Baibel i Tok Wanem?

Maria Em “Mama Bilong God”?

“MIPELA I LAIK STAP GUT ANINIT LONG PASIN MARIMARI BILONG YU, O MAMA BILONG GOD; NO KEN GIVIM BAKSAIT LONG BETEN BILONG MIPELA, TASOL HELPIM MIPELA NA MIPELA I NO KEN BAGARAP, O YU TASOL YU KISIM BLESING.”

DISPELA kain beten i save kamapim tingting bilong planti milion man na meri i givim bel olgeta long Maria, em mama bilong Krais Jisas. Ol i ting em wanpela gutpela mama em inap askim God long helpim ol, na mekim sampela samting na God i no ken givim bikpela strafe long ol.

Tasol tru, Maria em “Mama bilong God”?

Maria​—⁠God i “Blesim” Em

Tru tumas, God i bin blesim na mekim gut long Maria​—⁠em i no bin mekim olsem long narapela meri bilong graun. (Luk 1:​28) Ensel Gebriel i go long Maria na tokim em long gutpela blesing God bai givim long em olsem: “Harim. Yu bai kisim bel na karim wanpela pikinini man. Na yu mas kolim nem bilong en Jisas. Em bai i stap bikman. Na bai ol i kolim em Pikinini bilong God Antap Tru.” Dispela mirakel bai kamap olsem wanem? Gebriel i tok moa olsem: “Holi Spirit bai i kam long yu, na strong bilong God Antap Tru bai i karamapim yu. Olsem na dispela pikinini . . . bai i stap gutpela na stretpela man bilong God, na ol bai i kolim em Pikinini Bilong God.”​—⁠Luk 1:​31, 32, 35.

Maria i tok: “Mi wokmeri bilong Bikpela. Em i ken mekim long mi olsem yu tok.” (Luk 1:38) Yes, Maria i amamas long bihainim tok bilong God na bihain em i karim Jisas.

Tasol inap planti handet yia bihain long Maria i dai, ol man i givim bel olgeta long em, ol i litimapim nem bilong Maria na em i no stap moa olsem “wokmeri bilong Bikpela,” nogat; em i kamap olsem “mama kwin” i gat bikpela namba long heven. Long yia 431 long wanpela bung, em Kibung Bilong Efesus, ol bikman bilong lotu i kirap na kolim Maria “Mama bilong God.” Wanem as bilong dispela tingting? Pop John Paul Namba 2 i stori long wanpela as olsem: “As bilong givim bel olgeta long Mama bilong God . . . em Tok Hait bilong God Triwan.”​—⁠Crossing the Threshold of Hope.

Olsem na man i bilip olsem Maria em “Mama bilong God,” em i mas bilip long God Triwan. Tasol olsem wanem? Dispela tok long God Triwan, em wanpela hap tok bilong Baibel?a Skelim gut tok aposel Pita i bin raitim long Baibel. Em i tokaut olsem “sampela giaman profet . . . bai i kirap namel long yupela tu na giaman long skulim ol manmeri long ol samting bilong God. Bai ol i hait na kamapim ol kain kain tok giaman namel long yupela, em ol tok bilong bagarapim bilip bilong yupela.” (2 Pita 2:​1, 3) Wanpela tok giaman em dispela bilip long God Triwan. Taim ol man i bilip long dispela tok God Triwan, i no hatwok long ol i bilip olsem Maria em “Mama bilong God” (Grik: Theotokos, insait bilong dispela tok i olsem “Em i karim God”). Geoffrey Ashe long buk bilong em (The Virgin), em i tok: “Sapos tru Krais em God, em Namba 2 Man bilong God Triwan,” olsem ol man i bilip long God Triwan i tok, “orait, taim Jisas i stap olsem man long graun, mama bilong em long dispela taim em i olsem Mama bilong God.”

Sapos tru Jisas em “God olgeta” olsem wanpela nupela buk bilong ol Katolik (Catechism of the Catholic Church) i tok, orait, i stret long tok Maria em “Mama bilong God.” Tasol taim dispela bilip i kamap nupela, planti man bilong bipo na ol i bilip long God Triwan, ol i hatwok long bilip olsem Maria em “Mama bilong God.” Na long nau tu, planti Talatala em ol i save bilip long God Triwan, ol tu i hatwok long bilip olsem Maria i “Mama bilong God.” Ol i kolim dispela kain bilip olsem “narapela kain tru,” long wanem, ‘heven i no bikpela ples inap long God i ken stap long en​—⁠olsem wanem em inap stap insait long bel bilong wanpela meri?’ (Buk The Virgin)​—⁠Skelim wantaim 1 King 8:27.

Tasol tru, Krais Jisas em “God olgeta”? Nogat. I no gat wanpela taim Jisas i bin tok olsem. Olgeta taim em i bin tok, em i stap aninit long Papa bilong em.​—⁠Lukim Matyu 26:39; Mak 13:32; Jon 14:28; 1 Korin 15:​27, 28.

‘Lotu Long God Wantaim Stretpela Tingting’

Baibel i save strongim ol Kristen long wokim gut tingting taim ol i lotu. Baibel i no tok yumi mas bilip nating long wanpela samting ol man i tok em i wanpela tok hait. Nogat. Aposel Pol i tok, yumi mas lotu long God wantaim ‘stretpela tingting.’​—⁠Rom 12:​1, The Jerusalem Bible.

Anne i bin go bikpela insait long lotu Katolik, em i tok: “Ol i no kirapim mipela long tingting long dispela bilip, na mipela i no gat tupela tingting long en. Mipela i bilip tasol olsem Jisas em God na Maria em ‘Mama bilong God’​—⁠mipela i bilip nating tasol!” Na tingim, dispela buk bilong lotu Katolik (Catechism of the Catholic Church) i tok, olgeta wan wan insait long God Triwan i “God olgeta.” Buk i tok, ol i no stap narapela narapela god. Olsem wanem? Yumi mas bilip olsem taim ol liklik sel insait long bel bilong Maria i bin brukbruk, “God olgeta” i bin stap insait long bel bilong Maria na long namba wan mun Maria i gat bel, em i go bikpela inap 6-pela milimita tasol na ai na yau i no kamap gutpela yet?

Na tingim: Ensel Gebriel i tokim Maria ol bai kolim pikinini bilong em olsem “Pikinini bilong God Antap Tru” na “Pikinini Bilong God,” em i no tok, ol bai kolim em “God Pikinini.” Sapos Jisas em God i Gat Olgeta Strong, bilong wanem ensel Gebriel i no kolim wankain tok olsem ol man bilong nau i bilip long God Triwan i save kolim​—⁠“God Pikinini”? Gebriel i no tok olsem, long wanem, dispela bilip i no wanpela tok bilong Baibel.

Yumi no save long olgeta wok bilong God. Tasol taim yumi save gut long tok bilong Baibel, dispela i helpim yumi long bilip olsem God i Gat Olgeta Strong, em Man bilong wokim olgeta samting, em i gat strong long wokim mirakel na senisim laip bilong gutpela Pikinini bilong em, Krais Jisas, i go long bel bilong Maria, na long rot bilong spirit holi bilong Em, em i lukautim gut pikinini na em i stap gut insait long bel bilong Maria i go inap long taim Maria i kamap mama bilong Jisas​—⁠Pikinini bilong God.

Tru tumas, Maria i kisim gutpela blesing taim em i kamap mama bilong dispela man i kamap Krais. Yumi no daunim Maria taim yumi bilip olsem tok bilong Baibel, na stori bilong Baibel long pasin daun bilong Maria yet, i kamapim klia olsem yumi no ken kolim em olsem “Mama bilong God.”

[Futnot]

[Piksa Kredit Lain long pes 26]

Museo del Prado, Madrid