Baibel i Tok Wanem?

I Stret Ol Pikinini i Makim Lotu Bilong Ol Yet?

LONG taim pikinini i kamap nupela na i go inap long taim em i laik go bikpela, ol papamama i save makim ol samting pikinini i mas mekim. Na tu, papamama i gat gutpela tingting, ol i save wanem taim ol i no ken strong tumas na ol i ken tingim laik bilong pikinini.

Tasol larim pikinini long tingim ol samting em i laik mekim o nogat, em inap givim hatwok long papamama. Tru, ol pikinini inap makim sampela gutpela rot na dispela inap helpim ol, tasol ol inap makim rot nogut tu na dispela inap kamapim hevi.​—⁠2 King 2:​23-​25; Efesus 6:​1-3.

Olsem: Ol pikinini i laik kisim ol rabis kaikai na ol gutpela kaikai bilong strongim skin, nogat. Bilong wanem? Long wanem, taim ol i liklik, ol yet i no inap skelim gut ol samting. Yu ting papamama i bihainim gutpela tingting sapos ol i larim pikinini i mekim olsem, na ol i ting bihain bai pikinini i kirap long kisim ol gutpela kaikai? Nogat, a? Ol papamama i mas tingim gut ol samting bai painim pikinini long bihain na dispela i mas kirapim ol long makim rot pikinini i mas bihainim.

Olsem na i stret papamama i makim samting pikinini i mas mekim, olsem long kaikai, klos, bilas, na gutpela pasin em i mas bihainim. Tasol olsem wanem long lotu? Ol papamama i mas makim lotu bilong ol pikinini tu?

Makim Rot Bilong Bihainim

Sampela bai tok olsem, ol papamama i no ken subim ol pikinini long bihainim ol bilip bilong lotu bilong ol. Inap 160 yia i go pinis, sampela man em ol i tok ol i gat bilip Kristen, ol i tok, “yumi no ken skulim ol pikinini long lotu, long wanem, nogut ol i strong long tingim wanpela bilip, yumi mas larim ol i stap nating i go inap long taim ol yet inap makim bilip ol yet i laik bihainim, na ol i kirap na makim wanpela.”

Tasol dispela tingting i no stret wantaim tok Baibel i mekim. Baibel i kamapim tok olsem, em i bikpela samting long skulim ol pikinini long ol bilip bilong lotu kirap long taim ol i bebi yet. Sindaun 22:6 i tok: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.”

Tok Hibru ol i tanim olsem “pikinini” i makim taim pikinini i stap liklik yet i go inap long taim em i gat 19 krismas samting. Saveman Joseph M. Hunt bilong Yunivesiti Ilinoi long Amerika, em i stori olsem i bikpela samting long lainim ol pikinini taim ol liklik yet, na em i tok: “I go inap long taim pikinini i gat 4-pela o 5-pela krismas, em i save lainim hariap ol samting na i no hatwok long lainim ol. . . . Ating 20 pesen bilong ol save [em] bai kisim em i kisim taim em i no winim yet 4-pela krismas.” Dispela i strongim gutpela tok bilong Baibel olsem em i bikpela samting long ol papamama i stiaim gut pikinini taim em i liklik yet, na skulim em long bihainim tok bilong God.​—⁠Lo 11:​18-​21.

Na bikpela samting, em Baibel i stiaim ol papamama Kristen long skulim ol pikinini long laikim Jehova. Lo 6:​5-7 i tok: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela. Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” Dispela tok Hibru ol i tanim olsem “lainim,” i givim tingting olsem ol man i sapim wanpela samting long wanpela kain ston. Yumi no inap sapim gut wanpela samting sapos yumi mekim wanpela o tupela taim tasol, nogat; yumi mas mekim mekim. Wanpela Baibel (The New English Bible) i tanim dispela tok Hibru olsem “mekim gen.” Yumi ken tok, long “lainim” man, i olsem yumi putim gut ol samting long tingting bilong em bambai em i no ken lusim tingting long en.​—⁠Skelim wantaim Sindaun 27:⁠17.

Olsem na ol papamama Kristen i mas mekim gut wok bilong ol long putim ol bilip bilong lotu long bel na tingting bilong ol pikinini. Ol i no ken lusim dispela wok bilong ol na larim ol pikinini i makim lotu bilong ol yet. Ol i mas kisim ol ‘liklik pikinini’ i go wantaim ol long ol miting. Long miting, ol papamama i ken sindaun wantaim ol na helpim ol long pilim tru ol gutpela samting bilong spirit wanpela famili i stap wanbel ol inap kisim taim ol i putim gut yau long ol tok bilong Baibel, na ol i bekim ol tok samting long miting.​—⁠Lo 31:​12, 13; Aisaia 48:​17-​19; 2 Timoti 1:5; 3:​15.

Wok Bilong Papamama

Sapos yumi tokim pikinini long kaikai wanpela samting, long wanem, em i gutpela kaikai bilong strongim skin, dispela i no makim olsem pikinini bai laikim dispela kaikai. Olsem na mama i gat gutpela tingting, em i save long kukim gut ol dispela kaikai bambai pikinini i amamas long kaikai. Na tu, em bai kukim kaikai i stret long bel bilong pikinini.

Olsem tasol, taim pikinini i harim tok bilong Baibel long namba wan taim ating em bai les, na maski papamama i wok long helpim pikinini long kisim stretpela tingting long dispela samting, ating ol i no inap helpim em. Tasol Baibel i tokaut stret​—⁠ol papamama i mas wok strong tru long skulim pikinini bilong ol kirap long taim ol i liklik yet. Olsem na ol papamama i gat gutpela tingting, ol i save tingim gut save bilong pikinini na kamapim gut ol tok bilong Baibel bambai dispela i pulim tingting bilong pikinini na em bai laik long harim.

Ol papamama i gat pasin sori, ol i pilim tru olsem ol i gat wok long painim kaikai na klos samting bilong ol pikinini, na planti taim ol papamama tasol i save gut long ol samting pikinini i mas kisim. Olsem na Baibel i tok, namba wan lain bilong lukautim ol pikinini long ol samting bilong skin na spirit, em ol papamama​—⁠na papa i gat bikpela wok long mekim olsem. (Efesus 6:⁠4) Olsem na papamama i no ken abrusim dispela wok bilong ol na painim rot bilong givim dispela wok long narapela man. Ol i ken kisim helpim long ol narapela, tasol dispela i no inap senisim wok papamama i mas mekim bilong skulim pikinini.​—⁠1 Timoti 5:⁠8.

Sampela taim long i stap bilong ol, olgeta wan wan man i save makim wanem lotu em i laik bihainim, sapos em i laik bihainim wanpela. Sapos ol papamama Kristen i mekim wok bilong ol long skulim ol pikinini bilong ol long tok bilong God kirap long taim ol pikinini i liklik yet, na sapos ol i mekim wok long dispela hap taim long skulim ol pikinini long skelim ol samting long rot bilong ol gutpela tok bilong Baibel, orait, pikinini bai makim gutpela rot long bihain.​—⁠2 Stori 34:​1, 2; Sindaun 2:​1-9.

[Piksa Kredit Lain long pes 26]

The Doré Bible Illustrations/Dover Publications, Inc.