Rot Bilong Ol Dokta i Ken Save Long Tingting Bilong Ol Sikman Witnes
OL DOKTA long olgeta hap ol i save ol Witnes Bilong Jehova i no save kisim blut, tasol planti dokta i no save long sampela samting moa bilong ol Witnes, olsem na taim sikman Witnes i sakim blut, dokta i ting em i mekim pasin kranki, na nau tupela i no wanbel moa.
Sampela dokta i no save ol Witnes Bilong Jehova i orait long kisim marasin na lukim dokta na mekim ol narapela samting bilong stretim sik bilong ol, tasol ol Witnes i no ken tru kisim blut, na dispela lo bilong ol em i bikpela lo bilong Baibel. Nau ol dokta na ol man bilong saiens i kisim nupela save long blut, na nau ol i save dispela lo bilong ol Witnes i stret, na blut inap bagarapim man, na i gat sampela ol narapela samting dokta i ken givim long ol, olsem senis bilong blut. Tasol olsem wanem ol Witnes Bilong Jehova i ken toksave olsem long olgeta dokta?
Komiti Olsem Lain Namelman Bilong Ol Witnes na Dokta
Lain Bilong Bosim Ol Witnes Bilong Jehova ol i tok long kirapim Komiti Olsem Lain Namelman Bilong Ol Witnes na Dokta long ol bikpela taun i gat ol bikpela haus sik long en. Ol i kirapim pinis 100 komiti long Amerika, na ol komiti i gat olsem 5-pela 5-pela memba bilong en, na ol i helpim ol dokta na ol Witnes long save gut long laik na tingting bilong narapela narapela. Long Februeri 19 i go inap Mas 27, 1990, 3-pela memba bilong Bruklin bilong Dipatmen Bilong Givim Toksave long Ol Haus Sik ol i go long 8-pela brens-ofis bilong ol Witnes Bilong Jehova long hap bilong Pasifik.
Ol i laik mekim 3-pela wok olsem: Ol i laik putim ol skul bilong lainim sampela Witnes long mekim wok bilong Komiti Olsem Lain Namelman Bilong Ol Sikman Witnes na Dokta, na ol i laik lainim sampela bilong ol brens long mekim wok bilong Dipatmen Bilong Givim Toksave long Ol Haus Sik, na ol i laik go long ol haus sik na dokta na kirapim ol long helpim yet ol Witnes Bilong Jehova i gat sik na ol i no laik kisim blut. Ol i putim 4-pela skul olsem: Wanpela long Sidni bilong helpim ol Witnes bilong Ostrelia na Nu Silan, na wanpela long Manila bilong helpim ol Witnes bilong Filipin na Hong Kong na Taiwan, na wanpela long Biktaun Ebina bilong helpim ol Witnes bilong Japan na Korea, na wanpela long Honolulu bilong helpim ol Witnes bilong Hawaii.
Ol i mekim wok long ol piksa slait na piksa video bilong stori long blut na long wok bilong blut na long ol samting ol dokta i ken mekim wok long en olsem senis bilong blut, na ol i stori tu long sampela pasin bilong helpim ol Witnes Bilong Jehova sapos ol i gat hevi long blut. Na ol i tok, sapos ol Witnes i no sakim nating tok na laik bilong ol dokta na haus sik, orait, ating dokta na haus sik bai i tingim bilip bilong ol Witnes, olsem ol i no save kisim blut. Wanpela memba bilong komiti bilong Japan i tok: “Skul i lainim mipela long pasin bilong helpim ol dokta na bai ol i ken orait long helpim ol Witnes i gat sik na i no laik kisim blut.” Inap olsem 350 Witnes i bin lain na kisim save long dispela 4-pela skul.
Taim 3-pela memba bilong Bruklin i no kirap yet long raun, ol brens-ofis i stretim tok wantaim ol bikpela dokta na ol bikman bilong ol bikpela haus sik na bai 3-pela memba i ken toktok wantaim ol long pasin bilong lukautim ol Witnes i gat sik na dokta i no ken givim blut long ol. Ol brens-ofis i makim 3-pela lain bilong i go toktok wantaim ol dispela dokta long haus sik, na wanpela memba bilong Bruklin i ken go wantaim ol wan wan lain na em i olsem gopas o maus bilong ol. Taim ol i go lukim ol dokta, dispela 3-pela lain i kisim save long wok bilong ol olsem memba bilong Komiti Olsem Lain Namelman Bilong Ol Witnes na Dokta, na ol i lain long pasin bilong toktok wantaim ol dokta. Insait long 6-pela wik ol i go lukim 55 dokta na haus sik na toktok wantaim ol.
