Wanpela Gutpela Samting Tru Mi Kirap Nogut Long En

Dana Folz i gat 8-pela krismas taim em i kisim save olsem papamama em i stap wantaim ol, ol i no papamama tru bilong em. Sampela yia bihain em i tingting: ‘Husat i mama tru bilong mi? Em i wanem kain meri? Bilong wanem em i givim mi long narapela meri bilong lukautim mi? Mi gat sampela brata o susa?’ Kaunim stori long olsem wanem Dana i painim mama tru bilong em na wanpela samting i bin kamap bihain em i kirap nogut long en.

MAMA i karim mi long Ogas 1, 1966, long Kesikan, Alaska, Yunaitet Stets. Susa bilong mi, em Pam, em i bikpela long mi inap 2-pela yia. Papa bilong mipela i wok welfe long wanpela lain (Bureau of Indian Affairs), na planti taim ol i salim em i go long ol narapela hap. Mipela i bin sindaun long narapela narapela hap long Alaska. Bihain mipela i bin sindaun long Aiowa, Oklahoma, Arisona, na Origen.

Wanpela taim long 1975, mipela i go lukim sampela wanblut long Wiskonsin, na sampela kasen bilong mi ol i stori nogut long wanpela kasen. Ol i tok: “Papamama bilong em ol i no papamama tru bilong em, olsem na em i no wanpela Folz tru.” Taim mipela i kam bek long haus, mi askim mama long dispela samting, na mi kirap nogut long lukim pes bilong em. Mama i stori long mi long dispela samting. Long dispela nait, mama i krai taim em i tokim mi, em na papa i no papamama tru bilong mi na susa bilong mi.

Long dispela taim, dispela samting i no bikpela samting long mi, na inap sampela yia mi no tingting tumas long en. Mi gat wanpela mama na wanpela papa, na sindaun bilong mi i olsem sindaun bilong ol narapela pikinini. Papamama i pasim tok long famili i mas sindaun gut long wanpela hap. Taim mi gat 9-pela krismas, mipela i sindaun long Vankuva, Wosington. Mitupela papa i pas gut wantaim​—⁠mi na mama nogat. Sampela taim mi bihainim laik na tingting bilong mi yet na mi bikhet. Mama i bel hevi long pasin bilong mi na ating dispela i mekim na mitupela i no poroman gut wantaim.

Laikim Meri na Yunivesiti

Taim mi stap long haiskul mi bungim Trina na wantu mipela i kamap pren. Taim mi pinisim skul ol i makim mi long go long Origen Stet Yunivesiti long Korvalis, Origen, na gavman bai baim skul. Mi orait long i go. Taim mi no gat skul, mi save go i kam long Vankuva bilong lukim Trina. Em i mas stap narapela yia long haiskul. Mi no stadi gut, tasol mi no wari long dispela samting, mi ting maski mi no stadi gut, mi bai win. Mi kirap nogut long namba wan ripot bilong mi​—⁠bipo mi no bin kisim wanpela ripot nogut olsem dispela! Mi sem pipia. Tasol dispela i no pasim mi long i go lukim Trina​—⁠mi kisim ol buk bilong skul i go wantaim mi inap long mi ken stadi taim mi lukim em.

Wanpela taim mi lusim Vankuva na taim mi draivim motabaik bilong mi i go bek long yunivesiti, bikpela bagarap i painim mi. Bihain liklik, bikpela bagarap tru i painim mi taim wanpela ka i bamim mi taim mi brukim rot. Mi kisim wanpela wok mani na mi no laik go bek long yunivesiti.

Tingim Lotu

Bihain mitupela Trina i sindaun nating wantaim. Mipela i bilip long God na i laik save long em, tasol mipela i pilim olsem ol lotu i gat tupela maus. Olsem na mipela yet i kirap na kaunim Baibel, tasol mipela i no inap kisim save long en.

Wanpela taim long ples wok bilong mi long Potlan, Origen, ol wanwok i tok bilas long wanpela man mi ting pasin bilong em i gutpela, winim bilong ol narapela man. Randy i no kros, em i karim tasol dispela hevi. Bihain liklik mi askim em: “Wanem dispela tok mi harim olsem yu man bilong autim tok?”

Em i tok: “Em stret, mi man bilong autim tok.”

Mi askim em: “Wantaim husat?”

“Mi wanpela Witnes Bilong Jehova.”

“Ol Witnes Bilong Jehova i husat?”

Em i kirap nogut na i tok: “Yu no save?”

