Em i Kisim Marasin i No Gat Blut na Em i No Dai

Wanpela man i wok long hetkwota bilong ol Witnes Bilong Jehova i raitim dispela stori bilong Kirap!

LONG Februeri 1991 mi bin i go long Buenos Ares long Ajentina bilong skulim ol man long mekim wok long ol marasin i olsem senis bilong blut na ol i no ken kisim blut tru. Tasol nau mi hap dai, long wanem blut i kapsait long wanpela sua i stap insait long mi.

Sik bilong mi i kirap wanpela wik paslain long dispela, taim mi stap long Meksiko. Bel bilong mi i pen, tasol mi no ting em i bikpela samting. Wanpela dokta i tok bel bilong planti man bilong Amerika i pen taim ol i kam raun long dispela hap na em i givim marasin long mi bilong daunim pen bilong mi.

Narapela de mi kisim balus i go long Buenos Ares na nau pen i go bikpela. Bel bilong mi i hat na tupela de bihain pen i olsem paia. Mi kisim sut bilong daunim dispela pen na bai mi inap mekim ol tok bilong mi long skul. Taim skul i pinis mipela lusim brens-ofis bilong ol Witnes Bilong Jehova na ol i bringim mi i go long haus sik. Ol i tok mi gat wanpela sua long bel na blut i bin kapsait long en, tasol nau em i drai pinis.

Mi kirap nogut long dispela tok bilong dokta, long wanem, inap long nau mi no gat dispela kain sua na bel bilong mi i no save pen. Tasol mipela i ting dispela sik bai pinis sapos mi malolo gut, kisim marasin antasit na kisim kaikai i gutpela long bel bilong mi. Tasol taim mi go i stap long liklik etpos long brens-ofis, blut i kirap gen long ran.

Pekpek bilong mi i blakpela na i gat planti blut long en na skin bilong mi i olsem bilong daiman. Bihain, ai bilong mi i raun na taim mi pundaun nil bilong givim wara long mi i kamaut na meri bilong mi i ran i go na singaut long nes.

Katim Mi o Nogat?

I no longtaim na tupela dokta i stap wantaim mi. Ol i tokim mi, hemoglobin bilong blut bilong mi i go daun long 6.8 gram (man i no gat sik i gat mak olsem 15). Ol i tok ol i telefon long wanpela dokta i gat save long katim man i no laik kisim blut. Em i tok long katim mi wantu tasol. Mi askim ol long sampela narapela rot bilong stretim sik bilong mi.

Wanpela dokta i tok em i ken subim gumi i go daun long nek bilong mi na bai ol i ken lukim bel na ol i ken putim samting long sua na bai em inap long pasim blut.

Mi askim em: “Yu ting dispela bai oraitim sik?”

Em i tok: “Ating.” Na dokta bilong katim man em i tok, sapos dispela samting i no pasim blut, ating bikpela blut tumas bai lus na bai em i no inap mekim wok bilong em long katim mi, olsem na em i mas mekim nau na maski long putim gumi i go long bel na lukim sua.

Mipela tingting planti. Mi holim meri bilong mi na mipela tok gutbai. Mi bin wokim pinis pepa bilong makim husat bai kisim ol mani kago bilong mi sapos mi dai, na mi sainim pinis. Nau ka bilong kisim ol sikman i bringim mi i go long haus sik. Ol pren i ting bai mi dai.

Ol i Katim Mi

Ol i slipim mi long tebol glas. Lait aninit na lait antap i sutim mi. Mi tingting planti, na wanpela dokta i save long dispela, olsem na em i tokim mi: “Yu no ken tingting planti. Bai yu orait.” Em i tingim mi, na dispela i mekim gut bel bilong mi. Ol i mekim dai tingting bilong mi, na kwiktaim ai bilong mi i hevi, na skin i dai, na mi slip olgeta.

