Em Wok Bilong Dokta
SAMTING olsem 7-pela yia i go pinis, wanpela manki i gat 10-pela krismas, nem bilong em Dai Suzuki, em i stap insait long ka na dispela ka i bam, na bihain em i dai long haus sik. Ol lain bilong raitim nius i tok olsem papamama i gat asua, long wanem, ol i bihainim tok bilong Baibel na ol i no laik bai pikinini bilong ol i kisim blut. Papamama bilong Dai i Witnes Bilong Jehova. Bihain polis i skelim gut dispela samting na ol i tok papamama i no gat asua.
Ol Witnes Bilong Jehova long Japan na long ol narapela hap i pilim tru bikpela wok ol dokta i save mekim bilong helpim ol sikman long stap laip, na ol i amamas long bihainim tok bilong ol narapela wokman bilong haus sik tu. Ol i save kisim ol marasin na larim ol dokta i katim ol bilong stretim sik bilong ol—blut tasol ol i no save kisim. Sapos ol dokta i laik givim blut long ol o mekim ol narapela samting, na ol Witnes i pilim olsem dispela samting i pait wantaim tok bilong Baibel, orait ol i save bihainim tok bilong God. (Aposel 4:19) Baibel i tok klia olsem: ‘Yupela i no ken kaikai blut.’—Aposel 15:29.
Ol Witnes Bilong Jehova i bilip olsem tok bilong God i namba wan na tok bilong man i namba tu tasol. Olsem na taim dispela hevi i kamap, ol i save orait long kisim ol narapela marasin samting, blut nogat. Planti taim ol dokta i ting i hatwok sapos ol i no mekim wok long blut, tasol planti dokta na planti bos bilong haus sik long nau i painim ol nupela rot bilong stretim sik bilong ol Witnes Bilong Jehova. Wanpela nius (Mainichi Shimbun) bilong Japan i tok olsem: ‘Sampela haus sik i orait long katim man na ol i no mekim wok long blut.’
Dispela nius i stori olsem long Haus Sik Ageo Kosei, ol i katim 14 Witnes Bilong Jehova namel long 1989 na Janueri 1992, na ol i no mekim wok long blut. Ol dispela Witnes i stap orait. Wanpela lo bilong dispela haus sik i olsem: Ol dokta i mas tokaut pastaim long ol Witnes i gat sik olsem hamas blut inap lus na wanem ol hevi inap painim ol sapos ol i katim ol na ol i no mekim wok long blut. Bihain ol Witnes i raitim tok long pepa olsem ol i no laik kisim blut, orait nau dokta bai katim ol na em i no mekim wok long blut.
Wanem samting i kirapim ol lain bilong dispela haus sik long orait long helpim ol Witnes Bilong Jehova na wanbel long bilip bilong ol, maski planti haus sik i no laik helpim ol? Dispela nius i tok bikman bilong haus sik, em Toshihiko Ogane, i tok: ‘Wok bilong dokta olsem em i bin tok promis, em bilong tingim laik bilong sikman long wanem marasin samting em i laik bai dokta i givim long em o i no ken givim long em. Nau dokta i mas mekim wok long save bilong em long stretim dispela sik. Olsem na pasin bilong dokta na sikman long stretim gut tok pastaim em i bikpela samting.’
Dispela nius i tok: “Ol lain Witnes Bilong Jehova i bin kamapim ol Komiti Olsem Lain Namelman Bilong Ol Sikman Witnes na Dokta long 53 biktaun long Japan bilong helpim lain bilong ol. Wok bilong dispela komiti i bilong stretim tok wantaim dokta long haus sik long katim man na i no mekim wok long blut.” Olsem na planti haus sik i redi long bihainim laik bilong ol Witnes Bilong Jehova long ol marasin samting.
Long nau, winim 1,800 dokta long Japan na 24,000 long olgeta hap bilong graun i amamas long bihainim tingting bilong ol Witnes Bilong Jehova na i no mekim wok long blut. Winim 800 bilong dispela lain komiti bilong lain Witnes i stori pinis long planti dokta.