Ol i No Majikman o Wanpela God

EM STORI BILONG MERCY UWASI BILONG NAIJIRIA

WANPELA apinun long Mas 1992 long Wes Afrika, bel bilong mi i kirap long pen. Mi bin go wantaim famili bilong mi long gaden bilong kamautim tapiok i redi pinis. Taim mipela stap long gaden, bel bilong mi i pen olsem paia i stap insait long bel. Taim mipela kamap long haus, pen i no liklik, em i bikpela tru. Mi traut na mi hatwok long pulim win. Pen i mekim na mi hatwok long sanap o wokabaut, olsem na mama i hatwok long sindaunim mi insait long wanpela teksi. Nau teksi i siksti i go long haus sik.

Dokta long haus sik em wanpela man mi bin autim tok long em, taim mi raun na stori long ol gutpela samting Baibel i tok yumi ken wetim i kamap bihain. Bel bilong mi i solap na taim em i putim han long bel bilong mi em i askim mama, blut i wok long lus o nogat. Mama i tok yes, long wanem, mi gat sik bilong mun.

Dokta i tok: “Pikinini bilong yu i gat bel 5-pela mun pinis. Blut i wok long lus, long wanem, em i bin kirap traim long rausim bel.”

Mama i tok: “Nogat! Pikinini bilong mi i no pikinini bilong pamuk.”

“No ken tok olsem. Long nau olgeta pikinini meri i save giamanim papamama. Em i gat bel.”

Nau mi kirap na tokim dokta mi wanpela Witnes Bilong Jehova na mi bin go bikpela insait long wanpela famili Kristen. Bel bilong mi i lain pinis long ol lo bilong Baibel, olsem na mi no inap pamuk.

Dokta i tokim mama: “Mama, maski long lotu o giamanim bel bilong yu. Mi tok tru​—dispela pikinini i gat bel 5-pela mun pinis.”

Mama i tokim mi: “Kirap. Yumi go long narapela haus sik.” Taim mipela kam ausait, mi sindaun long gras na krai, long wanem, bel bilong mi i pen nogut tru. Mama i kisim mi kwik i go long haus na tokim papa long ol samting dokta i bin tok long en.

Papamama i pasim tok long kisim mi i go long wanpela bikpela haus sik i gat planti samting long en, na em i wanpela haus sik bilong lainim ol man long kamap dokta o nes samting. Taim mipela wok long go long haus sik, mi beten askim Jehova long lukautim mi na mi no ken i dai. Mi no laik bai ol man i bagarapim nem bilong Jehova na tok mi bin dai, long wanem, mi laik rausim bel. Mi tokim Jehova, sapos mi dai na ol Witnes Bilong Jehova i go autim tok long dispela dokta, em bai tok: “Ating bipo wanpela bilong lain bilong yupela i bin kam hia na em i gat bel, a?” Na mi beten askim Jehova long opim rot na mi ken go bek long dispela dokta na autim tok gen long em.

“Em i Nupela Meri Yet!”

Long dispela bikpela haus sik tu ol dokta i tok mi gat bel. Mi gat bikpela pen, olsem na mi krai i stap. Wanpela dokta i tok strong olsem: “Yupela olgeta pikinini meri i mekim wankain pasin. Yupela kisim bel na bihain yupela krai.”

Ol dokta i glasim skin bilong mi, na taim ol i mekim olsem ol i no isi long sutim sampela askim long mi olsem: “Yu marit?”

Mi tok: “Nogat.”

“Yu gat hamas krismas?”

“Mi gat 18 krismas.”

“Yu gat hamas boipren?”

“Mi no gat wanpela.”

Nau bikpela dokta i bikmaus na tok: “Olsem wanem? Yu laik tokim mi yu gat 18 krismas pinis na yu no gat wanpela boipren?” Olsem mi bin mekim long namba wan haus sik, mi kirap na tokim dispela dokta long bilip Kristen bilong mi. Em i askim mi: “Yu wanpela Witnes Bilong Jehova?” Taim mi tok yes, em i no givim wanpela askim moa long mi.

