Bai Ol i Go Autim Tok Long Ol Haus?

WANPELA niusman (Greg Burke) i raitim ripot long nius na em i putim het-tok olsem: “Pop i Salim Ol Man Bilong Autim Tok i Go Raun Long Ol Rot Bilong Rom.” Em i tok: “Pop John Paul i kirapim ol Katolik long Itali long bihainim pasin bilong ol lain olsem ol Witnes Bilong Jehova, em ol i kisim planti disaipel long Itali, na go long ol haus na autim tok.

“Long Mande, Pop i tokim 350 man bilong raun autim tok na ol tisa bilong lotu olsem, ‘I no taim bilong sem long Gutnius; em taim bilong sanap antap long rup na autim long ol manmeri.’ . . .

“Em i tokim ol, ‘Mi laik bai wok bilong yupela long autim Gutnius long ol rot . . . i mas karim planti kaikai. Yupela i kirapim gen wanpela pasin bilong autim tok em inap helpim tu ol man i lusim Misin.’ ”

Niusman Burke i tok: “Insait long 20 yia i go pinis, planti man i lusim Misin Katolik long Itali, na ating dispela i mekim na Pop i laik tru bai ol man i go long ol haus na autim tok bilong kirapim gen strong bilong Misin.”

Dispela tok bilong kirapim ol man long “autim tok long ol haus” i no nupela. Wanpela pop bipo, em Paul Namba 6, em i tok Misin Katolik “i stap bilong autim Gutnius.” Na long yia 1991, pop bilong nau, em John Paul Namba 2, em i raitim pas i go long ol bisop (Redemptoris Missio) bilong kirapim misin bilong em long tingim wok bilong ol long bihainim tok bilong Jisas na autim tok long ol manmeri.

Wanpela man bilong raitim ol buk Katolik (Peter Hernon) em i raitim tok long wanpela nius Katolik (Catholic Herald bilong Landon) na em i kamapim askim olsem: “Olsem wanem long wok bilong autim tok?” Em i tingim 10-pela yia (1990-1999) em Misin Katolik i makim bilong wok strong long “autim Gutnius,” na nau sampela yia i lus pinis na wok i no kamap gutpela. Em i askim wanpela bisop, i gat wanem as na wok i no kamap gutpela, na bisop i tok: “Yu no ken hariapim wok. Misin i stap longtaim pinis, winim 2000 yia.”

Olsem na Hernon i tok: “We stap strong bilong autim tok em Jisas i kirapim taim em i salim ol disaipel bilong Em i go autim tok long ol liklik ples nabaut? We stap strong bilong autim tok em Santu Pol i kamapim taim em i tok, ‘Sapos mi no autim gutnius, bai mi stap nogut tru! (1 Ko 9:16)’ ” Yu ting ol Katolik bai bihainim pasin bilong ol Kristen bilong pastaim, em ol i bin autim tok long ples bung na “long olgeta haus”?​—Aposel 5:42; 20:​20.

Hernon i tok, em i save sampela man i no bilip tumas long wok bilong i go long ol haus na autim gutnius; ol i ting dispela pasin ‘em bilong tingting tasol; i no inap wok gut.’ Tasol Hernon i tok, “Dispela pasin inap wok gut, na bilong kamapim klia dispela samting mi mas kolim wanpela tok ol man i no laikim. Mi save ol man i no laikim, long wanem, bipo mi raitim dispela tok long wanpela stori long nius Katolik na ol i rausim dispela hap stori olgeta (na ol i no senisim ol narapela hap stori). Dispela tok i olsem: ol Witnes Bilong Jehova. . . . Ol i save lainim olgeta wan wan Witnes olsem ol man i stap witnes bilong God, ol i misineri na ol i mas autim tok.”

Tru, Hernon i no orait long bilip bilong ol Witnes Bilong Jehova, tasol em i tok, taim man i tingim pasin bilong ol long autim tok, dispela i kirapim em long tingim “pasin bilong ol Kristen bilong pastaim, olsem buk Wok Bilong Ol Aposel i stori long en.”

Ol Witnes Bilong Jehova i wok strong yet long go long ol haus na autim tok, na long dispela rot ol i bihainim tok bilong Jisas na mekim wok em i makim bilong dispela taim nau, em i tok: “Yupela bai i autim tok bilong mi . . . i go inap long olgeta hap bilong graun.”​—Aposel 1:8.