Welpaul na Kiau Bilong En
WANPELA MAN LONG OL AILAN SOLOMON I RAITIM DISPELA STORI BILONG KIRAP!
SAPOS yu kisim kanu na lusim Honiara, em nambawan biktaun bilong ol ailan Solomon i stap long Guadalkanal, bai yu raun inap olsem 2-pela aua samting na bai yu kamap long ailan Savo. Planti man i save long dispela ailan, long wanem, em i gat ol maunten i save smok na pairap na i gat ol welpaul i stap long en, na ol i kolim dispela welpaul tu olsem welpaul bilong Ostrelia. I gat ol hatpela ston na smok bilong hatpela wara i save sut i kam antap long hap graun i bruk long en na sampela taim ol asples i save mekim wok long ol dispela samting bilong kukim kaikai na hatim wara bilong ol. Welpaul tu i gat save long mekim wok long dispela samting i kamap long graun.
Maski welpaul em i liklik long kakaruk, tasol em i wankain liklik, olsem: Hevi bilong bodi bilong en, na ol sotpela na raunpela wing bilong en, na 4-pela bikpela na strongpela pinga bilong lek bilong en. Na maus bilong en i sot na i krungut i go daun liklik. Taim em i flai em i save spit, tasol em inap mekim liklik taim tasol.
Welpaul i bilong wankain lain pisin olsem kakaruk. Em i save putim ol kiau bilong en namel long ol sayor samting i sting pinis na bai kiau i ken i stap long ples i hat inap olsem 32 digri Selsias, inap long taim pikinini i lusim kiau. Long dispela ailan ol welpaul i gat narapela kain samting bilong hatim ol kiau. Em wesan bilong nambis bilong Savo, em i gutpela ples bilong ol i putim kiau long en, long wanem, maunten paia i stap klostu na i hatim wesan.
Ol asples i banisim gut sampela hekta bilong nambis long ol strongpela lip bilong kokonas. Dispela em “ples” bilong welpaul. Dispela hap ol i banisim i olsem wanpela plantesen ol i bin stretim gut. Ol i planim ol liklik diwai long ol stretpela lain bilong mekim ples i naispela na bai ol welpaul i kam long en. Long dispela hap olgeta, wesan i gat planti ol hul em braitpela bilong ol i olsem 50 sentimita, na dispela i makim olsem ol dispela narapela kain pisin bilong bus i save kam long tulait na long taim san i go daun bilong wokim hul i go daun inap 1 mita na bai ol i ken putim kiau bilong ol long en.
Olaman! Ol kiau i bikpela tru! Longpela bilong ol em 8 sentimita i go 9 sentimita na braitpela bilong ol em olsem 6 sentimita, em bikpela kiau tru bilong kain liklik pisin olsem. Taim kiau i bruk na pikinini welpaul i kamap, em i save skrapim graun na wokim rot na bai em i ken lusim hul na i kam ausait, na taim em i kam ausait em yet inap ranawe i go. Na insait long 24 aua em inap flai.
I luk olsem kiau em nambawan kaikai bilong ol asples long dispela ailan, long wanem, olgeta wan wan de ol i save kam daun long ples bilong ol welpaul bilong kamautim kiau bilong ol. Bai yu kirap nogut long olsem wanem ol i save kukim dispela kiau. Ol i brukim kiau bilong welpaul long sap bilong mambu i grinpela yet na ol i kapsaitim kiau i go insait long mambu. Taim kiau i pulap pinis long mambu, ol i slipim liklik antap long paia. I no longtaim na kiau i boil i go i go na i tanim wantaim wara bilong mambu. Taim kiau i tan pinis, ol i brukim mambu na kisim kiau i longpela olsem sosis em i gat narapela kain swit bilong en i gutpela tru. Sapos yu laik traim, orait kam long ol ailan Solomon!