Sampela Tok i Kam Long Olgeta Hap
Ol i Painim Wanpela Samting Bilong Bipo
Ol saveman bilong digim graun na painim sampela samting bilong bipo, ol i ting ol i no inap painim moa wanpela bikpela samting long wanpela ples daun (Valley of the Kings) long Isip, bihain long ol i bin painim matmat bilong King Tutankamen long 1922. Dispela matmat bilong King Tutankamen i bin pulap long planti gutpela gutpela kago. Tasol nau ol i painim narapela matmat long dispela ples, em i bikpela tru na i narakain stret long ol narapela matmat. Ol saveman i ting dispela matmat i gat 100 samting rum. Ol i painim pinis 67 rum, tasol ol i ting aninit long ol dispela rum i gat sampela rum moa. Ol i ting King Ramses Namba 2 i bin wokim dispela matmat bilong ol pikinini man bilong em. Ramses Namba 2 i bin stap inap olsem 1,300 yia paslain long Krais, na em i bin mekim wok king inap 66 yia. Em i kamapim olsem 100 pikinini na 52 bilong ol, em ol pikinini man. Ol saveman i painim pinis matmat bilong tupela pikinini man bilong Ramses. Na ol i ting ol i bin planim ol narapela pikinini man bilong Ramses long dispela matmat nau ol i painim, long wanem, ol i lukim nem bilong 4-pela pikinini bilong em, olsem nem bilong namba wan pikinini man, em Amen-her-kopsef. Ol saveman bilong lotu i kirap nogut long dispela samting ol saveman i painim, long wanem, sampela bilong ol i bin ting Ramses Namba 2 i bin bosim Isip taim lain Israel i lusim Isip. Tasol sampela saveman i tok, lain Israel i lusim Isip long yia 1513 paslain long Krais.
Taim Bilong Bikpela Pait na Birua
Wanpela nius (The New York Times) i tok: “Sampela saveman i stori long ol samting i bin kamap bipo i ting, bihain taim ol man i tingting bek long taim bilong yumi, ol bai ting i no gat wanpela taim bipo na ol man i bin mekim pasin nogut tru olsem nau ol i mekim. Planti saveman i tingim ol yia kirap long 1914 i kam inap 1989—em 75 yia—na i gat tupela bikpela pait, pasin birua namel long lain Is na Wes, na ol i ting i no gat wanpela taim olsem na planti pait i bin kamap. Long ol dispela yia planti kantri i pait, o ol i lusim pait na wok long stretim bek ol samting, o ol i redi bilong pait.” Wanpela stori long nius The Washington Post i tok: “Ol pait i bin kamap long taim bilong yumi, ol i bikpela pait i bin bagarapim ol soldia na ol man nating. Ol man i bin kisim bagarap ol i planti milion, na planti bilong ol em ol Juda—ol man i bin mekim nogut long ol bilong pinisim ol. Sapos yumi skelim ol pait bilong bipo bipo wantaim ol pait bilong nau, ol dispela pait bilong bipo i olsem samting nating.” Pasin bilong daunim gavman, em tu i bin kapsaitim blut bilong planti man. Hamas man i bin kisim bagarap? Dispela nius i kamapim tingting bilong wanpela man, em Zbigniew Brzezinski, em i tok: “Ol planti planti man i bin dai kirap long 1914 i kam inap nau, i olsem 197 milion. Dispela i makim olsem, ‘long olgeta 10-pela 10-pela man i bin i stap long yia 1900, wanpela i bin kisim bagarap.’ ” Nius i tok moa: “Yumi save tru olsem pasin birua na pretim man, na kilim i dai nating ol man, i pasin tru bilong ol man long nau,” na “i no gat wanpela gavman o wok bisnis long nau i bin mekim na ol milion milion man i ken stap isi na inapim laik bilong ol.”
