No Ken Larim Piksa i Giamanim Yu
MIPELA i stap wantaim wanpela pren long haus bilong em insait long bus, na mipela i bin slip long hap bilong en ol i wokim daunbilo insait long graun. Ol windo i stap antap na taim mipela i lukluk i go ausait, mipela i lukluk stret long graun. Long 6 klok samting long namba wan moning mipela i stap long dispela haus, narapela kain pairap i bin kirapim mi, na i olsem i kamap long ol narapela narapela hap bilong haus. Mi laik save long dispela samting, olsem na mi kirap na go long haus kuk nogut pairap i kamap long bokis ais o masin bilong hatim rum. Tasol nogat. Mi tingting planti, na i no longtaim na mi harim pairap i kam long wanpela rum. Isi isi mi wokabaut i go insait long dispela rum, na mi kirap nogut long lukim wanpela naispela retpela pisin i stap ausait, em pisin kadinal, na em i wok bilong paitim glas bilong windo! Em i wok long flai i go i kam long ol windo long haus—long rum slip, rum waswas, rum bilong lukim televisen—long olgeta windo i stap klostu long graun. Tingting bilong mi i paul.
Taim mi wokabaut isi isi i go klostu long windo, mi bin kisim save long as na pisin i wok long mekim olsem—wanpela meri kadinal i stap klostu tasol ausait, na em i wok long kaikai ol pikinini diwai. Tasol bilong wanem pisin man i wok long paitim ol windo? Ating piksa bilong em yet long glas bilong ol windo i giamanim em, na em i ting em narapela pisin man na em i laik pretim em na bai em i ranawe! Piksa long glas i giamanim em.
Bihain mi kisim save olsem, dispela i as na pisin i mekim dispela narapela kain pasin. Long buk bilong em (The Cardinal), June Osborne i tok, pisin man ‘i save mekim planti samting bilong lukautim hap graun bilong en yet bambai ol narapela wankain pisin man i no ken i kam. . . . Em i save rausim ol, na tu, em i gat nem olsem wanpela pisin bilong paitim piksa bilong en yet em i lukim long samting olsem plet kapa bilong taia bilong ka, o long spai-glas bilong ka, o long ol bikpela windo, o long ol dua i gat glas.’ Na Osborne i kamapim wanpela tok mipela i wanbel long en, em i tok: “Dispela inap bagarapim gutpela sindaun bilong ol man i gat haus.” Mipela yet i bin kisim save long dispela samting.
Ol man i ken mekim wanem bambai pisin man i no ken mekim dispela pasin? Osborne i tok: “Sampela taim i gutpela long karamapim ol samting i olsem glas bambai i no gat pairap na yu inap i stap isi . . . , na tu dispela inap helpim pisin na bai em i no ken bagarapim em yet long dispela kain pasin bilong em.”—Wanpela man i salim dispela stori i kam.