai i no givim long mi wanpela tasol. Nogat. Em bai i givim long olgeta man i laikim tumas long lukim em na i wetim em i kamap ples klia.”​—Luk 12:32; 2 Timoti 4:​7, 8.

Na ol “arapela sipsip,” em planti milion man i bihainim Jisas, ol i amamas long tingim gutpela prais ol bai kisim bihain, em laip oltaim long Paradais long graun. (Jon 10:16) Na Jisas i tokim lain bilong em, sapos ol i dai, bai ol i kisim gutpela pe taim “ol stretpela man i kirap bek.”​—Luk 14:14.

Tingim Gutpela Prais

I stret yumi traim tingim ol gutpela gutpela blesing bai yumi kisim, maski i no gat wanpela man i save bai ol i kisim wanem kain blesing tru. Ating yu inap pilim dispela bikpela amamas Aisaia 25:8 i stori long en, a? “Em bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.” Na traim tingim tok bilong Aisaia 32:17: “Stretpela pasin bai i kamapim pasin bel isi na ol manmeri bai i no pret moa na bai ol i sanap strong oltaim.” Tru tumas, olgeta man bai wok wantaim long gutpela pasin pren. (Aisaia 65:​21-25) Long nau sapos wanpela man i wok strong, gutpela samting i kamap long hatwok bilong em, olsem gutpela haus o narapela gutpela samting. Orait, long nupela taim God bai kamapim, olgeta samting bai stap gutpela olgeta; skin bilong ol man bai strong na ol bai wokim ol gutpela samting bilong helpim sindaun bilong ol na bilong ol i ken stap amamas.​—Song 37:4.

I no long wanpela gutpela wok bilong yumi yet na yumi kisim blesing, nogat; sori bilong God tasol i mekim na yumi kisim. Na maski yumi sinman, God i amamas long praisim yumi. (Rom 5:​8-10) Tasol bilong kisim blesing yumi mas kamapim pasin God i laikim. Yumi mas wok strong long painim Jehova na kamapim strongpela bilip long em na sanap strong na karim hevi. (Hibru 10:​35-39) I olsem yumi ken tok, “olgeta samting [yumi] mekim, [yumi] mas wok strong na mekim. I no olsem [yumi] mekim wok bilong ol man. Nogat. [Yumi] mekim wok bilong Bikpela. [Yumi] save, bihain Bikpela bai i givim pe long [yumi].” Tru tumas, Jehova i save praisim man.​—Kolosi 3:​23, 24.