Samting ol dokta i mekim bilong glasim skin bilong mi i kamapim olsem mi no gat bel. Mama i harim wanpela dokta i tokim narapela dokta olsem: “Em i nupela meri yet!” Ol dokta i tok sori long mi na tok: “Yu no ken kros long mipela i bin ting yu gat bel. Olgeta de mipela i lukim ol yangpela meri i kam long haus sik na ol i gat bel.” Tasol sampela hevi moa bai kamap, i no dispela tasol.

‘Yu Mas Kisim Blut’

Ol dokta i putim wanpela masin ol i kolim altrasaun long bel bilong mi na ol i kisim save olsem wanpela sua i bin kamap long wanpela rop bilong bel (fallopian). Bikpela bilong en i olsem traipela muli. Ol dokta i mas katim mi.

Kwiktaim mi tokim ol dokta mi no ken kisim blut, tasol mi amamas long kisim wara i gat marasin long en. Ol dokta i strong long mi mas kisim blut.

Wanpela yangpela man i lain long kamap dokta em i tok bilas long mi olsem: “Tok bilong yu i wankain long tok bilong wanpela wanlotu bilong yu bipo. Em tu i tok em i no laik kisim blut, tasol taim sik bilong em i go bikpela moa, em i amamas long kisim blut.”

Mi tok: “Mi narapela kain. Taim mi tok yes, em yes. Taim mi tok nogat, em nogat. Mi no ken tru lusim bilip bilong mi.”

Bihain tripela dokta i kam lukim mi na askim mi, i gat wanem as na mi no laik kisim blut. Mi tokim ol, Baibel i tok ol Kristen i “no ken kaikai abus i gat blut i stap yet long en.”​—Aposel 15:20.

Tasol ol dokta i tok: “Tasol blut i no ken go insait long maus bilong yu, em bai go insait long wanpela rop bilong blut, em tasol.”

Mi tokim ol dokta, maski blut i go insait long maus o insait long wanpela rop bilong blut, em wankain pasin.

Long Sarere, Mas 14, wanpela wik bihain long pen i bin kirap long bel bilong mi, nambawan dokta bilong katim ol man i kam na glasim skin bilong mi. Ol i makim em bilong katim mi. Nau i no bel tasol i solap, bros bilong mi tu.

Em i tok: “Olsem wanem? Ol i tokim yu pinis yu mas kisim blut?”

Mi bekim tok olsem: “Yes Dokta, ol i tokim mi, tasol mi no ken tru kisim blut.”

Em i tok: “Orait, mi laik tokim yu olsem: Yu bai kisim blut. Sapos yu no kisim blut bai yu dai. Taim mi kam long Mande bilong katim yu na ol i no redim pinis blut, mi no ken katim yu. Sapos yu no laik kisim blut, orait, mi no laik katim yu.”

Nau dokta i lukim wanpela buk klostu long bet bilong mi na i askim mi olsem: “Em Baibel bilong yu?” Mi tok, nogat; em buk Nambawan Man Tru i Winim Olgeta Narapela Man.a Em i tokim mi, mi mas mekim wok long dispela buk na beten long mi no ken i dai. Mi tokim em, mipela i no save kaunim beten long wanpela buk. Taim mipela i gat hevi na beten long Jehova, beten bilong mipela i kamap long bel.

Inap tupela de planti dokta na nes i kam i go bilong tokim mi long kisim blut. Ol i tok​—nogut mi dai​—mi yangpela yet. Ol i tok: “Kisim blut na stap laip!”

‘Jehova i Stap Wantaim Mi’

Taim mi karim ol dispela hevi mi save kaunim Song 118. Sampela tok bilong en i olsem: “Mi gat bikpela hevi na mi prea long Bikpela, na em i harim mi na i pinisim dispela hevi. Bikpela i stap wantaim mi na mi no inap pret. Ol man i no inap mekim wanpela samting long mi.”​—Song 118:​5, 6.

Mi tingim tingim ol dispela tok, na bihain bilip bilong mi long Jehova i strong moa. Papamama i kam long haus sik na mi soim dispela tok bilong Baibel long ol, na tupela tu i pilim olsem dispela tok i strongim bilip bilong ol.

