Kilim i Dai Ol Man Long Nem Bilong God
WANPELA MAN LONG FRANS I RAITIM DISPELA STORI BILONG KIRAP!
‘Long Nem Bilong God, Mipela i Kilim i Dai Ol Man na Mipela Bai Wok Yet Long Mekim Olsem’
ANINIT long het-tok mipela kamapim antap, nius International Herald Tribune i tok: “Sampela man i laik kolim taim bilong yumi olsem taim bilong save, tasol i no gat narapela taim i bin kamap bipo olsem taim bilong yumi na ol man i gat laik long kilim i dai ol narapela man long nem bilong God.”
Man bilong raitim dispela stori, em i kamapim sampela tok long ol pait bilong lotu i bin kamap sampela handet yia i go pinis na planti manmeri i dai. Bihain em i stori long pasin bilong kilim i dai planti manmeri long taim bilong yumi, na em i pinisim tok bilong em olsem: “Samting yumi lukim i kamap long nau i bin kirap longtaim bipo—narapela lotu i birua nogut tru long narapela lotu. Lotu i stap yet olsem as na ol man i pait bilong daunim gavman samting o kisim graun bilong narapela.”
Sampela i tok, ol pait bilong lotu long nau i no gat rong, long wanem, God i orait long ol Israel bilong bipo long kilim i dai ol Kenan. Tasol dispela i no givim rot na ol Kristen i ken pait long nau. Bilong wanem yumi ken tok olsem? Long wanem, God yet i bin tokim ol Israel long kamapim stretpela kot bilong em na kilim i dai ol lain manmeri bilong lotuim ol spirit nogut, em lotu bilong ol i mekim na ol i insait long ol pasin sem i nogut tru, na ol i kilim i dai ol pikinini olsem ofa.—Lo 7:1-5; 2 Stori 28:3.
Wanpela samting i helpim yumi long save ol pait bilong ol Israel bilong bipo ol i no pait nating, em ol mirakel God i bin wokim bilong helpim ol long winim pait. Olsem: Wanpela taim God i bin tokim ol Israel long mekim wok long biugel, sospen graun, na mambu i gat lait—ol dispela samting i no samting bilong mekim pait long en, a? Narapela taim ol man bilong singsing ol i wokabaut i go pas long ami bilong Israel taim bikpela lain ami bilong sampela kantri i kam pait long ol.—Hetman 7:17-22; 2 Stori 20:10-26.
Tasol taim ol Israel i pait na God i no bin tokim ol long pait, em i no blesim ol na ol i no winim pait. (Lo 28:15, 25; Hetman 2:11-14; 1 Samuel 4:1-3, 10, 11) Olsem na ol man i no ken tok ol Israel i bin mekim pait, na i no gat rong long ol kantri i gat nem Kristen ol i ken insait long ol pait, nogat.
Long nem bilong lotu, ol Hindu i bin pait long ol Muslim na Sik; ol Siait Muslim i bin pait long ol Suni Muslim; na long Sri Lanka, ol Buda na ol Hindu i bin pait na narapela i kilim i dai narapela.
Yumi ken tingim ol bikpela pait i bin kamap long Frans long yia 1500 samting na long nem bilong God ol i bin kilim i dai planti manmeri. Ol samting i bin kamap long ol dispela pait i nogut tru na planti manmeri i bin dai, winim ol narapela pait bilong Misin Katolik na lotu Talatala i bin kamap bipo tru long Yurop. Orait, yumi ken skelim ol dispela pait, na dispela inap lainim yumi long sampela samting.
[Piksa Kredit Lain long pes 3]
U.S. Army photo