Lukim Gut Pukpuk
WANPELA MAN LONG KENYA I RAITIM DISPELA STORI BILONG KIRAP!
WANPELA turis bilong Amerika i sanap arere long wara Mara na kisim piksa bilong ol hipopotamus, na lek bilong em i wel long ston na em i pundaun long wara. Wanpela pukpuk i slip long san na em i lukim dispela samting i kamap. Pukpuk i save kaikai pis, tasol em i lukim samting i pundaun long wara na em i ting em i gutpela kaikai, olsem na wantu tasol em i go insait long wara na i kam. Gutpela tru, turis i lukim pukpuk i kam na em i lusim wara—em i siksti stret na i olsem em i wokabaut antap long wara na i kam!
Ol turis i kam long Afrika bilong lukim ol bikpela wara na ol raunwara na ol ples tais, planti taim ol inap lukim ol pukpuk. Tasol dispela turis bilong Amerika em i lukim klostu tumas na em i pret nogut tru. Ol pukpuk i stap long kantri Kenya ol i bilong wara Nail. Long tok Swahili ol i save kolim pukpuk olsem mamba. Sampela pukpuk i traipela—ol i longpela inap 7-pela mita; ol i famili bilong ol snek na palai samting, em ol samting i wokabaut spit tru long graun na insait long wara. Tel bilong ol i olsem pul bilong kanu na dispela i helpim ol long spit tru insait long wara. Ol inap subim wara inap 40 kilomita insait long wanpela aua! Na planti taim ol i go insait tru long wara na stap i go inap tupela o 3-pela aua. Long graun ol inap ran spit tru i go liklik, na bihain ol i sanap, na ol i kirap ran spit i go gen.
Olsem na Baibel i stori olsem pukpuk em i wanpela ‘strongpela animal’ God i wokim na ol man i save pret long en. Jop 41:8, 10 i tok: “Goan, putim han bilong yu long [pukpuk], na bai yu pilim strong bilong em, na bai yu no mekim olsem gen. Bai em i pait strong moa yet long yu, na yu no inap tru lusim tingting long dispela pait. I no gat wanpela man i stap inap long kirapim pukpuk . . . na winim em long pait.” Em gutpela tok lukaut! Wanpela man i raitim buk i stori long ol pukpuk na em i tok, sampela pukpuk i bin kirapim pait long bot i gat moto! Jop 41:25 i tok stret olsem: “Sapos em i kirap na sanap, orait ol strongpela [man] i pret moa yet. Na taim ol i harim em i paitim wara, tingting bilong ol i pas tru na ol i no inap mekim wanpela samting.”—Maurice Richardson long buk The Fascination of Reptiles.
Bilong wanem ol man i save pret nogut tru na ranawe long taim ol i lukim dispela animal i gat strongpela grile long skin bilong en? Jop 41 Ves 14 i kolim wanpela as, em i tok: “Em i gat planti bikpela tit long maus bilong en na ol man i save pret tumas long ol.” Pukpuk i gat 24 tit long antap na 24 daunbilo, em ol i gat kain kain mak, na long olgeta taim ol nupela tit i save kamap na senisim olpela. Taim em i pasim maus, namba 4 tit long maus daunbilo i stap ples klia ausait na i go pas long ples bilong en long maus antap taim pukpuk i pasim maus. Dispela tit inap helpim yu long luksave long dispela kain pukpuk tru na wanpela kain pukpuk ol i kolim alligator. Tasol sapos yu laik lukim gut ol tit bilong pukpuk yu mas was gut, nogut em i daunim yu na yu lukim gut olgeta tit bilong en i stap insait long maus bilong en!
Olsem na gutpela sapos yu sanap longwe liklik na yu lukim gut pukpuk, na i gat sampela ples long Kenya bilong mekim olsem. I gat wanpela ples long taun Mombasa bilong lukautim ol pukpuk, ol i kolim Ples Mamba.