“Mi no save. Ol Witnes Bilong Jehova i husat? Olsem wanem? Mi mas save long ol?”

Randy i lap liklik na i tok: “Yes, yu mas save long ol. Yu bai mekim wanem long belo?”

Em nau, em namba wan taim mitupela i bin toktok planti taim long Baibel long belo. Wanpela nait mi tokim Trina long ol tok bilong mitupela Randy. Trina i kirap nogut na i tok: “Yu no ken toktok wantaim ol Witnes Bilong Jehova. Ol i narapela kain! Ol i no Kristen. Ol i no mekim Krismas.” Na em i stori long sampela samting moa em i bin harim long ol Witnes Bilong Jehova.

Mi tokim em: “Wanpela i bin tokim yu long planti samting i no stret.” Bihain long mipela i toktok longpela taim liklik, mi inap helpim em long save olsem em i no bin harim olgeta tok i tru. Bihain em i askim mi long givim sampela askim bilong em long Randy. Mi mekim olsem na kam bek wantaim stretpela bekim bilong Baibel. Bihain Trina i tok: “Mi no bin save olsem ol dispela tok i stap long Baibel, tasol mi tingting yet olsem dispela lain i narapela kain. Sapos yu laik toktok yet wantaim em long Baibel, em laik bilong yu, tasol yu no ken strong long mi mas bilipim tok bilong ol.”

Taim Bilong Hevi

Mi bilipim ol tok bilong Baibel mi lain long en, tasol mi pilim olsem mi no inap bihainim. I olsem nau mitupela Trina i tok kros planti taim. Olsem na mi na wanpela pren i pasim tok long lusim ol gelpren bilong mipela na go long Oklahoma bilong kisim nupela sindaun. Mi stretim rot bilong kisim malolo long wok mani. I no longtaim na mi na pren bilong mi i sindaun long wanpela flet long wanpela liklik taun klostu long boda bilong Teksas. I no longtaim na mi sori long Trina, tasol maski mi pilim olsem, mi tingting long kisim amamas.

Mi kisim save olsem, long Teksas ol yangpela i kisim pinis 19 krismas ol inap dring, olsem na taim pren bilong mi i go long wanpela hap bilong raun, wanpela nait mi brukim boda bilong kisim amamas long wanpela ples dring i gat nem. Mi spak nogut tru, bamim ka bilong mi, na polis i putim mi long rum gat. Bihain mi inap toktok wantaim papa bilong mi na em i baim kot olsem beil. Na tu, Trina i orait long mi ken stap gen wantaim em, olsem na mi amamas tru! Mi kisim olpela wok mani bilong mi na mi kirap gen na toktok wantaim Randy long Baibel.

Bosim i Stap Bilong Mi

Kirap long namba wan taim mi bin harim stori long ol Witnes Bilong Jehova, em klostu tupela yia pinis, na nau mi tingting pinis long givim bel long stadi long Baibel. Mi gat 20 krismas, na ol askim mi bin stori long en long kirap bilong dispela stori, em ol askim long mama tru bilong mi, nau ol i wok long kamap strong long tingting bilong mi. Olsem na mi kirap na wok strong long painim mama tru bilong mi.

Mi telefon long haus sik long Alaska, em ples mama i bin karim mi, na mi askim ol long ol samting mi mas mekim bilong painim mama. Ol i toksave long mi, na bihain mi kisim kopi bilong pepa i makim husat i mama bilong karim mi. Mi kisim save olsem nem bilong mama, em Sandra Lee Hirsch, tasol pepa i no gat nem bilong papa bilong mi. Sandra i gat 19 krismas tasol taim em i karim mi, olsem na mi ting em i bin pret, na wanpela meri singel i kamapim nating pikinini, na em i hatwok long givim mi long narapela meri. Tasol pepa i no gat planti rait inap long mi ken painim mama bilong mi.

Long dispela taim mi stadi wantaim Randy, na nau mi save, mi painim pinis lotu i tru. Tasol olgeta taim mi hatwok long lusim smok, em wanpela samting i mekim doti skin bilong yumi. (2 Korin 7:⁠1) Mi pilim olsem Jehova i les long mi. Taim mi pilim olsem, wanpela Witnes long Haus Kingdom i mekim wanpela tok i bin helpim mi tru. Em i tok, em laik bilong Satan na yumi pundaun, na yumi sori taim sampela i les na lus long kisim laip oltaim. Na em i tok: “Olgeta hevi yumi karim, em yumi mas putim long han bilong Jehova, na wetim em long sambai long helpim yumi long taim bilong hevi.”​—⁠Song 55:⁠22.

