Was Gut Long ‘Ol Ai Bilong Wara’!
WANPELA MAN LONG OSTRELIA I RAITIM DISPELA STORI BILONG KIRAP!
WANPELA meri i amamas long raun, em i sindaun isi long kanu na pul long wanpela liklik wara bilong wara Is Aligeta long ples tais bilong Kakadu Nesenel-Pak, em long Noten Teritori bilong Ostrelia. Wantu wanpela samting em i ting em hap diwai nating i trip long wara i wok long paitim kanu. Em wanpela pukpuk bilong ol wara i gat sol—em pukpuk nogut tru. Dispela meri turis i bin kam long hap wara bilong dispela pukpuk yet na long wanpela taim nogut.
Meri i wok strong long pul i go long sampela diwai. Taim em i putim lek i go antap long sampela han bilong diwai, pukpuk i lusim wara na pulim em i kam daun na tanim meri inap 3-pela taim. Taim pukpuk i lusim meri liklik bilong holim em gut long narapela hap, meri i wok strong long lusim graun malumalum na i go antap long arere bilong wara. Namba tri taim meri i mekim olsem, em i kam antap. Em i pulim skin bilong em long graun i go i go inap tupela kilomita na nau wanpela man i wok long pak, em i harim singaut bilong em. Pukpuk i bagarapim tru skin bilong meri, tasol meri i no dai.
Dispela samting nogut i bin kamap long 1985. Tasol tupela yia bihain, wanpela turis bilong Amerika i no bin abrusim bagarap. Em i no harim tok bilong ol poroman bilong em, na em i go waswas long wara Prins Rigen, long Westen Ostrelia. Ol pukpuk i pulap long dispela wara. Wanpela pukpuk bilong ol wara i gat sol i holim em na kilim em i dai. Ol ripot i tok, ol pikinini pukpuk i stap long dispela wara, olsem na ol i ting pukpuk i bin kisim dispela meri, em wanpela pukpuk mama i lukautim ol pikinini bilong en.
Ol Ai Nogut Bilong Wara
Man i painim pis long wara, em i save lukim wanpela samting tasol long lait bilong mun—wara i stap olsem glas i meknais liklik tasol taim binatang i pundaun long en. Tasol ol man bilong painim pis long hap not tru bilong Ostrelia, ol i no save lusim tingting long samting ol i no inap lukim—‘ol ai bilong wara.’ Sapos man i sutim nabaut lait bilong sutlam, ai bilong ol pukpuk i kam antap long wara bai lait retpela. Man i kam long dispela hap tasol i no hap tru bilong em—em hap bilong ol pukpuk i save kaikai man.
Pukpuk bilong ol wara i gat sol long Ostrelia i stap long sampela hap moa tu, na ol i bikpela long ol narapela 12-pela kain pukpuk bilong graun, na dispela pukpuk i birua tru. Skin bilong en inap go longpela inap 7-pela mita. Samting i kamap kaikai bilong pukpuk i no gat rot long ranawe, long wanem, taim em i lukim pinis ai bilong en, pukpuk i holim em pinis na tantanim em insait long wara bilong kilim em. Sampela pukpuk i bin kisim ol bikpela animal olsem bikbel, bulmakau, na hos taim ol i dring wara arere long wanpela wara.
Samting i Wok Long Pinisim Ol
Wanpela stori nating bilong bipo olsem pukpuk i save krai giaman taim em i kilim abus bilong en, i save kamap long sampela tok ples long nau tu, olsem na long sampela hap yumi inap harim wanpela kain tok olsem, “krai giaman bilong pukpuk.” Tasol i no planti man i save krai taim pukpuk i dai. Nogat. Ol man i bin kilim planti pukpuk bilong kisim nambawan skin bilong en.
Ol meri i wok bisnis long pasim ol klos i gat stail na wokabaut i go i kam bilong soim long ol meri i gat bikpela laik long baim, planti taim ol i save pasim hat, let, o su ol i bin wokim long skin bilong pukpuk. Sampela man i tok, skin bilong pukpuk bilong ol wara i gat sol, i winim skin bilong ol narapela animal, long wanem, skin i malumalum tru na i no save bagarap kwik. Long wanpela stua long Landon, pe bilong wanpela hanbek bilong ol meri i olsem 15,000 dola. Long planti kantri, man o meri i holim wanpela bilas samting ol i bin wokim long skin bilong pukpuk, dispela i givim biknem long ol.
Bikpela mani ol man inap kisim long skin bilong pukpuk bilong ol wara i gat sol i mekim, na klostu dispela pukpuk long Ostrelia i bin pinis olgeta. Namel long 1945 na 1971, ol man i bin kilim inap olsem 113,000 bilong dispela pukpuk long hap bilong Noten Teritori. Long 1972 samting, gavman i putim lo na ol man inap kilim sampela pukpuk tasol, nogut pukpuk i pinis olgeta, olsem na long 1986 ol pukpuk i kamap planti gen. Nau long Ostrelia pukpuk i no laik pinis, tasol sampela man i tok, ples tru bilong en i laik pinis.
