“Tingting Bilong Mi Long Wok Dokta i Mas Mekim i Bin Senis”

AKANE, em wanpela liklik pikinini meri i gat 4-pela krismas long Osaka, Japan, na em i gat bikpela sik long klok bilong em na banis insait long klok i bagarap liklik na wanpela rop i save pas, olsem na ol dokta i mas katim em. Papamama bilong em i askim ol dokta long ol i no ken givim blut long em taim ol i katim em.a

I hatwok long katim ol pikinini i gat sik long klok, long wanem, ol i no gat planti blut. Tasol ol dokta i orait long katim Akane na ol i no ken mekim wok long blut. Ol dokta i mekim wok long save bilong ol na wok bilong ol long katim Akane i kamap gutpela. Akane i kamap orait hariap na nau skin bilong em i strong.

Mama bilong Akane i raitim pas na em i putim nupela piksa bilong Akane insait long pas na em i salim i go long ol dispela dokta i bin insait long wok bilong katim Akane. Wanpela dokta bilong mekim i dai tingting bilong man taim ol i laik katim em, em i bekim pas bilong mama bilong Akane. Na pas i tok:

“Mipela i kirap nogut na amamas tru taim Akane i orait hariap. Mi no inap pasim aiwara bilong mi taim mi lukim dispela naispela piksa yu putim insait long dispela pas yu bin salim. Tasol samting i mekim mi tingting planti, i no long hatwok mipela i bin mekim long katim Akane​—em bilip bilong yupela na bilong mi, long wanem, tupela i narapela narapela kain. Dispela ekspiriens i mekim na nau tingting bilong mi long wok dokta i mas mekim i senis. Ol dokta i mas mekim wok long bikpela save bilong ol bilong lukautim laip bilong ol man, tasol ol i mas tingim bilip na laik bilong sikman tu.”

[Ol Futnot]