Tasol ating yu laik save, ‘Bilong wanem ol i laik lukautim ol pukpuk?’ Sapos ol i no mekim, bai ol pukpuk i pinis olgeta long graun. Long bus, planti pukpuk (99 pesen) i save dai taim ol i no winim yet wanpela yia. I gat sampela traipela palai, na ol pisin i gat longpela nek, na sampela man tu, em ol i laik long kaikai kiau bilong pukpuk na ol liklik pukpuk. Tasol long banis bilong lukautim ol pukpuk, i no gat planti ol i dai (10 pesen i go daun long 2 pesen tasol). Ol liklik pukpuk long banis ol i go bikpela hariap—insait long wanpela yia ol i kamap longpela inap 1.5 mita—ol i bikpela inap long sakim planti birua. Tasol long bus, ol liklik pukpuk i no i go bikpela hariap—insait long 3-pela yia bai ol i kamap longpela olsem.
Long ol banis bilong lukautim ol pukpuk ol man i save wok bisnis tu long ol pukpuk. Long planti kantri bai yu lukim ol su, na let, na paus samting ol i wokim long skin bilong bel i malumalum. Long olgeta yia Ples Mamba i baim skin bilong 2,000 pukpuk i go long ol narapela kantri, olsem Frans na Itali, bilong redim na wokim ol samting long en. Tasol olsem wanem long mit samting bilong ol pukpuk ol i kilim bilong kisim skin bilong ol? Long Kenya planti turis i laik kaikai dispela narapela kain mit.
Namel long Oktoba na Epril, ol pukpuk meri i save putim ol kiau. Long bus, pukpuk meri i save putim 20 inap 80 kiau. Long banis, ol i save putim inap 36 kiau. Ol i putim long narapela narapela hap bilong ol raunwara. Ol man i raun na kisim ol dispela kiau na putim long ol bokis i hat, na bihain long 3-pela mun ol kiau i bruk na ol liklik pukpuk i kamap.
Ples Mamba em i gutpela ples tru bilong lukim gut ol pukpuk na yu no ken kisim bagarap. Ol i wokim dispela banis long bikpela hap graun (8-pela hekta) bipo ol man i bin katim ston long en. Ol i wokim banis pukpuk, na gutpela ples i gat kain kain liklik na bikpela diwai long en, na ol traipela tang i gat windo bilong lukim ol pis bilong solwara i stap long en, na i gat ol ples bilong amamas tu. Winim 10,000 pukpuk i stap long dispela banis. Tasol yu no inap lukim olgeta. Tasol i gat tupela hap bilong putim kiau na yu inap lukim inap olsem 100 bikpela pukpuk man na meri long dispela hap. Na long ol narapela hap i gat planti handet pikinini pukpuk na yangpela pukpuk em yu inap lukim.
Bai yu amamas long lukim ol pukpuk long taim ol i kisim kaikai. Sampela i save kalap lusim wara na i kam antap bilong kisim hap mit ol man i hangamapim i stap. Na yu inap lukim wanpela pukpuk em i gat nem long mekim pretim ol manmeri long hap bilong wara Tana na em i kilim i dai 5-pela man. Olsem na ol i holim em na kisim em i kam long Ples Mamba na givim nem Bikpela Papa long en. Sapos yu pret long lukim tru ol pukpuk, yu ken lukim ol gut long video long haus piksa long dispela ples.
Taim yu lukim gut ol pukpuk, ating bai yu pilim olsem ol i samting tru, o ating bai yu pret long en. Tasol bai yu kisim gut tok bilong Baibel long Jop 41:34, em Baibel i stori long pukpuk na i tok: “Maski ol [arapela] animal i apim nem bilong ol yet, em i stap olsem king bilong ol.”
[Piksa long pes 21]
Han sut: Ples Mamba
[Piksa long pes 21]
Han sut i go: Wanpela pukpuk i kalap lusim wara bilong kisim hap mit long taim bilong kaikai