Inap planti handet yia ol Aborijini bilong Ostrelia ol i bin lukautim ol pukpuk na ol i no kamap planti tumas na ol i no pinis, maski ol i save ol i mekim olsem o nogat. Sampela lain bilong ol i save gut long pasin bilong kilim pukpuk, na bilip bilong sampela lain i tambuim ol long kilim.
Long nau tupela samting i helpim pukpuk na em i no ken pinis. Olsem: Ol i banisim sampela bilong helpim ol long kamap planti, na tu, ol i skulim gut ol man long pukpuk. Nau planti turis i save go long ol banis pukpuk, na mani ol i save tromoi bilong lukim pukpuk i save helpim wok bilong ol man long lukautim gut ol pukpuk. Ol pukpuk i kamap planti insait long banis na ol man i mekim wok long skin na mit bilong ol dispela; ol i no kilim pukpuk i stap insait long ol wara bilong bus.
Wanpela man bilong Ostrelia i gat nem long lukautim ol pukpuk long banis, em i ting ol man i save lukautim tasol ol samting ol i laikim, o ol i save long en, o ol i lusim hap taim long en. Em i tok: “Ol man i no save tingim tumas pukpuk. Tasol wok bilong en bilong helpim dispela graun, i wankain long wok bilong ol samting i gutpela long ai bilong yumi.”
Man! I gutpela tru long go long banis pukpuk na lukim ol pukpuk klostu—tasol gutpela tru ol i stap insait long banis waia. Skin bilong ol i strong na kala bilong en i stret long ples tais. Ol wokman i no pret long go insait long banis bilong kirapim ol pukpuk long mekim sampela samting na bihain ol i praisim ol long kakaruk o hap mit samting. Tasol wanpela wokman i bin kisim hevi pastaim bilong save olsem yumi no ken ting pukpuk em i samting nating. Wantu wanpela pukpuk i bin pait long em na rausim han kais olgeta bilong em!
Tasol holim wanpela pukpuk i gat 12-pela mun tasol, em i gutpela samting tru na em i givim save long man i holim. Skin bilong bel i malumalum tru, tasol long baksait skin i strong olsem grile. Nau yumi ken save bilong wanem planti man i ting skin bilong pukpuk i nambawan. Tasol yumi mas was gut long dispela “liklik” pukpuk tu. Maski em i 12-pela mun tasol na rop i pasim strong maus bilong en, em i gat strong yet.
Ol man i lukim kiau bilong pukpuk i laik bruk ol i amamas tru. Pikinini pukpuk insait long kiau i save singaut na wantu em i brukim kiau long wanpela tit i stap antap long liklik nus bilong en. Dispela wanpela tit i no ken stap longtaim. Ating klostu olgeta man bai tok, long dispela taim tasol pukpuk i olsem wanpela naispela samting!
Sampela Stori Giaman Bilong Bipo i Pinis
Taim ol pukpuk i go bikpela insait long ol banis na ol man inap lukim pasin bilong ol, dispela i bin helpim ol man long save gut long pukpuk na helpim ol long save, sampela stori ol man i bin bilipim inap longpela taim, ol i stori giaman. Inap planti yia ol man i bin ting, inap sampela de o wik samting pukpuk i no les long bihainim wanpela animal em i laik kilim, na taim em i redi long kilim, em inap siksti stret na holim. Tasol nau ol man i save, pukpuk i save raun painim poroman long taim bilong bikpela ren, olsem na sapos wanpela animal i kam long hap wara pukpuk i stap long en long dispela taim, pukpuk inap birua long en. Tasol long narapela taim bilong yia, pukpuk i no ken mekim wanpela samting—em bai stap longwe na lukluk tasol.
Long nau, sapos ol man i lukim pukpuk long wanpela hap ol man i raun long en bilong painim amamas, ol i singautim ol man i raunim pukpuk long kam bilong putim em long narapela hap. Ol dispela man i save pasim rop long wasket bilong pukpuk daunbilo na apim bilong pasim maus olgeta, na kwiktaim ol i kalabusim maus long rop. Em nau, pukpuk i no inap opim maus, long wanem, maski ol masol bilong wasket i strong bilong pasim maus, ol masol bilong opim maus i no strong tumas. Tasol sapos man bilong raunim pukpuk i no was gut, strongpela tel bilong pukpuk inap paitim em i go daun long graun.
Pasin Bilong En i No Nogut Olgeta
Maus bilong pukpuk inap kamapim bikpela birua, tasol wankain maus inap mekim gutpela samting tu. Sapos pikinini pukpuk i les long brukim kiau, pukpuk mama bai mekim wok long maus bilong tantanim isi isi dispela kiau bilong kirapim pikinini long brukim.
