Ol Yangpela i Laik Save . . .

God Bai Stap Yet Olsem Pren Bilong Mi?

KING DEVIT em i wanpela man i bin amamas long stap pren bilong God. Tasol wanpela taim em i tok: “Tekewe olgeta bel hevi bilong mi.” Devit i bel hevi, long wanem, ol narapela i mekim nogut long em na em i bin mekim sampela rong tu. Em i kirap long ting God tu i bin givim baksait long em, na em i beten: “God, yu kam long mi gen na yu marimari long mi, long wanem, mi stap wanpis na strong bilong mi i pinis.”​—⁠Song 25:​11, 16-19.

Olsem wanem? Yu tu i bel hevi? Ating long famili o long skul i gat bikpela hevi yu tingting planti long en. O ating yu gat wanpela bikpela sik, o yu bel hevi, long wanem, yu gat wanpela pasin kranki yu hatwok long daunim. Maski em wanem kain hevi, i no olsem yu wanpela tasol i mas karim; God i amamas long stap pren bilong yu na long sambai long yu.a Sapos yu kirap pinis long go klostu long God, yu bai amamas long save em i no save lusim ol pren bilong em taim hevi i painim ol. Tasol taim hevi i kamap, ating yu pilim olsem God i stap longwe long yu, a? O yu pilim olsem God i no helpim yu liklik. Tasol dispela kain tingting i stret?

“Samting Olsem Nil”

Pastaim, plis kaunim 2 Korin 12:​7-10. Long ol dispela ves aposel Pol i tokim yumi em i gat hevi long wanpela samting bilong skin i ‘olsem nil na i sutim skin’ bilong em. Ating dispela “nil” em wanpela kain sik long ai bilong em samting. Maski em wanem samting, dispela hevi i wok long “daunim” bel bilong em. Em i bin beten strong long God tripela taim na askim em long tekewe dispela hevi, tasol nogat; “nil” i stap.

Olsem wanem? Jehova i no bin harim ol beten bilong Pol? Nogat tru! God i bin tokim em: “Marimari bilong mi em inap long yu. Long wanem, strong bilong mi em i save kamap strong tru long man i no gat strong.” Maski Jehova i no orait long tekewe dispela “nil” long Pol, em i no bin lusim em. Pol i bin pilim tru marimari bilong God na em i pas gut wantaim em. Dispela em “inap” bilong helpim Pol long karim hevi bilong em. Taim Pol i hatwok long mekim olsem, em bai pilim tu strong bilong God long nupela rot​—⁠olsem God bai strongim na helpim em.

Samting i Helpim Yu Long Karim Ol Hevi

Olsem Pol, ating yu tu i gat wanpela kain “nil” o hevi i save sutim yu, na dispela i mekim yu i no amamas long i stap bilong yu, na yu bel hevi. Olsem Pol, ating God bai larim hevi bilong yu i stap. Tasol dispela i no makim olsem em i no stap moa olsem Pren bilong yu, nogat. God i tokim aposel Pol olsem: “Strong bilong mi em i save kamap strong tru long man i no gat strong.” Sapos yu mekim wok long strong bilong God na yu no mekim long strong bilong yu yet, yu inap sanap strong na karim hevi. Na ating spirit bilong God bai helpim yu long mekim sampela samting yu ting yu no inap mekim. Pol i tok: “Sapos long dispela wok bilong Krais mi no gat strong, . . . bel bilong mi i save stap gutpela tasol. Long wanem, taim mi no gat strong, long dispela taim tasol mi gat strong tru.”

Wanpela yangpela meri, em Robin,b em i save long dispela samting. Taim em i gat 14 krismas em i kamap aipas, long wanem, em i kisim sik glokoma. Long wankain yia sik i bin painim Robin, mama bilong em i dai wantu tasol. Taim Robin i wok long karim bikpela hevi long ol dispela “nil,” em i tok: “Nau mi gat Jehova tasol. Mi save, bilong winim ol hevi bilong mi, mi mas pas gut wantaim em.” Robin i bin mekim olsem, na bihain em i insait long wok bilong autim tok long olgeta de. Em i tok: “Mi bin askim Jehova long helpim mi long olgeta samting. Em i bin mekim olsem.”

Planti yangpela i kisim save olsem, taim ol i mas karim hevi dispela i save helpim ol long pas moa wantaim God. Tingim yangpela Jeff. Papa i lusim famili, na mama bilong Jeff i mas lukautim 7-pela pikinini. Jeff i gat 12-pela krismas tasol long dispela taim, em i tok: “Mi sori tru long mi no gat papa. Long olgeta de mi pilim tru olsem mi sot long papa na mi gat bikpela laik long wanpela i ken stap olsem papa bilong mi.” Jeff i bin mekim wanem? “Mi beten askim Jehova long helpim mi long dispela samting mi sot long en.” Jeff i mekim ol samting i stret wantaim beten bilong em na em i strong long mekim ol wok bilong spirit. Bihain, em inap pilim olsem Jehova i sambai long em​—⁠long rot bilong spirit holi bilong em na kongrigesen Kristen. (Skelim wantaim Song 27:10.) Nau Jeff i gat 27 krismas, em i tok: “Mi bin go klostu tru long Jehova, long wanem, mi no gat wanpela bilong mekim mi i stap bel isi.” Jeff i tok, pasin bilong em long i stap klostu tru long Jehova “em wanpela nambawan blesing i bin kamap long dispela hevi.”

Rot Bilong Kisim Helpim Long God

Pren bilong yu long heven bai helpim yu tu long karim ol hevi bilong yu. Tasol yu mas mekim wanem? Yu save, sapos yu laik wanpela pasin pren i kamap strong, yu na pren i mas toktok gut wantaim, a? Beten em rot bilong yumi ken toktok wantaim God. Long rot bilong beten yumi save tokim God olsem yumi laik em i helpim yumi. Tasol beten i no ken helpim yumi sapos yumi no painim ol narapela narapela kain tok bilong mekim insait long beten o yumi kolim nating ol beten bilong yumi. Olsem ol yangpela yumi stori pinis long ol, yu mas “autim olgeta hevi na olgeta tingting” bilong yu long God! (Song 62:⁠8) