Pamukmeri Wantaim “Ol King Bilong Graun”
OL LOTU bilong dispela graun ol i kolim Kristen ol i bin insait long ol wok bilong bosim graun na bosim ol man, na ol i bin bung wantaim ol gavman na king long mekim dispela samting. Na ol dispela gavman o king i mas helpim ol dispela lotu long mani na ol narapela gutpela gutpela samting bilong skin. Wanpela king bilong bipo, em Salemen, (bilong yia 742-814 C.E.) em i save, sapos em i wok wantaim lotu, ol bikman bilong Misin Katolik bai laikim em na bai ol i helpim em.
Wanpela bikpela buk (The New Encyclopædia Britannica) i tok, pop i makim dispela king Salemen na papa bilong em na brata bilong em long kamap nupela lain king na senisim narapela lain ol i bin rausim ol. Na buk i tok, long dispela taim ol i stretim tok na bai lain bilong dispela Salemen i ken wok wantaim pop long sakim wanpela lain ol i kolim Lombad, na Salemen i tok, gavman bilong em i save wok wantaim lotu Katolik.
Long yia 800 C.E. Pop Leo Namba 3 i laik makim Salemen long kamap bos bilong ol kantri em Rom i bosim long hap bilong wes, na taim pop i mekim Misa Bilong Krismas long haus lotu bilong Santu Pita long Rom, em i givim hat king long Salemen.
Pamukmeri i Mangal
Tasol ol pamukmeri i save laikim pe. Orait Salemen i mas givim wanem pe long Rom hia, em i olsem Babilon? Buk i tok, long haus lotu bilong Santu Pita em Salemen i kolim gen tok promis bilong papa bilong em long larim pop i bosim sampela bikpela hap bilong Itali. Na buk i tok, Salemen i bungim wok politik na wok lotu, na tupela samting wantaim i bosim kantri bilong em.
Na yumi ken stori long Kadinal Wulsi tu (yia 1475-1530) na yumi ken save, em tu i bin holim bikpela wok long bosim ol man na long kisim ol samting. Dispela buk (Britannica) i tok, Wulsi i holim wok kadinal long misin na wok politik wantaim, na em i wok wantaim King Henri Namba 8 long bosim Englan, na long Desemba long yia 1515 em i kamap bikpela man bilong Englan, na wok politik wantaim wok lotu bilong em i givim bikpela strong long em, na long dispela rot em i bungim bikpela mani na planti kago, na king tasol i winim em long ol mani kago samting. Na olsem ol tok piksa bilong Revelesen i kolim, bikpela pamukmeri i mas kisim bikpela pe.
Na narapela bikpela man bilong bipo em i holim wok kadinal long misin na em i bosim hap bilong Riseliu (long yia 1585-1642). Em i holim bikpela namba long hap bilong Frans na em i holim bikpela strong, na dispela buk (Britannica) i tok, em i bin bungim bikpela mani kago.
Na bihain long Riseliu i gat narapela kadinal i kamap, em Jules Masarin (yia 1602-1661). Em i namba wan minista bilong politik long hap bilong Frans long taim bilong King Lui Namba 16. Ol i no makim em long kamap pris, tasol long yia 1641 Pop Eban Namba 8 i makim em long kamap kadinal. Dispela Kadinal Masarin tu i mangal long kisim bikpela mani kago. Buk (encyclopedia) i tok, ol birua bilong Masarin ol i toknogutim em long wanem em i save mangal. Em i kamapim planti ofis bilong em na ol narapela samting bilong helpim em yet, na sampela taim em i paulim mani bilong king.
Long nau tu ol lotu giaman i wok yet long pulim mani samting na bungim bilong ol yet, na ol i triam bosim ol wok politik tu. Yumi ken tingim wanpela oganaisesen Katolik em i save wok hait bilong en Opus Dei (olsem Wok Bilong God). Pop i orait long dispela oganaisesen, na wanpela man bilong raitim stori (em Lawrence Lader), em i tok, namba wan wok bilong dispela lain i bilong daunim wok komyunis na sampela kain wok politik. Em i save kisim ol yangpela Katolik i gat save na ol i putim ol bikpela skul na yunivesiti Katolik na ol i givim bikpela wok long ol long bosim ol samting long ol dipatmen bilong gavman na bosim mani bilong gavman na ol nius. Long Spen dispela lain i kamap strong long taim Franko i bosim Spen, em wanpela Katolik. Long dispela taim Franko i gat 19 memba long gavman bilong em na 10-pela i bilong dispela lain Opus Dei.
Long Amerika sampela pasto i mekim tok bilong lotu long televisen na ol i maniman na ol i gat planti kago samting. Sampela pasto Angliken i mekim pasin antap na ol i insait long ol wok politik, na sampela i wok strong long kamap presiden bilong Amerika. Tru tumas, maski dispela lapun pamukmeri i no holim bikpela namba olsem bipo em i bin holim, tasol long giaman bilong em em i holim yet bikpela mani kago na strong, na em i laik bosim ol gavman samting.−Revelesen 17:4.
Tasol olsem wanem long nem bilong dispela pamukmeri, em Bikpela Babilon? Olsem wanem dispela nem i givim tingting long yumi na yumi inap save, dispela meri long Revelesen i makim husat?
[Ol Piksa long pes 6]
Ol dispela kadinal hia, em Wulsi, na Masarin, na Riseliu, taim ol i wok wantaim gavman ol i kisim na bungim bikpela mani bilong ol
[Kredit Lain]
Photos: Culver Pictures