Tit bilong pukpuk i no bilong katim kaikai, nogat; tit i bilong holim gut kaikai. Sapos animal i liklik, pukpuk bai daunim tasol. Sapos em i bikpela, pukpuk bai brukbrukim na kaikai wan wan hap. Taim ol man i katim bel bilong sampela pukpuk, ol i painim ol ston insait long bel. Ol i no save, pukpuk i laik kaikai ol ston o nogat, tasol ol i ting ol ston i mekim wok bilong helpim pukpuk long go daun insait tru long wara.
Planti taim ol turis i lukim pukpuk i slip long arere bilong wara na bikpela maus bilong en i op. Ating planti bilong ol i ting pukpuk i redi long birua long ol, tasol nogat. Maus i op, long wanem, nogut skin bilong pukpuk i hat tumas. Em pasin bilong olgeta animal i hap famili bilong snek.
Ating yu kirap nogut long save, maski pukpuk i hap famili bilong snek, klok bilong en i gat 4-pela hap olsem bulmakau. Tasol taim pukpuk i sut i go daun insait long wara, klok i mekim wok olsem em i gat 3-pela hap.
Pukpuk bilong ol wara i gat sol i narapela kain long pukpuk ol i kolim aligeta—nus bilong en i no braitpela na taim maus bilong en i pas, ol tit long wasket daunbilo i stap ples klia. Kirap long Afrika i go inap India, na long Esia i kam daun long Papua Niugini, na i go saut long Ostrelia—ol pukpuk i stap. Skin bilong wanpela kain pukpuk long Afrika i sotpela tru. Ol pukpuk i laikim ples mangro bilong nambis na ples tais long ol ples hat, long wanem, ol i save wokim haus arere long wara. Haus i stap arere long wara i no gutpela tumas, long wanem, taim tait wara i kam, wara i karim planti kiau i go. Na ol bikpela pukpuk, pis baramandi, na pisin nankin, ol i laik kaikai pikinini pukpuk, olsem na 50 pesen tasol bilong ol pikinini i save winim wanpela krismas.
Pukpuk i narapela kain. Taim em i nupela, kaikai i stap pinis insait long bel bilong em—em wanpela liklik paus i gat wanpela kain wara insait long en. Pikinini pukpuk i save kaikai dispela wara inap sampela wik. Tasol taim pukpuk mama i holim pikinini long maus na karim em i go long wara, em nau, maus bilong pikinini i wok—olgeta samting klostu long en, em i traim long kaikaim.
Bilong wanem dispela tok ‘ol ai bilong wara’ i makim stret pukpuk? Long wanem, sapos long nait wanpela lait i sutim liklik ai bilong pukpuk nau tasol em i brukim kiau, ai bilong en i lait retpela. Baksait long ai long hap ol i kolim retina, i gat samting olsem glas na dispela i mekim na ai bilong pukpuk i lait retpela na em inap lukluk gut long nait.
Tru tumas, pukpuk i narapela kain stret—tasol gutpela yu no go klostu long en. Na olsem ol man bilong painim pis i save, pukpuk i no inap stap isi wantaim ol man.
Jop i stori gut long pukpuk olsem: ‘Yu inap tromoi huk na hukim traipela pukpuk, a? Yu inap pasim tang bilong en long baklain? Yu inap mekim hul long nus bilong en na pasim baklain na pulim em i go, a? Yu inap putim hul long wasket bilong en? Sapos yu holimpas em, bai em i askim yu long marimari long em na larim em i go, a? Bai em i mekim gutpela tok isi long yu, laka? Em inap mekim kontrak wantaim yu bai em i mekim wok bilong yu oltaim, a? Yu inap pilai wantaim em olsem yu save pilai wantaim pisin yu lukautim? O ating bai yu pasim em long wanpela string bai ol pikinini meri bilong yu i ken pulim em i go, a? Na ating ol bisnisman bai inap tok pait long pe bilong baim em? Na bai ol inap katim em liklik liklik na karim ol hap mit bilong en i go salim long maket, laka? Ating yu inap sutim em long planti spia na bai ol i pulap tru long skin na het bilong en, a? Goan, putim han bilong yu long em, . . . na bai yu no mekim olsem gen. Bai em i pait strong moa yet long yu, na yu no inap tru lusim tingting long dispela pait.’—Jop 41:1-8.
Em gutpela tok tru long ol man i no save gut tumas long pukpuk o ol i laik save long en. Tru tumas, was gut long ‘ol ai bilong wara’—em ol ai bilong strongpela pukpuk bilong pret long en!
[Piksa Kredit Lain long pes 22]
By courtesy of Australian International Public Relations
[Piksa long pes 23]
Taim lait i sutim wara long nait, ‘ol ai bilong wara,’ em ai bilong pukpuk i lait retpela
[Kredit Lain]
By courtesy of Koorana Crocodile Farm, Rockhampton, Queensland, Australia
[Piksa long pes 24]
Han kais: Pikinini pukpuk i brukim kiau
[Kredit Lain]
By courtesy of Koorana Crocodile Farm, Rockhampton, Queensland, Australia
Liklik blok: Bikpela pukpuk i slip long san arere long wara Meri
[Kredit Lain]
By courtesy of Australian International Public Relations