Ol i Harim Tok
Ol i mekim gutpela wok. Long Ostrelia wanpela lain komiti i toktok wantaim minista helpim bilong provins Nu-Saut-Weils, em i save lukautim ol samting bilong sik, na ol i stori long planti haus sik i bin katim ol Witnes i gat sik na ol i no mekim wok long blut. Na ol i tokim dispela minista helpim olsem: Ol Witnes Bilong Jehova long hap bilong Saut Pasifik, taim ol i gat sik na dokta i mas katim ol, i gutpela sapos ol i ken kam long Ostrelia na ol dokta i ken mekim dispela wok na no ken givim blut long ol. Dispela minista i ting gavman inap long makim sampela dokta long mekim olsem. Long Ostrelia ol komiti i mekim 22 raun bilong lukim ol dokta olsem. Dairekta bilong wanpela haus sik i tok: “Yupela save gut long ol samting bilong blut na ol senis bilong en, winim mipela.” Na narapela bikman i save bosim 7-pela haus sik em i tok em bai makim wanpela bikpela dokta na em i ken painim rot bilong kirapim wanpela lain dokta long wanpela bilong ol dispela 7-pela haus sik, na sapos sampela Witnes Bilong Jehova i gat sik na dokta i mas katim ol, dispela lain dokta i ken mekim na ol i no ken givim blut long ol.
Long Manila i gat wanpela haus sik bilong ol sikman em klok bilong ol i gat sik, na ol man i tok, dispela haus sik i winim ol narapela haus sik olsem long hap bilong Is. Komiti i toktok wantaim dairekta bilong dispela haus sik na ol i tokim em long 100 Witnes Bilong Jehova i wetim ol dokta i katim ol na stretim sik bilong klok, tasol haus sik i putim ol i go bihain, long wanem, ol i no ken kisim blut. Dairekta i tok, dispela pasin i no stret, na em bai stretim. Na komiti i toktok wantaim dairekta bilong nambawan haus sik bilong Filipin, na ol i soim long em ol buk na nius i stori long pasin bilong dokta long katim man na i no gat wok long blut. Dairekta i tok, dispela pasin i gutpela na i winim blut, na i no gat narapela pasin bilong abrusim sik AIDS na sik hepataitas i save stap long planti blut. Em i tok em bai stretim rot na bai ol Witnes i gat sik ol i ken kam long haus sik bilong em na ol dokta i ken katim ol na ol i no ken mekim wok long blut. Em i presiden bilong bosim blut ol i bungim long haus sik.
I gat skul inap 3-pela de long Japan, na 44 Witnes bilong Korea i kam, na 5-pela i dokta. I gat 255 Witnes bilong Japan i kam long skul, na 41 i dokta, na sampela i niurosejen, olsem wanpela kain dokta bilong katim man, na sampela i gat wok long mekim dai tingting bilong sikman taim dokta i laik katim em, olsem anitetis, na tupela loya. Ol i kamapim 20 komiti long Japan na 7-pela long Korea.
Taim skul i pinis 3-pela tisa bilong Bruklin i go wantaim ol komiti bilong lukim ol dokta na haus sik long hap bilong Tokyo na traim long kamap wanbel wantaim ol long ol samting bilong blut. Wanpela memba bilong komiti bilong Japan em i tok: “Mipela bungim wanpela profesa helpim bilong wok bilong helpim ol meri long karim pikinini, em i bilong haus sik long wanpela yunivesiti. Em i bin helpim 10-pela meri Witnes long karim pikinini bilong ol. Wanpela i bin lusim bikpela blut inap 2.8 lita, na mak bilong himoglobin bilong blut bilong em i go liklik inap 35 grem long ol wan wan lita blut. (Long blut bilong ol meri i mas i gat 140 grem bilong ol wan wan lita blut.) Tasol dokta i helpim meri long karim gut pikinini na dokta i no givim blut long meri. Dokta i bilong lotu Buda, tasol em i no save bikhet long bilip bilong ol sikman. Em i tok em bai orait long helpim ol Witnes i gat sik.”
