Bikpela Hevi i Mekim na Ol i Kamap Refyuji

SAPOS yu wanpela refyuji, olsem wanem long i stap bilong yu? Tingim olsem yu stap isi wantaim ol man na nau wantu tasol olgeta samting i senis. Ol man i sindaun klostu long yu, nau ol i kamap birua bilong yu. Ol soldia bai kam na go insait long haus bilong yu na pulim ol samting na bihain ol bai kukim haus. Yu gat 10-pela minit bilong ranawe wantaim liklik hap kago, nogut yu kisim bagarap. Yu inap kisim bilum tasol, long wanem, yu mas karim inap planti kilomita. Yu bai putim wanem ol samting insait long en?

Taim yu ranawe yu harim strongpela pairap bilong ol gan. Yu bungim ol narapela man i wok long ranawe. Sampela de i lus na yu wokabaut yet​—⁠yu hangre, na nek drai, na les stret. Bilong abrusim bagarap, yu mas subim strong skin bilong yu maski skin i no gat strong moa. Yu slip nating long graun. Yu raun insait long bus bilong painim liklik kaikai.

Nau yu kamap long wanpela kantri yu inap stap gut long en, tasol ol man i was long boda ol i no larim yu i brukim boda. Ol i lukluk insait long bilum bilong yu na kisim olgeta gutpela samting. Yu painim narapela hap na brukim boda. Ol man i putim yu insait long kem bilong ol refyuji i doti nogut tru, em kem ol i bin banisim long waia i gat nil. Planti refyuji i stap insait long kem na ol i gat wankain hevi olsem yu, tasol yu pilim olsem yu stap wanpis, na yu tingting planti.

Yu lus long poroman wantaim famili na ol pren bilong yu. Yu mas kisim kaikai na ol narapela samting long han bilong ol narapela. I no gat wok​—⁠yu sindaun nating tasol. Bel bilong yu i bagarap stret, olsem na yu mas wok long daunim bel hevi na kros bilong yu. Yu tingting planti long i stap bilong yu long bihain, long wanem, yu save yu no inap stap longtaim long dispela kem. Dispela i stret, long wanem, kem i no ples tru bilong yu​—⁠kem i olsem wanpela rum bilong wet tasol o olsem wanpela bakstua i gat bikpela lain man i stap insait long en​—⁠em ol man ol narapela kantri i no laik kisim. Yu tingting planti​—⁠bai ol i strong long salim yu i go bek long ples o nogat.

Long nau ol dispela kain hevi i save painim planti milion man. Wanpela lain bilong Yunaitet Nesen i gat wok long helpim ol refyuji (UNHCR) i tok, 27 milion manmeri long olgeta hap i bin ranawe lusim kantri bilong ol bilong abrusim pait o ol man i mekim nogut long ol. Na 23 milion manmeri moa ol i bin ranawe i go long ol narapela hap bilong kantri bilong ol yet. Long olgeta 115 115 manmeri long olgeta hap, wanpela em i olsem refyuji. Klostu olgeta em meri na pikinini. Pait na ol bikpela hevi i mekim na ol i kamap refyuji i trip nabaut na i no gat wanpela kantri i laik kisim ol. Ol i no tingim pasin na tingting bilong ol refyuji na sakim ol, nogat; ol i no laikim ol long wanem ol i refyuji.

Ol refyuji i makim bikpela hevi tru i stap long olgeta hap. Lain UNHCR i tok: “Ol refyuji i makim olsem olgeta samting long i stap bilong ol man i wok long bagarap. Dispela hevi em i wanpela bikpela samting i kamapim klia tru olsem gavman bilong ol i no wok gut na ol man long kantri bilong ol yet i no sindaun gut wantaim. Taim yumi tingim olgeta refyuji, ol i stap olsem mak i makim pasin i kamap long olgeta lain bilong graun.”

Ol saveman i tok, i no gat narapela hevi i bikpela olsem dispela hevi long ol refyuji, na hevi i wok long i go bikpela moa​—⁠i no gat man i save wanem taim em bai pinis. Wanem as bilong dispela hevi? I gat rot bilong stretim? Ol stori i kam bihain long dispela bai bekim ol dispela askim.

[Ol Piksa Kredit Lain long pes 3]

Manki long han kais: UN PHOTO 159243/J. Isaac

U.S. Navy photo