Wanpela Wok Man Inap Kisim Bagarap Long En
Nius WeekendStar bilong Johanisbek i tok: “Wok long main i wanpela wok man inap kisim bagarap long en, na em i wanpela bikpela wok bilong helpim wok bisnis bilong kantri.” Wanpela samting i bin kamap long Me 1995, i kamapim klia olsem wok long main em wanpela wok man inap kisim bagarap long en. Long wanpela main gol long Saut Afrika, wanpela wilka, hevi bilong en i olsem 12 ton na em i stap daunbilo insait long graun, em i popaia na brukim 3-pela o 4-pela samting bilong pasim em. Em i pundaun i go i go olsem 2,103 mita na memeim wanpela lift i gat 104 man bilong main i stap insait long en. I no gat wanpela bilong ol dispela man i abrusim bagarap. Dispela nius i tok: “Sori tru, kain hevi olsem i save kamap planti taim long Saut Afrika. Kirap long yia 1900 i kam inap 1993, inap olsem 69,000 wokman i bin dai na winim wan milion i bin kisim bagarap long ol main bilong yumi.”
Skin Bilong Olgeta Man
Lain Wol Helt Oganaisesen (WHO) i kamapim namba wan ripot bilong en long skin bilong ol man long olgeta hap bilong graun. Ripot i tok, i no gat wanpela de na i no gat sampela man i sik—long olgeta hap inap 40 pesen bilong ol man—em olsem 2 bilion—ol i save sik. Lain WHO i tok, planti man i save sik, tasol sapos ol i mekim sampela samting ol i no ken sik tumas, o i gat rot bilong helpim ol long pasim kain sik ol i save kisim. Pasin bilong i stap rabis i wanpela bikpela as na planti man i sik, long wanem, 5.6 bilion man i stap long graun na klostu 3 bilion i no gat rot bilong kisim ol marasin ol i mas kisim. Long olgeta 10-pela 10-pela pikinini, 3-pela i sot long gutpela kaikai, na long olgeta 10-pela 10-pela man, 2-pela i sot long mani o long ol samting bilong helpim ol long traim pasim sik bilong ol. Ol nambawan sik bilong kilim i dai planti milion man long olgeta yia, em sik bilong klok, strok, sik bilong wetlewa, TB, malaria, sotwin; na pekpek wara i save kilim i dai planti pikinini i no winim 5-pela krismas. Tasol ripot i tok, insait long 25 yia i go pinis i kam inap nau, planti lapun i no save dai hariap. Bipo planti lapun i save dai taim ol i kisim 61 krismas, tasol nau planti i save kisim 65 krismas. Dokta Hiroshi Nakajima, em dairekta-jeneral bilong lain WHO, em i tok: “Long olgeta de planti milion man i hatwok long painim kaikai na ol narapela samting bilong skin, nogut ol i dai. Olsem na dispela tingting long skruim sampela yia moa long laip bilong man, i no olsem wanpela gutpela samting long ol dispela kain man, ating ol bai ting i olsem wanpela samting bilong nogutim ol.”
Tingting Bilong Sampela Long Armagedon
Long Japan wanpela samting i mekim na ol lotu i kamapim tingting bilong ol long Armagedon. Long Mas 1995, lotu Aum Sinriko, i bin mekim wok long ges nogut sarin na kilim i dai planti man long ples bilong ol tren long Tokyo. Nius The Daily Yomiuri i tok: “Inap planti yia bikman bilong dispela lotu, em Shoko Asahara, . . . em i bin tok profet olsem ol man bai lukim Armagedon.” Nius Mainichi Daily News i tok, lotu Aum i olsem lotu Buda, tasol tupela oganaisesen bilong lotu Buda i tok, “dispela tingting long Armagedon, i no wanpela bilip bilong ol Buda. Taim ol i kisim tingting bilong ol bikpela misin Kristen long Japan, ol i sakim tok bilong lotu AUM olsem Armagedon i klostu. Misin Katolik i tok, ol i no save gut long dispela bilip long Armagedon, na misin Talatala i tok, i no stret lotu Aum i bin mekim wok long dispela tok ‘Armagedon,’ long wanem, ol i bin kisim ‘wanpela tok bilong Baibel na paulim tok.’ Sios Yunifikesen i tok, ‘ol i no laikim pasin bilong ol lotu long pretim ol man.’ Na lain Sinyoen i tok, sapos sampela i strong tumas long bihainim wanpela kain tingting, ol man i pilim olsem ol i laik bagarapim ol.” Tasol i olsem bikman bilong kamapim lotu Aum i no bilipim tok profet bilong em yet. Wanpela bikman bilong dispela lotu i tok: “Ating ol i bin mekim wok long dispela ges nogut na tok profet bilong guru [bikman] inap kamap tru.”