Wanpela dokta em i dairekta bilong wanpela haus sik long Yokohama em i tok em i orait long ol Witnes i ken kam long haus sik bilong em sapos ol narapela haus sik i sakim ol. Em i tok: “I hatwok long katim ol Witnes Bilong Jehova sapos i no inap mekim wok long blut, tasol mi orait long mekim olsem long ol, long wanem, dispela bai helpim mi long lain moa long dispela wok dokta.” Na narapela dokta bilong Yokohama, em i dokta bilong ol meri, em i tok: “Sapos sikman i tambu long blut, mi no ken givim blut long em, na sapos mi kot long dispela samting, bai mi givim bel long helpim dispela laik bilong sikman.”
Ol komiti em 3-pela memba bilong Bruklin i bin kirapim long Korea ol i tok, wok bilong ol i kamap gutpela. Long Me 26 ol i go long Haus Sik Yunivesiti Yonsei, em bikpela lain haus sik long Korea i stap long 3-pela hap, na 62 dokta bilong dispela 3-pela hap ol i bung bilong toktok wantaim dispela komiti. Wanpela profesa bilong wok anitetis em i mekim wanpela tok long dispela wok ol dokta i mekim long taim ol i laik katim ol Witnes Bilong Jehova i gat sik. Ol bai putim dispela tok bilong em i go long wanpela nius bilong ol dokta long Korea em i gat ol tok bilong dispela kain wok. Ating ol haus sik na dokta bai harim tok bilong dispela profesa, long wanem, em i bilong dispela bikpela nambawan haus sik long Korea. Long dispela skul i bin kamap long Japan, ol i kamapim olgeta tok bilong dispela nupela wok bilong ol dispela komiti.
Ol i redim 5-pela komiti bilong Hawaii, na olgeta ol i bung long Honolulu na bai ol i ken skul. Planti ol i go lukim ol haus sik. Dairekta bilong wanpela haus sik (Hawaii Healthcare Center) i tok, em bai raitim wanpela stori bilong ol Witnes Bilong Jehova na putim long nius bilong haus sik na salim i go long olgeta haus sik long Hawaii.
Long bikpela haus sik (Queen’s) long Honolulu, komiti i tokim ol long wanpela pepa bilong haus sik i gat wanpela tok i no stret long ol Witnes Bilong Jehova—pepa i tok, sapos dokta i laik givim blut long ol Witnes, ol i sakim dispela blut i save helpim man long i stap laip na ol i tok ol i ken dai. Tasol komiti i tokim ol, ol Witnes i no laik dai, nogat; ol i save go long haus sik na bai dokta i ken helpim ol long i stap laip. Na i olsem pepa i laik tok, blut i gutpela bilong helpim ol long i stap laip, na sapos ol i no kisim blut ol bai dai; tasol pepa i no tok sapos ol i kisim blut ol inap i dai tu, long wanem, blut yet inap kilim ol i dai; na pepa i no tok i gat sampela ol narapela samting man i ken kisim tu sapos em i no laikim blut. Loya bilong haus sik i tok: “Mi laik lukim dispela pepa!” Em i kaunim, na nau em i tok: “Mi no bin raitim ol dispela tok!” Bos bilong haus sik i tokim em: ‘Mitupela i mas stretim ol tok bilong dispela pepa.’
Nupela Komiti i Mekim Wok
Taim ol i skul pinis, sampela de bihain ol man i bringim hariap wanpela meri Witnes i kam long haus sik, em i gat sik animia, olsem sot long blut, na mak bilong blut bilong em i go liklik na em inap bagarap. I no gat blut i kapsait, tasol ol i laik katim em na lukluk long insait bilong em, na dokta i tok, bilong mekim olsem, em i mas givim blut long em. Olsem na lain bilong meri i kisim em i go long narapela haus sik, tasol dokta bilong dispela hap tu i laik givim blut long em. Nupela komiti i kam na i toktok wantaim dairekta na dokta, na komiti i tok, dokta i mas mekim wanpela samting bilong helpim dispela meri, tasol dokta i no laik katim em, olsem na dairekta i rausim dispela dokta na i singautim tupela dokta moa i kam. Tupela i katim meri, na ol i painim as bilong sik bilong em, na ol i stretim, na nau em i orait pinis. Tasol sapos i no gat dispela komiti i stap, ating sista bilong yumi bai dai, na ol nius samting bai mekim bikpela stori long dispela na ol bai tok, ‘wanpela Witnes i dai long wanem em i no kisim blut.’ Tasol sampela Witnes i bin sik na dokta i mas katim ol long pasin i no gat wok long blut, tasol ol i no laik mekim, olsem na ol dispela Witnes i dai. Sapos i gat gutpela dokta bilong mekim dispela wok, ating ol dispela Witnes bai stap yet.
