“No Ken Tok, i No Inap!”

SAVEMAN 9:11 i tok olsem, ‘Taim nogut i save painim yumi olgeta.’ Dispela samting i kamap long famili bilong mipela long pinis bilong Novemba 1986. Tiarah, em wanpela bilong 3-pela pikinini bilong mipela, em i gat 3 yia hap tasol taim em i kisim strongpela kus. Mipela i kisim em i go long wanpela dokta em i save skelim sik bilong ol pikinini, na em i salim mipela i go long narapela dokta. Em i ting Tiarah i gat kus tasol, na em i tok mipela i no ken tingting tumas. Em i raitim nem bilong sampela marasin bilong kus em mipela inap baim long haus sik.

Sik bilong Tiarah i go bikpela. Skin bilong em i hat tru, na em i traut, na pekpek wara samting, na bros bilong em i pen. Ol i kisim piksa eksre bilong bros bilong em, na ol i givim sampela marasin moa long em. Bihain nes i singautim mipela i kam bilong lukim eksre bilong Tiarah. Ol dokta i ting em i gat sik numonia. Skin bilong em i hat moa yet. Na strong bilong blut bilong em i go daun tu. Long Disemba 16, Tiarah i go slip long haus sik.

Mipela i Witnes Bilong Jehova na mipela i bihainim tok i stap long Aposel 15:​29, em i tok ol Kristen i mas klia long blut. Tasol long dispela taim mipela i no ting ol bai mekim wok long blut. Dokta bilong Tiarah em i save gut long ol wok bilong blut, na em i save mipela i no inap orait long ol i givim blut long Tiarah. Taim Tiarah i go slip long haus sik, hariap tru mipela i tokim gen dokta long bilip bilong mipela long blut. Em i bekim tok olsem: “Em i orait, mi save long bilip bilong yupela, tasol mi no ting ol bai mekim wok long blut sapos ol dokta i tingting long katim em samting.”

Ol dokta long haus sik i kisim piksa eksre, na blut bilong Tiarah bilong skelim wanem sik tru em i gat, na bihain ol i kisim Tiarah i go long wanpela rum. Mipela i stap wantaim em inap em i slip. Long moningtaim ol i tokim mi olsem Tiarah i gat strongpela sik numonia, na inap 10 o 15-pela de samting em bai stap long haus sik. Skin bilong Tiarah i hat yet na ol dokta i tingting planti. Ol i skelim gen ol piksa eksre na blut ol i bin kisim, na ol i tok ol i mas skelim moa yet. Bihain ol i save olsem em i no gat sik numonia​—ol i ting em i gat wanpela kain sua long wetlewa bilong em.

Tok i Kamap Long Kisim Blut

Long dispela as tasol planti samting i senis. Ol i glasim em planti taim, na ol i glasim em bilong sik tibi tu, tasol em i no gat. Ol i kisim kain kain piksa eksre samting. Ol laspela piksa eksre i soim olsem wetlewa i stap long han sut i gat bikpela sua long en. Wetlewa long han kais tasol i mekim bikpela wok bilong pulim na rausim win. Ol dokta i kirap toktok gen long givim blut long em. Taim Tiarah i bin go slip long haus sik, mipela i bin sainim sampela pepa long tokaut olsem sapos ol dokta i no givim blut long Tiarah na em i dai, orait em i no asua bilong ol. Tasol nau ol i ting olsem pikinini bilong mipela inap dai, olsem na mipela bai senisim tingting na orait long ol i givim blut long em.

Taim mipela i no senisim tingting, senis i kamap. Ol lain bilong haus sik i tok mipela i no gutpela papamama, na ol i tok ol bai kisim tok orait long kot long givim blut long Tiarah, na ol bai kisim narapela tupela pikinini bilong mipela. Ol i wetim tok orait bilong kot, na taim tok orait i kamap ol bai rausim dispela wetlewa nogut. Mipela i tokim ol gen olsem, mipela i no birua long pasin bilong stretim sik bilong ol man, na maski mipela i save sakim blut, mipela i orait long kisim sampela marasin i olsem senis bilong blut.

Ol dokta i no laik harim tok bilong mipela. Ol i laik painim rot bilong subim mipela long senisim tingting bilong mipela. Ol i tokim ol man​—em ol dokta na nes na ol man i wok long haus sik​—long samting mipela i wok long mekim long pikinini bilong mipela. Nau ol dispela man i kam askim mipela, bilong wanem mipela i larim pikinini bilong mipela i dai. Mi na man bilong mi i tokim ol dokta olsem mipela bai go long narapela haus sik em ol bai kisim Tiarah na traim long stretim sik bilong em, na ol i no ken mekim wok long blut. Ol i tok Tiarah i sik tru na narapela haus sik i no inap kisim em. Mi tokim ol: “No ken tok, i no inap!”

Maski Sapos Em i Dai, Em i No Laik Kisim Blut

Mi tokim Tiarah long dispela samting, na tok ol dokta i mekim, na tingting bilong Jehova long dispela samting, na samting mipela i laik mekim long painim wanpela dokta na haus sik bilong helpim em na ol i no mekim wok long blut. Maski Tiarah i yangpela yet em i save long as bilong ol dispela tok. Em i laik bihainim tok bilong Jehova. Maski sapos em i dai, em i no laik kisim blut. Taim mi harim liklik pikinini bilong mi i mekim tok olsem, aiwara i kamap long ai bilong mi. Nau mi save, bilong wanem yumi mas lainim ol pikinini taim ol i liklik yet. Maski Tiarah i gat 3 na hap krismas tasol, em i tokim mipela olsem em i laik stap gut long Jehova, maski wanem samting i kamap.​—Efesus 6:4; 2 Timoti 3:15.

