Sampela Tok i Kam Long Olgeta Hap
Helpim Ol Yaupas Long Afrika
Wanpela nius bilong Yuganda (Uganda National Association of the Deaf [UNAD]) i tok: “NIUS UNAD i laik tok amamas long ol Witnes Bilong Jehova long givim ol yet long wok strong long lain long mekim tok long han.” Nius i stori long sampela Witnes i sindaun long Kampala, Yuganda, na ol i no yaupas, tasol ol i wok long lain long mekim tok long han inap long ol i ken helpim ol yaupas long Yuganda long save long ol samting bilong spirit. Nius i tok, tupela Witnes i lain gut long mekim tok long han, ‘ol i painia oltaim, olsem man bilong autim tok long olgeta de, na ol i bilong wanpela bikpela lain bilong lotu long olgeta hap. I no gat planti lotu i wok long i go bikpela na i gat gutpela nem olsem dispela lotu. Long olgeta hap ol man i save, dispela lotu i bihainim tasol ol tok bilong Baibel.’
Ol Dolfin i Lukautim Man
Wanpela nius (Journal of Commerce) i tok, sampela dolfin i bin helpim wanpela man i waswas long solwara Retsi long nambis bilong Isip. Taim Mark Richardson bilong Briten i waswas, wanpela sak i birua long em. Bihain long sak i kaikaim wanpela sait bilong bodi bilong em na wanpela han, 3-pela dolfin botol-nus i raunim em na “ol i meknaisim pul na tel bilong ol bilong pretim sak.” Ol dolfin “i no lusim Mista Richardson—ol i raunim em i go inap long taim ol pren bilong em i kam na kisim em.” Nius Journal i tok, “dispela kain pasin bilong ol dolfin em pasin bilong ol dolfin mama long lukautim pikinini bilong ol sapos birua i stap.”
Lap na Stap Longtaim Moa?
Inap longpela taim pinis ol man i ting pasin bilong yumi man long lap em i olsem gutpela marasin. Inap 10-pela yia i go pinis ol saientis long Stet Yunivesiti Bilong Nu Yok, ol i tingting long kisim save long dispela samting. I no longtaim i go pinis na ol i kamapim save bilong ol olsem, skin bilong man i save lap i kamapim ol strongpela homon, em wanpela kain marasin long skin, na dispela i save givim strong long skin bilong sakim ol sik. Homon ol i kolim saitokin i save helpim wok bilong ol waitpela sel long blut, em ol sel i gat wok long pasim sik em wanpela vairas o bakteria i as bilong en, na tu, dispela homon i wok long pinisim ol sel em sik kensa inap kamap long en. Nius The Sunday Times bilong Landon i tok, dispela homon em i “wanpela bilong ol marasin long skin em pasin bilong lap i save mekim i kamap planti moa.” Ol samting lap i save mekim long ol homon saitokin i mekim na sampela saveman i kolim ol dispela homon olsem homon bilong amamas. Olsem na nius i tok, lap em “rot bilong i stap longtaim moa.”
Misin Katolik Long ‘Taim Bilong Bikpela Hevi’
Wanpela nius (Star-Telegram) bilong Alington, Teksas, i tok, wanpela bikpela pepa wanpela lain i bin kamapim na 7-pela bisop i insait long dispela lain, i stori olsem Misin Katolik i stap long ‘taim bilong bikpela hevi.’ Dispela pepa i tok, “misin i mas stretim hevi bilong en long i no stap wanbel.” Sampela lain i bin skelim tingting bilong ol man na ol i kamapim klia olsem planti bilong ol 60 milion Katolik long Yunaitet Stets ol i no wanbel long bilip bilong misin long ol pris i no ken marit, na ol i no orait long misin i no larim ol meri i mekim wok pris. Long wanpela bung bilong ol niusman i kamapim dispela pepa, kadinal Joseph Bernardin i bin tokaut olsem em i tingting planti, long wanem, ‘insait long misin pasin bilong kisim narapela narapela tingting i go bikpela moa, na sampela taim, ol i givim bel long bagarapim’ wok bilong misin. Em i tok: ‘Dispela i mekim na misin inap bruk. Ol gutpela bilipman bilong misin i les pinis na i stap bilong misin long ai bilong gavman, ol lain man, na ples, i bagarap pinis.’
Wasim Han Bilong Yu!