Tingting bilong mi i kam bek gen taim ol i litimapim mi na putim mi long wanpela bet. Mi pilim bikpela pen long hap ol i bin katim mi, na ol i bin putim wanpela gumi i go insait long nus na narapela long nek bilong mi, na taim mi pilim ol dispela samting mi pret nogut tru. Meri bilong mi na pren bilong em i stap klostu na ol i mekim gut bel bilong mi. Nek bilong mi i drai, na ol i putim liklik wara long maus bilong mi. Mi stap laip, mi no dai, olsem na mi amamas.

Tasol mak bilong blut i wok long i go daun. Ol i lukim blut i stap long pekpek bilong mi. Blut i wok long lus insait long bel bilong mi, tasol ol dokta i ting dispela i no bilong hap ol i bin katim mi long en.

Ol dokta i ting mi bin kaikai wanpela samting nogut na i katim bel bilong mi o rop bilong pekpek. Ol i tok, nau mi no gat strong inap long ol i ken katim mi gen.

Strong Long Givim Blut

Mak bilong blut i wok long i go daun i go daun, na ol i wok long subim mi long tok orait long ol i ken givim blut long mi. Nes i tok, sapos em i dokta em bai givim blut long mi, maski mi no laik. Long 3 klok moningtaim wanpela dokta i tokim mi: “Yu mas larim mipela i givim blut long yu, nogut yu dai.”

Mi tokim em: “Mi wanpela Witnes Bilong Jehova, olsem na mi no ken kisim blut.” (Wok Pris 17:​10-14; Aposel 15:​28, 29) Dokta i no amamas long tok bilong mi. Mi ting em i no save bilong wanem mi strong olsem long sakim blut.

Ol i subim mi tumas long kisim blut, olsem na mi tokim ol mi laik lusim haus sik. Ol i putim mi long ka bilong haus sik na ol i bringim mi i go long brens.

Samting Bilong Helpim Sik

Dokta long brens em wanpela Witnes Bilong Jehova, na mi askim em, bipo em i bin givim marasin iritropoietin (EPO) long sampela sikman o nogat. Em i tok em i bin mekim olsem. Dispela em wanpela marasin i save kirapim gris long bun na bai em i ken wokim hariap sampela nupela blut. Na skin i mas i gat ol narapela samting tu na bai skin i ken wokim nupela blut, olsem folik-asit, na vitamin B, na ain. Sapos dokta i ken putim marasin Imferon i go insait long rop bilong mi, dispela i gat ain long en na em i ken kamapim blut. Mi tokim em long mekim olsem.a

Tasol i no gat dispela marasin Imferon long Ajentina, em kantri mi stap long en. Na i hatwok long painim long Amerika tu, long wanem, ol i bin salim planti i go long Midel-Is, taim pait i kamap long Galf bilong Persia. Tasol ol i painim pinis sampela, na ol i salim i kam hariap long Ajentina. Wanpela Witnes Bilong Jehova i karim i kam.

Hemoglobin long blut i go daun inap long namba 4 tasol. Wanpela dokta bilong haus sik i kam long brens, em i laik kisim liklik blut bilong glasim, tasol mi tok, nogat, em i no ken kisim moa, nogut sik animia i kisim mi. Em i tok: “Mipela mas kisim na bai mipela i ken save wanem sik i stap insait long bel bilong yu.”

Mi tokim em: “Yu save pinis. Blut i wok long lus. Wanem samting i gutpela moa insait long skin bilong man?”

Em i tok: “Blut.”

Mi tokim em: “Em nau. Olsem na mi no ken givim sampela gutpela blut moa bilong mi.” Ating blut bilong mi i go daun moa inap wanem mak, mi no save.

Long dispela nait mi beten strong long Jehova, mi askim em long stiaim tingting bilong mi bai mi save mi mas mekim wanem, na mi tokim em mi laik i stap laip yet long taim moningtaim i painim mi. Tasol taim mi kirap mi pilim olsem strong bilong laip i laik lusim mi. I olsem mi mas i dai. Mak bilong blut i go daun tru. Bikpela hap blut i lus pinis na liklik hap tasol i stap. Ol i mas mekim sampela samting moa bilong helpim mi.