Taim ol i wetim tok orait i kam long kot bilong givim blut long Tiarah, mipela i wok strong long painim wanpela haus sik na Tiarah i ken go stap long en. Man bilong mi i toktok wantaim wanpela elda long kongrigesen, na elda i toktok wantaim wanpela dokta. Dokta i tok em bai traim long helpim mipela. Nau bel bilong mipela i stap isi liklik.

Mi bin stap long haus sik wantaim Tiarah taim em i go slip long en. Nau skin bilong mi i les olgeta. Man bilong mi i save long dispela, olsem na em i tok em bai stap wantaim Tiarah, na mi ken go long haus na slip liklik. Mi go long haus tasol mi no inap slip. Mi klinim haus, na mi telefon long papamama bilong mi, na mi toktok long sampela pren em ol i Witnes Bilong Jehova. Bihain ai bilong mi i laik slip na nau mi slip​—mi slip i dai olgeta​—krai bilong telefon tasol i kirapim mi. Mi pret long holim telefon, long wanem, mi ting man bilong mi bai tokim mi olsem Tiarah i dai pinis.

Mi holim telefon na toktok. Em dispela dokta tasol em elda i bin toktok wantaim em. Em i tokim mi, ol i painim pinis wanpela haus sik em ol i save long bilip bilong mipela long blut, na ol bai kisim Tiarah, maski em i sik tru. Dokta yet i wokim rot pinis na Tiarah inap lusim haus sik! Mi amamas tru na tok tenkyu long em. Mi putim telefon i go daun na mi brukim skru na tok tenkyu long Jehova.

Tiarah i stap long nambawan haus sik inap 10-pela de, na bihain em i go long narapela haus sik gen long narapela hap bilong Nu Yok. Em haus sik bilong ol pikinini i gat sik long ol rop i stap long klok o wetlewa. Taim Tiarah i kam ol i wetim em i stap. Ol i kisim ol piksa eksre, na ol i skelim blut bilong em, na ol i skelim sampela eksre moa bilong narapela haus sik em mipela i givim long ol. Ol i skelim ol dispela samting pinis, na nau dispela dokta, em saveman bilong ol sik i save kamap long klok o wetlewa, em i tok, ol bai mekim bikpela popaia sapos ol i givim blut long em.

Sik i Orait Olgeta na Ol i No Mekim Wok Long Blut

Taim Tiarah i stap long dispela haus sik, ol i lukautim em gut tru. Ol i stori long mipela long ol samting inap painim pikinini taim ol i stretim dispela hevi na long ol rot ol bai bihainim. Ol i givim wanpela marasin long em bilong mekim em i slip liklik. Ol i rausim sampela wara i stap long wetlewa bilong em, na ol i go skelim wantaim sampela marasin. Ol i painim wanpela marasin bilong pasim kus em inap kilim jem i stap long wetlewa. Tiarah i kisim dispela marasin, na ol i putim em long wanpela rum oksijen inap 10-pela de. Sik bilong em i orait isi isi.

Taim ol dokta i skelim gut piksa eskre bilong em, ol i painim wanpela sua i stap long wetlewa long han sut. Marasin i wok long rausim wara i stap long wetlewa, tasol dispela sua i stap yet. Wara i kamap long sua i stap yet long wetlewa, na ol dokta i ting ol i mas katim. Tasol nau ol i givim narapela marasin long em wantaim dispela marasin ol i bin givim long em pastaim. Ol i givim marasin ain na kaikai long em long rot bilong gumi inap 3-pela de. Bihain ol i givim sampela strongpela kaikai long em. Nau blut bilong em i wok long kamap strong gen. Dokta bilong skelim blut na dokta bilong skelim sik long wetlewa na klok, tupela i kirap nogut, long wanem pikinini i wok long orait hariap​—dispela i kirapim wanpela dokta long tok: “Ating God bilong yupela i helpim yupela.”

Marasin i no pinisim dispela sua, olsem na ol i kisim wara i stap insait long sua bilong skelim. Ol i painim narapela marasin em inap kilim jem i kamapim dispela sua. Dispela kain jem i save kamapim kus na em i save stap long maus, olsem na ol dokta i ting olsem taim Tiarah i kisim kaikai, jem i stap long kaikai em i go long rop bilong win na i go insait long wetlewa bilong em. Marasin i laik kilim dispela jem, tasol jem i putim wanpela banis i raunim sua, olsem na marasin i no inap kilim. Dokta i ting dispela samting i narapela kain tru, olsem na em i raitim ripot bilong dispela samting na givim long wanpela nius bilong ol dokta.

Tiarah i stap long haus sik inap wanpela mun, na bihain ol i larim em i go long haus. Tasol em i mas lukim dokta wanpela taim long olgeta wik inap 3-pela mun. Na em i mas kisim planti marasin wantaim marasin ain. Ol dokta i no bin katim em. Nau sik bilong em i pinis na sua i stap long wetlewa bilong em i pinis olgeta.

Tiarah i mekim wok pablisa insait long kongrigesen Kristen bilong ol Witnes Bilong Jehova. Long Februeri 14, 1991, em i mekim namba wan tok bilong em long Skul Bilong Wok Autim Tok long kongrigesen. Mi na man bilong mi i tok tenkyu long Jehova long em i bin blesim wok bilong mipela long sanap strong na bihainim tok bilong Em long klia long blut. Yumi olgeta i mas wok yet long givim biknem long Jehova, long wanem, em i gat biknem tru. Na tingim, sapos wanpela dokta i tokim yu olsem yu mas kisim blut, nogut bai yu dai, yu ken tokim em olsem, “No ken tok, i no inap!”​—Nina Hooks bilong Bruklin, Nu Yok, em i salim dispela stori i kam.