Lukautim Yau Bilong Yu!

I NO longtaim i go pinis ol i givim askim long 400 yangpela long Frans na ripot i tok olsem: Long olgeta 5-pela 5-pela yangpela, yau bilong wanpela i bagarap. Inap 10-pela yia i go pinis ol i bin mekim wankain samting na long dispela taim long olgeta 10-pela 10-pela yangpela, yau bilong wanpela i bagarap. Yau bilong planti yangpela i bagarap, olsem na long kirap bilong 1996, wanpela bung bilong gavman bilong Frans (French National Assembly) i pasim tok olsem, pairap bilong ol masin stereo i no ken pairap strong olsem winim 100 desibel.

Ol i tok, yau bilong planti i bagarap, long wanem, mak bilong pairap i save kamap long ol hetpon bilong stereo i antap tumas. Dokta Jean-Pierre Cave i tok, sapos mak bilong pairap i antap long 100 desibel, bihain long sampela aua tasol yau inap bagarap olgeta. Insait long sampela minit tasol, yau inap bagarap olgeta sapos mak bilong pairap i antap long 115 desibel. Wanpela bikpela kampani bilong salim ol stereo samting long Frans (FNAC) i tok, mak bilong pairap bilong planti stereo kampani i salim i winim 100 desibel. Sampela stereo bilong ol yangpela inap kamapim pairap olsem 126 desibel, dispela i winim 100 desibel inap 400 taim!

Saveman Christian Meyer-Bisch bilong Frans i tok, ating ol bung bilong rok-musik i bagarapim yau bilong planti yangpela moa, winim stereo ol yangpela yet i holim. Tru tumas, ol man i save go oltaim long bung bilong rok-musik, yau bilong ol i bagarap moa, winim ol narapela yangpela i gat 18 krismas na ol i no gat sik. Olsem na namba tu bikman bilong dispela bung bilong gavman (French National Assembly), em Jean-François Mattei, em i tok: “Yumi wok long kamapim ol lain manmeri em yau bilong ol i bagarap.”

Olsem na bilong lukautim yau bilong yu, was gut long pairap!