Taim mi karim dispela hevi long blut papamama i sambai long mi, na ol i beten askim Jehova long helpim mi. Na ol wanlotu bilong mi tu, ol i beten na strongim mi long rot bilong Baibel.

“Mipela i No Ol Majikman”

Ol dokta i laik katim mi long Mande, Mas 16, long moningtaim. Wanpela dokta i kam long mi na lukim wanpela liklik kat mi holim (Medical Directive). Dispela liklik kat i stori long bilip bilong mi long blut. Dokta i tok: “Em wanem samting? Taim yu tok, yu no laik kisim blut, yu tok tru, a?”

“Mi tok tru. Mi no ken kisim blut.”

Dokta i tok: “Orait, mipela i no ken katim yu.”

Nau dokta i telefon long mama. Mama i tok: “Em i no liklik pikinini, em yet i ken tok na kamapim bel bilong em. Mi no inap bosim tingting bilong em. Pikinini i tok, bel bilong em i lain pinis long ol lo bilong Baibel, olsem na em i mas bihainim tok bilong bel.”

Man! Nau dokta i kros na tromoi ol pepa bilong mi long tebol na lusim rum. Inap 5-pela aua mipela i no harim wanpela tok long ol dokta. Bel i pen na mi no inap kaikai, na i no gat narapela haus sik long dispela hap.

Mi kirap nogut tru taim ol i karim bet sel i kam bilong karim mi i go long rum bilong katim man. Mi holimpas liklik kat “No Ken Givim Blut.” Taim ol i karim mi i go long rum bilong katim man, mi lukim ol tul bilong dokta na ol bek plastik i gat blut long en. Nau mi kirap na krai; krai bilong mi i no liklik. Mi krai na tok mi no ken tru kisim blut. Wanpela nes i tokim mi long tromoi liklik kat bilong mi long plua; mi no ken kisim kat i go insait long rum bilong katim man. Mi tokim em mi no ken go insait long rum sapos mi no inap karim kat i go bilong soim long nambawan dokta. Nau nes i pulim kat long mi na kisim i go long nambawan dokta. Wantu tasol nambawan dokta na 5-pela dokta moa i kam lukim mi, em ol i pasim pinis klos bilong katim man.

Nambawan dokta i belhat nogut tru. Em i singautim mama na makim long pinga bel bilong mi na tok: “Mama, lukim bel bilong em. Mipela i no save tru wanem samting mipela bai painim insait long bel bilong em. Sapos mipela i mas katim em bikpela, dispela bai mekim na blut bai kapsait bikpela. Olsem wanem? Yu laik bai blut bilong em i kapsait i go i go na blut i pinis olgeta na em i dai?”

Mama i bekim tok olsem: “Dokta, mi save Jehova bai sambai long pikinini na em bai sambai long yu tu. Mekim long strong bilong yu na larim i stap long han bilong Jehova.”

Nau dokta i tok: “Yu ting mipela i olsem ol majikman o dokta bilong ples? Mipela save mekim ol samting mipela i lain pinis long mekim. Mi no ken tru katim pikinini bilong yu sapos mi no inap mekim wok long blut.”

Mama i krai long dokta i mas mekim ol samting long strong bilong em. Bihain em i tok em bai katim mi na em i no ken mekim wok long blut. Em i askim mi, mi pret o nogat. Mi tok: “Nogat. Mi no pret long dai. Mi save Jehova i stap wantaim mi.”

“Wok Yet Long Mekim Laik Bilong God Bilong Yu”

Insait long wanpela aua ol dokta i katim mi pinis. Ol i no hatwok long kamautim dispela sua. Ol dokta na nes i kirap nogut tru.

Bihain wanpela dokta i tokim mama, long nait taim ol yangpela man i lain long kamap dokta ol i stap long rum slip bilong ol, ol i save toktok long ol samting i bin kamap long mi. Nau taim mitupela mama i go long haus sik, ol i save mekim gut long mipela.

Tupela de bihain long ol dokta i katim mi, nambawan dokta i kam na askim mi, mi stap olsem wanem. Na em i tok: “Yu mas wok yet long mekim laik bilong God bilong yu. Tru tumas, em i bin helpim yu.”

[Ol Futnot]