Nau long olgeta hap ol komiti olsem lain namelman bilong ol Witnes na dokta ol i wok long helpim ol dokta na ol Witnes na bai narapela i ken save gut long tingting bilong narapela. Dispela wok bilong ol komiti i kamap gutpela. Nau planti dokta i save, sapos ol i mekim gutpela wok dokta na ol i katim gut man, ol inap helpim ol Witnes long sik bilong ol. Long Amerika i gat 6,500 dokta i orait long mekim dispela wok.
Ol Witnes i mas traim long harim tok bilong ol dokta na no ken tok pait wantaim ol sapos inap. Olsem na ating sampela dokta bai tingim gutpela lo na pasin bilong ol Witnes na bai ol i bihainim laik bilong ol. Wanpela profesa helpim long skul koles bilong ol dokta long Tokyo i tok: “Mi save givim biknem long ol sikman Witnes. Ol i gat ol gutpela lo, na ol narapela man bilong graun i no olsem.”
Ol dispela skul na wok bilong komiti long i go lukim ol dokta, ol dispela samting i bilong helpim ol sikman Witnes na ol dokta long wok gut wantaim na bai kros i no ken kamap long ol samting bilong blut. Ol komiti na ol narapela i bin insait long dispela wok ol i bin mekim gutpela wok. Yumi ting Jehova bai mekim gut yet dispela wok na em bai strongim ol man i bihainim tok bilong em long abrusim blut, olsem Baibel i tok.
[Blok long pes 26]
Stat 9:3, 4: “Yupela i ken kaikai olgeta abus na ol samting i save wokabaut long graun na ol kain kain sayor. Mi givim olgeta olsem kaikai bilong yupela. Wanpela samting tasol yupela i no ken kaikai, em mit i gat blut i stap yet long en, long wanem, blut em i as bilong laip.”
Wok Pris 17:10-12: “Taim yupela i kilim abus, yupela i mas katim nek bilong en na larim olgeta blut i ran i go daun. Na sapos wanpela man bilong yupela Israel o wanpela man bilong narapela lain i stap wantaim yupela i kaikai mit i gat blut i stap yet long en, bai mi Bikpela, mi birua long em na rausim em long lain manmeri bilong mi. Blut i save givim laip long olgeta man na animal. Olsem na mi tokim yupela olsem. Pris i mas kapsaitim blut bilong ofa long alta, bilong tekewe ol sin bilong yupela manmeri. Blut tasol i as bilong laip, na blut tasol i save tekewe sin bilong yupela ol manmeri. Olsem na mi tokim yupela Israel, i no gat wanpela bilong yupela o bilong ol arapela lain i stap wantaim yupela i ken kaikai mit i gat blut i stap yet long en. I tambu tru.”
Aposel 15:28, 29: “Holi Spirit i stap wantaim mipela na mipela i pasim tok olsem, mipela i no laik putim planti hevi long yupela. Olsem na yupela i mas bihainim ol dispela pasin tasol. Yupela i no ken kaikai abus ol i bin kilim bilong mekim ofa long ol giaman god. Na yupela i no ken kaikai abus i gat blut i stap yet long en, olsem na yupela i no ken kaikai abus ol man i bin pasim nek bilong en na kilim i dai. Na yupela i mas abrusim olkain pasin pamuk. Sapos yupela i lukaut gut na yupela i abrusim ol dispela pasin, em bai i gutpela. Em tasol tok bilong mipela. Yupela i ken i stap gut.”
[Piksa long pes 25]
Skul Bilong Ol Komiti—Mas 12, 1990