Dispela tok mi harim i sutim tru bel bilong mi! Mi kirap na bihainim tok dispela Witnes i bin kamapim, na planti taim mi beten askim Jehova long helpim mi. I no longtaim na mi lusim smok, na mitupela Trina i marit, na olgeta taim mi stadi long Baibel wantaim Randy. Bihain Trina tu i kirap na stadi. Long Jun 9, 1991, mi kisim baptais bilong makim dediket bilong mi long Jehova. Klostu tupela wik bihain, Trina i karim namba wan pikinini meri bilong mipela, em Breanna Jean.

I Stap Bilong Mi Wantaim Papa

Mitupela papa i pas gut wantaim. Em i man bilong mekim gut long mi, na taim mi bel hevi, em i stap bilong strongim bel bilong mi. Tasol taim em i mas stretim mi, em i strong long mekim olsem. Olsem na long 1991 taim mi kisim save olsem papa i gat sik kensa long wetlewa bilong em na ol dokta i no inap stretim, mi bel hevi stret. Long dispela taim papamama i sindaun pinis long Hemilton, Montana. Planti taim mipela i go long dispela hap bilong lukim em na long strongim bel bilong mama.

Mipela inap givim buk Yumi Bilong i Stap Nau Tasol? long papa. Em i tok promis long kaunim, na em i tok em i save tingting planti long i stap bilong famili bilong em. Taim mi lukim em long laspela taim, em i tokim mi em i amamas tru mi pikinini bilong em, na em i laikim mi tru. Em i krai na tanim het bilong em na lukluk i go long windo. Pastaim long mi lusim em, planti taim mi holim em na em i holim mi. Paslain long papa i dai long Novemba 21, 1991, em i bin kaunim bikpela hap bilong buk mipela i bin givim long em.

Bihain long papa i dai na mipela i go sindaun long Moses Lek, Wosington, mi gat bikpela laik moa long save long mama tru bilong mi. Tasol maski mi tromoi bikpela hap taim long kisim dispela save, mi no slek long ol wok bilong spirit. Trina i kisim baptais long Jun 5, 1993, na 6-pela mun bihain, em i karim namba 2 pikinini meri bilong mipela, em Sierra Lynn.

Rot Bilong Painim Mama Tru

Olgeta taim mi salim pas i go long ol ofis bilong gavman samting long Alaska bilong painimaut husat i mama tru bilong mi. Na mi bin mekim wok long kompyuta tu bilong kisim dispela save, tasol i no gat wanpela samting i helpim mi. Orait, klostu long pinis bilong 1995, mi go lukim dokta na em i tokim mi olsem klok bilong mi i no wok gut tumas. Mi gat 29 krismas tasol, na dokta i laik save wanem kain sik i stap insait long famili bilong mi.

Dokta i raitim wanpela pas long ol ofis bilong gavman na em i strong long tok olsem, ol samting i stap long ol pepa bilong gavman na i tokaut long husat i papamama tru bilong mi, ating ol i bikpela samting long save long as bilong sik bilong mi. Bihain wanpela pas i kam. Pas i kamapim tok bilong kot na jas i bin tok olsem, em i no ting sik bilong mi i bikpela samting na kot i ken larim mi long kisim ol pepa bilong gavman. Bel bilong mi i bagarap stret. Tasol sampela wik bihain, narapela pas i kam, em pas bilong narapela jas. Kot i orait long mi ken kisim ol pepa!

Ol pepa i kamap long mi long Janueri 1996. Ol i toksave long ples bilong mama tru bilong mi na sampela samting bilong famili bilong em. Wantu mi mekim wok long kompyuta na skelim nem Sandra wantaim nem bilong ples bilong em, na kompyuta i kamapim 6-pela namba bilong telefon. Mitupela Trina i ting i gutpela Trina i telefon long wan wan namba. Long namba 3 namba, meri i bekim telefon i tokim Trina, Sandra em pikinini meri bilong brata bilong em, na em i givim telefon namba bilong Sandra long Trina.

Mipela Telefon

Taim Trina i telefon, meri i bekim telefon em i no laik kamapim nem bilong em. Bihain Trina i tok stret olsem: “Mama bilong man bilong mi, em i bin karim em long Kesikan, Alaska, long Ogas 1, 1966, na mi mas save, yu dispela meri mi wok long painim o nogat?” Meri i no bekim tok hariap, na taim em i toktok, nek bilong em i guria na em i tok em i laik kisim nem na telefon namba bilong Trina na bihain em bai telefon i kam bek long Trina. Mi ting mama i no ken telefon hariap long mipela, olsem na mi tingting long go long stua na kisim sampela samting.

