Ripot Long Wok Bilong Kingdom
Ol i Helpim Yumi Long Tingim Blut i Samting Holi
LONG olgeta hap bilong graun ol wokman bilong Jehova i kamapim klia olsem ol i stap gut long God long pasin bilong tingim blut i samting holi. (Aposel 15:28, 29) Lain wokboi i gat gutpela tingting i bin helpim ol lain brata Kristen long dispela samting. (Matyu 24:45-47) Orait, nau yumi ken stori long ol gutpela samting i bin kamap long dispela long kantri Filipin.
Brens-ofis bilong Filipin i tok: “Long 1990, Sosaiti i toksave long mipela olsem sampela brata bilong Betel long Brooklyn bai kamapim wanpela bung long Filipin. Ol i bin singautim sampela brata long ol narapela brens-ofis bilong Esia, olsem Korea, Taiwan, na Hong Kong. Ol i mekim dispela bung bilong helpim ol brata long kamapim Hospital Infomesen Sevis long brens-ofis bilong ol, na tu, long kamapim sampela Hospital Lieson Komiti. Long Filipin, pastaim ol i kamapim ol komiti long 4-pela biktaun.” Ol komiti bai wok long painim ol dokta i redi long wok wantaim yumi long holimpas ol lo Kristen long ol samting bilong blut. Ol bai helpim tu ol brata long taim ol i kisim hevi long samting bilong blut.
Ol i makim Remegio long wok wantaim Hospital Lieson Komiti long Baguio. Long ol yia bihain, ol dokta i luksave long ol gutpela samting i kamap long dispela wok. Remegio i tingim bek wanpela taim we sampela dokta i bin bung wantaim Hospital Lieson Komiti na ol i laik save long pasin bilong helpim ol sikman Witnes i no laik kisim blut. Remegio i tok: “Ol dokta i kamapim planti askim, tasol i hatwok long mi long bekim ol dispela strongpela askim.” Em i beten askim Jehova long helpim em long dispela hevi. Remegio i tok moa: “Taim wanpela dokta i kamapim pinis wanpela askim, sampela narapela dokta i apim han na tokaut long ol samting ol i mekim long kain taim olsem.” Remegio i amamas tru long helpim em i kisim, na em i amamas moa yet, long wanem, dispela taim bilong tromoi ol askim na kisim ol bekim i stap inap 2-pela aua.
Long nau i gat 21 komiti long olgeta hap bilong kantri, na 77 brata i wok wantaim ol dispela komiti. Danilo, wanpela dokta Witnes, i tok: “Ol dokta i luksave olsem ol sikman Witnes i gat helpim bilong wanpela oganaisesen i save lukautim ol gut long pasin sori.” Pastaim wanpela dokta i no laik katim wanpela brata i no laik kisim blut. Tasol brata hia i strong long sakim blut. Dokta i katim em na operesen i kamap gutpela. Hospital Infomesen Sevis i tok: “Dokta i kirap nogut long brata i kamap orait hariap. Em i tok: ‘Taim mi tingim ol samting i bin kamap long nau, sapos wanpela long lain bilong yupela i mas kisim kain operesen olsem na i no laik kisim blut, mi amamas long mekim operesen.’ ”