Yu Amamas Ol Man i Stap Fri Long Mekim Lotu?

Wanpela man long Estonia i raitim dispela stori bilong Kirap!

PARNU em wanpela biktaun bilong liklik kantri Estonia long hap bilong Boltik em bipo Soviet Yunion i bosim. Parnu i stap long nambis na em i wanpela ples planti man i save go long en bilong kisim malolo. Winim 50,000 man i sindaun long Parnu. Long nau rot i op bilong ol dispela manmeri i ken bihainim lotu ol i laik bihainim​—⁠long sampela yia i go pinis ol i no inap mekim olsem. Long Jun 17, 1995, wanpela nius bilong ples, em Pärnu Leht i tok, Parnu i gat 11-pela lotu na nius bai stori long wan wan.

Namba wan stori bilong nius i tok: “Mipela laik stori pastaim long wanpela kongrigesen em wok bilong ol i bin mekim sampela samting long yumi olgeta​—⁠em ol Witnes Bilong Jehova​—⁠na nau ol i save bung long wanpela haus bilong faktori bilong wokim bia. . . . Long 1931, ol Sumatin Bilong Baibel i kisim nupela nem olsem ol Witnes Bilong Jehova na ol i holim dispela nem i kam inap long nau. Winim 5 milion Witnes Bilong Jehova i stap long olgeta hap bilong graun. Hetkota bilong ol Witnes Bilong Jehova long Estonia i stap long Talin.”

Nius i tok moa: “Kongrigesen bilong ol dispela man bilong autim tok long Jehova i bin kirap long Parnu inap wanpela yia na hap i go pinis. Taim kongrigesen i kirap i gat 25 memba; nau kongrigesen i go bikpela na i gat 120 . . .

“Namba wan taim yu bung wantaim ol bai yu pilim tru. Ol manmeri​—⁠planti bilong ol em ol yangpela marit​—⁠ol i mekim gutpela pasin pren, ol i bilas gut, na i no hatwok long toktok wantaim ol. Mipela ol niusman i kirap nogut long gutpela pasin bilong ol pikinini, long wanem, i hatwok long liklik pikinini i sindaun gut long wankain ples inap wanpela aua na hap​—⁠tasol ol i bin mekim olsem.”

Nius i stori long olsem wanem ol Witnes Bilong Jehova i narakain long ol narapela lotu, olsem: “Ol i save toktok long Paradais bai kamap bihain. Na tu, olgeta i save gut long Baibel, na olgeta taim ol i kamapim tok bilong Baibel.” Nius i pinisim stori olsem: “Ol dispela 120 manmeri, em ol i save autim tok long Jehova, ol i pasim tok pinis long bel; na ol i pilim olsem samting ol i mekim i stret. Bilip bilong ol na ol samting ol i mekim bilong kamapim dispela bilip i bikpela samting long i stap bilong ol.”

I no olgeta man long Parnu i amamas long dispela namba wan stori bilong ol lotu long Parnu. Long Julai 8, 1995, nius i tok: “Mipela i laik kamapim wanpela pas 4-pela lotu i bin salim i kam long mipela long stori mipela i kamapim nupela long nius bilong mipela.” Ol mausman bilong Misin Otodoks long Estonia, na Misin Evanjelikal Luteran Bilong Estonia, na Yunion Bilong Evanjelikal Kristen na Baptis Bilong Estonia, na Misin Metodis Bilong Estonia, ol i bin sainim dispela pas na salim long lain bilong nius.

Pas bilong dispela 4-pela mausman bilong lotu i gat tok olsem: “Yupela i tingim ol Witnes Bilong Jehova pastaim na stori long ol. Mipela i ting dispela i narakain samting tru. Taim mipela tingim ol dispela stori nius Pärnu Leht i laik kamapim long olgeta lotu long Parnu, mipela i laik tokaut olsem mipela i no ken tru larim nius i kam na toktok wantaim mipela.”

Na ol dispela mausman bilong lotu i tok: ‘Long dispela taun planti man i gat tupela tingting, long wanem, kain kain nupela lotu i laik kamapim strong pasin bilong “tingim ol samting bilong spirit,” na ol i wok long subim ol man long kam insait long lotu bilong ol. Mipela i pilim olsem ol nius samting i mas tingim i stap bilong ol man bilong dispela ples long ol samting bilong lotu, na ol i mas save wanem ol lotu i bilong longtaim tru na wanem ol lotu i olsem ol liklik lain i kamap long nau tasol, na ol lain i gat narapela kain bilip na ol i laik daunim ol narapela lain. Ol memba bilong Estonian Council of Churches, em mausman bilong ol lotu Kristen na ol i amamas long wok gut wantaim, ol yet i mas stiaim tingting bilong ol man long ol samting bilong spirit.’

Tasol bihain long em i kamapim dispela pas long nius bilong em, man bilong raitim nius Pärnu Leht, em i tok: “Maski yumi ting wanpela samting i stret, i no olsem dispela samting i stret. Na ating tingting bilong God long kain kain lotu i no wankain long tingting bilong dispela 4-pela bikpela lotu, na tingting bilong ol, ating i no wankain long tingting bilong God. I no gat wanpela bilong yumi i stret olgeta​—⁠ol lotu tu, maski sampela bilip na pasin bilong ol, ol i bin holim longtaim tru​—⁠ol i no stret olgeta.”

Yu pilim olsem wanem long senis i bin kamap long ol lotu long ol kantri bipo Soviet Yunion i bosim? Mipela i save, ol manmeri long olgeta hap i laik save long tok i tru, ol i amamas ol dispela manmeri inap mekim lotu long laik bilong ol yet.

[Mep long pes 23]

(Bilong save ol dispela rait i stap we long pes, lukim buk o magasin)

FINLAN

Helsinki

Solwara Boltik

ESTONIA

Talin

Parnu

LATVIA

Riga

LITUENIA

Vilnius

RASIA

Sen Pitasbek

Mosko

BELARUS

Minsk

[Ol Piksa long pes 24]

Kongrigesen bilong ol Witnes Bilong Jehova long Parnu