Taim mi kam bek long haus, Trina i toktok long telefon na aiwara i pulap long ai bilong em. Trina i givim telefon long mi. Mitupela mama i tok gude na taim mipela toktok, Trina i tok isi isi long mi olsem: “Em i no laik givim yu long narapela meri.” Bel bilong mi i sori tru long mama taim em i kirap na stori long mi long ol samting i bin painim em. Mi tokim em: “Mi laik tok tenkyu long yu, long wanem, yu givim laip long mi. Mi gat gutpela sindaun na mi bin kisim ol samting inap long mi. Mi bin kisim gutpela papamama na ol i bin sori tru long mi, na nau mi gat wanpela gutpela meri na tupela naispela pikinini meri. Mi amamas tru.”

Em i kirap na krai. Taim mipela toktok i go, em i tokim mi wanpela man i bin reipim em na em i kisim bel, na famili i strong long em i mas givim mi long narapela meri. Na em i tokim mi, em i marit na bihain taim em i slip long haus sik, long wanem, dokta i bin katim em, paia i bin kukim na kilim i dai liklik pikinini meri bilong em na mama bilong em. Em i tok, long dispela taim em i bin ting God i kisim pikinini na mama bilong em​—⁠em tupela em i save laikim tumas​—⁠bilong givim strafe long em, long wanem, em i bin givim pikinini man bilong em long narapela meri. Wantu mi tokim em: “Nogat. God i no save mekim olsem!” Em i tokim mi, nau em i save olsem, long wanem, bihain long dispela hevi i bin painim em, em i “kirap na painim tok i tru bilong Baibel” na nau em i “wanpela sumatin bilong Baibel.”

Mi yet i tingting: ‘Samting mi harim, em i tru?’ Mi askim em: “Yu bin stadi wantaim husat?” Em i no bekim tok hariap. Nau em i tok: “Ol Witnes Bilong Jehova.” Man! Mi kirap nogut tru na maus bilong mi i pas. Mi krai na bihain mi hatwok long tok, “Mi tu mi wanpela Witnes.” Taim mi tokaut klia olsem mi wanpela Witnes, mama i kirap nogut tru​—⁠amamas bilong em i no liklik. Man! Dispela em narapela kain tru!

Mama i bin kamap wanpela Witnes long 1975, bihain long liklik pikinini meri bilong em i dai. Taim man bilong em i wok long kamap strong long spirit, mama i tokim em long mi. Em i bin mekim gut bel bilong mama na tokim em, ol bai wok long painim mi. Tasol liklik taim bihain, ka i bam na em i dai, na mama i mas mekim bikpela long 3-pela liklik pikinini. Inap sampela nait mitupela mama i toktok inap planti aua. Bihain, mipela pasim tok long bung wantaim long Finiks, Arisona, long namba 2 wik bilong Februeri 1996. Mama i bin tingting pinis long go long dispela hap wantaim wanpela sista Kristen.

Samting Mi No Inap Lusim Tingting Long En

Taim mitupela Trina i go long Finiks, mipela i no kisim ol pikinini bilong mipela i go. Taim mi lusim balus, mi lukim mama bilong mi na nau mi inap holim em. Taim mi holim mama na em i holim mi, mama i tokim mi, em i bin wet inap 29 yia bilong mekim olsem. Em i holim mi inap longpela taim. Mipela amamas tru long bung wantaim na em i soim ol piksa long mipela na mipela i soim ol piksa long em, na mipela i stori wantaim. Tasol gutpela samting tru, em long sindaun wantaim mama insait long wanpela Haus Kingdom long Finiks! Mipela harim ol tok na mipela sanap wantaim na mekim sampela singsing bilong Kingdom. Gutpela samting mi pilim long dispela taim bai mi tingim i go inap oltaim oltaim.

Long Epril 1996, susa bilong mi, em Laura, em i lusim Aiowa na em i kam lukim mipela. Mipela i amamas tru long bung wantaim olsem ol Kristen! Na tu, mi bin toktok long telefon wantaim tupela nupela brata bilong mi. Long pas wantaim famili bilong mi, em i wanpela gutpela samting tru, tasol bilong pas gut wantaim long pasin sori insait long oganaisesen bilong Jehova, em i wanpela presen bikpela God bilong yumi, Jehova, em tasol em inap givim long mi.​—⁠Em stori bilong Dana Folz.

[Piksa long pes 25]

Mi wantaim mama tru bilong mi