Long moningtaim mi salim tok long ol dispela dokta bilong lukautim mi, olsem mi laik toktok wantaim ol. Mi tokim ol, ‘Olsem wanem na yupela i no givim vitamin K long mi na bai em i ken strongim blut?’ Kwiktaim ol i orait long givim dispela samting long mi. Na mi askim ol: “Yupela ting sampela narapela marasin yu givim long mi em i as na blut i wok long lus?”

Ol i tok: “Nogat.”

Mi askim ol: “Tru yu save gut na yu tok olsem?”

Long de bihain wanpela bilong ol em i kam tokim mi, ol i bin tingting gen na nau ol i ting ating wanpela marasin i mekim na blut i lus, olsem na ol i no givim moa long mi. Ol i orait long harim gut tok bilong mi na tingim gut ol samting ol i mekim long mi, olsem na mi amamas long ol.

Mi askim ol long sampela nius o buk i toktok long dispela samting, na ol i salim i kam. Wanpela nius i stori long wanpela marasin i save pasim blut na bai i no ken lus. Ol i kolim EPO. Nau Dokta Marcelo Calderon Blanco, em wanpela Witnes, em i kam na i tok, em i laik mekim wok long dispela kain marasin. Orait, nau ol dokta i givim dispela samting long mi. Na long dispela taim marasin Imferon bilong Amerika i kam pinis na ol i givim dispela tu long mi.

Nau mipela wet i stap. Long de bihain mi strong liklik. Tripela de moa na mi larim ol i pulim hap blut bilong mi na bai ol i ken glasim. Ol i kirap nogut! Hemoglobin i kamap inap namba 6! Tasol 5-pela de bipo em i namba 4 tasol na i bin wok long i go daun! Ol dokta i tingting planti. Ol i traim gen, na tru em i namba 6. Tupela marasin hia, em EPO wantaim Imferon, ol i wok long oraitim mi!

Dokta i bin traim blut bilong mi pastaim, em i kam na i tok: “Yu bin kisim blut. Ol i bin givim blut long yu. Mi no bin lukim blut bilong wanpela man em i kamap gut hariap olsem sapos em i no bin kisim blut.” Narapela dokta i tokim em: “Nogat. Em i no bin kisim blut.” Na narapela i tok: “Yupela i mekim wanem na blut i kamap gut olsem?” Na narapela i tok, em marasin EPO na Imferon tasol.

Taim ol i tokim Dokta Amilcar Fernández Llerena long ol dispela samting em i kam lukim mi na em i skelim ol hap skin bilong mi na i tok: “Nau bai mi givim nupela nem long yu​—bai mi kolim yu Lasarus.” (Lukim Jon 11:​38-44.) Mi hatwok long daunim aiwara i laik kamap.

Dokta Llerena i tokim mi: “Yu mas tok amamas long God bilong yu, Jehova, long wanem, nau yu stap na yu no bin dai. Sapos yu man bilong smok o dring o kisim drak, yu no inap winim ol dispela samting. Yu mas dai. Tasol yu bin bihainim lo bilong God, olsem na skin bilong yu i klin na i strong, na yu abrusim dai na yu stap laip.”

Ol samting mi bin mekim i wankain olsem mipela bilong Komiti Olsem Lain Namelman Bilong Ol Sikman Witnes na Dokta i bin skulim ol elda long en long Not Amerika na Yurop na Sentral na Saut Amerika. I gat ol samting i olsem senis bilong blut na i ken helpim sikman na bai i no gat wok long em i mas kisim blut. Dispela komiti i stap long 800 hap, na ol i ken givim dispela save long ol dokta.

Sapos ol narapela Witnes i gat sik olsem, na ol i mas kisim samting bilong helpim blut bilong ol, mi ting sapos ol i save long dispela samting i bin painim mi, dispela bai helpim ol. Haus sik mi bin go long en i tokim brens bilong ol Witnes Bilong Jehova long Ajentina, nau ol i save long pasin bilong helpim ol sikman na i no gat wok long blut, na ol bai amamas long helpim ol Witnes sapos sampela i gat sik.

[Ol Futnot]

[Piksa long pes 13]

Ol i katim mi pinis na mi lusim haus sik