Pas i No Kam Hariap
Sapos i gat as na wanpela man i toktok planti olsem ol pas bilong em i no save kam hariap, em i ken tingim wanpela samting i bin painim tupela marit long Visensa, long Itali, na dispela bai mekim gut bel bilong em. Long 1944, dispela man marit bilong Itali i bin stap long wanpela banis kalabus nogut bilong ol Natsi long hap not bilong Yurop. Long dispela taim em i bin raitim pas i go long meri bilong em olsem: “No ken tingting planti sapos yu no harim kwik sampela tok long mi.” Wanpela nius (La Repubblica) i tok, taim man i raitim dispela pas ‘i olsem em i gat save long samting bai kamap long pas bilong em,’ long wanem, meri bilong em i kisim pas 51 yia bihain long em i bin raitim. Nau tupela marit i gat 80 krismas samting. Taim pas i kamap, tupela i kirap nogut. Bilong makim amamas bilong ol, tupela i wokim wanpela liklik pati na singautim sampela pren bilong ol. Dispela pas i bin go we we paslain long em i kamap long tupela marit, i no gat wanpela man i save.
Masin Bilong Kisim Piksa Bilong Lotu
Wanpela nius bilong Itali (La Repubblica) i tok, long ol kantri em planti man i bilong lotu Katolik, ol piksa bilong lotu i makim olsem ‘planti man i givim bel long ol santu i save lukautim ol ples holi.’ Ol i save mekim bikpela wok bisnis long wokim ol dispela piksa bilong lotu, olsem na nau ol i mekim wok long wanpela nupela samting bilong helpim wok bisnis bilong ol. Ol i wokim wanpela masin bilong ol piksa bilong lotu ol i kolim aikomatik. Taim man i putim wanpela samting kain olsem mani i go insait long dispela masin, em nau, bai em i kisim wanpela liklik piksa bilong lotu. Nius i tok: ‘Dispela pasin bilong mekim wok long masin i gutpela, long wanem, ol man yet inap tingim na makim wanem wanem piksa ol i laik kisim, na ol i no ken hatwok long sanap long lain bilong kisim wanpela, na ol piksa i no ken pinis, i gat planti bilong ol wan wan man i ken kisim wanpela.’
Lotu na Stretim Sik
Ol i bin glasim 232 lapun i gat sik long klok na dokta i bin katim ol na stretim klok. Wanpela nius bilong Paris (International Herald Tribune) i stori long ol dispela lapun na i tok: ‘Ol lapun i gat bilip long lotu, dispela bilip i bin strongim na mekim gut bel bilong ol, olsem na ol i no bagarap, winim inap 3-pela taim ol lapun i no save bilip na ol i bagarap.’ Bipo ol saveman i tok, sapos man i pas gut wantaim ol pren na wanblut samting dispela i save helpim skin bilong em, tasol em namba wan taim ol i save “bilip long lotu inap helpim tru skin bilong ol man i gat bikpela sik.” Nius Tribune i tok olsem. Man bilong bosim lain i bin kisim dispela save, em Dokta Thomas Oxman, em i tok: ‘Sapos man i gat bikpela sik na em inap bagarap, tasol em i gat bilip olsem i gat wanpela strong i stap bilong helpim na strongim em, dispela i save helpim skin bilong em.’