Wanpela nius (The New York Times) i tok: I no longtaim i go pinis na wanpela lain (The American Society for Microbiology) i bin helpim wok bilong ol saveman long painimaut hamas manmeri i save wasim han bilong ol bihain long ol i go long toilet. Klostu olgeta man i save ol i mas wasim han. Dispela lain i bin mekim wok long telefon bilong givim askim long 1,004 manmeri, na klostu olgeta (94 pesen) i tok, ol i save wasim han bilong ol bihain long ol i go long toilet. Tasol olsem wanem? Ol i save mekim olsem? Ol saveman i bin was long ol toilet long ol bikpela stua samting long 5-pela bikpela taun long Amerika, na ol i kisim save olsem: Long 6,333 manmeri ol i bin was long ol, inap 61 pesen bilong ol man na inap 74 pesen bilong ol meri, ol tasol i bin wasim han bilong ol bihain long ol i go long toilet. Sapos han i doti, i no hatwok long sik i kalap kalap long ol man, na sapos wanpela man tasol i no wasim han na em i holim kaikai, planti man i ken kisim sik long em. Ating hap asua bilong dispela hevi em ol papamama. Dokta Gail Cassell i tok: “Long nau ol mama i no save tokim ol pikinini bilong ol long wasim han,” na “ol skul i no save tokim pikinini long mekim olsem. I mas i gat man i toksave gen long yumi olsem dispela samting i bikpela samting.”
Ol Samting Bilong Komyunio Insait Long Karamap
Nius Christianity Today i tok, wanpela bisnisman bilong Amerika, em Jim Johnson, em i redim ol samting bilong Komyunio na putim insait long wanpela kain karamap ol man inap tromoi bihain long ol i mekim wok long en. Insait long karamap i gat wanpela liklik hap bret i no gat yis, na wanpela liklik retpela kap plastik, wain o hap wara bilong grep i stap long en. Ai bilong karamap i gat tupela liklik samting man i mas pulim bilong opim karamap bilong kisim wain na bret. Johnson i tok, dispela kain samting i gutpela, long wanem, ol samting i redi i stap, na i no gat wok long wasim wanpela samting, na taim i no lus nating, na em i klinpela rot bilong man i kisim ol samting bilong Komyunio. Winim 4,000 haus lotu i mekim wok long dispela nupela samting, tasol sampela man i toktok planti, long wanem, ol i ting Komyunio i kamap olsem wanpela samting bilong bisnis. Johnson i bekim tok bilong ol olsem: “Taim Jisas i givim kaikai long planti planti man, em namba wan taim ol man i kisim kaikai em wantu tasol i redi i stap.”
Go i Kam Bilong Ol Pisin Balus
Nius New Scientist i tok, inap longtaim ol man i lukim ol balus long Landon i sindaun wantaim ol pasindia long ol tren na raun. Na sampela man i tok, ol pisin i save long wanem hap ol i mas lusim tren. Dispela nius i askim ol man long salim pas long nius sapos ol tu i bin lukim dispela samting. Planti man i salim pas na stori long ol dispela pisin. Wanpela man i raitim pas na tok: “Long 1974 i go inap 1976, planti taim mi lukim wanpela balus em gras bilong en i retpela liklik, i kalap long tren long Padington na i go daun long narapela tren-stesin.” Narapela man i bin lukim wankain samting long 1965. I olsem inap 30 yia nau ol balus i raun long ol tren bilong Landon, tasol ol i no baim!
Lo i Orait Long Man i Kilim i Dai Em Yet
Nius The New York Times i tok: Wanpela man long Noten Teritori bilong Ostrelia, em i namba wan man bilong i dai aninit long wanpela nupela lo bilong dispela hap. Lo i orait long dokta i helpim dispela man i laik kilim i dai skin bilong em yet. Dispela man i gat 60 samting krismas na em i gat sik kensa long prostet ol dokta i no inap stretim. Dokta Philip Nitschke, em dokta i bin givim marasin nogut long dispela man bilong helpim em long i dai, em i tok: “Em namba wan taim wanpela man i bin kilim i dai skin bilong em yet na lo i orait long en. Bilong mekim olsem, ol waia samting bilong wanpela masin i pas long skin bilong em na em yet i mas subim wanpela baten bilong wanpela liklik kompyuta klostu long bet bilong em bilong kirapim masin long mekim ol samting bilong kilim em i dai.” Tasol planti man i no amamas long dispela nupela lo. Palamen i tingting long daunim dispela lo, na sampela dokta na lotu i kamapim tok long haus kot bilong daunim dispela lo.
Ol Haus Lotu i Kamap Narapela Samting
Wanpela nius bilong Holan (Het Overijssels Dagblad) i tok, inap olsem 300 haus lotu long Netelan ol i stretim bilong kamap ol supamaket, ol flet, ol ofis, na sampela samting moa. Insait long 15 yia i go pinis, planti man (inap 50 pesen samting) ol i no go moa long lotu, olsem na planti lotu i amamas long man i laik baim haus lotu bilong ol bambai ol i no gat wok moa long tromoi bikpela mani long lukautim haus lotu. Pe bilong sampela haus lotu i no gat bikpela pe—wanpela gilda tasol (em olsem 75 toea samting)! Tasol sampela man olsem ol lapun, ol i bel hevi taim haus lotu i kamap wanpela haus bilong bisnis samting. Wanpela nius i tok: “Inap planti yia ol i bin go long haus lotu. Ol i bin kisim baptais na marit long en, na nau ol i lukim ol manmeri i mekim ol narapela samting long en . . . , tok doti tu.”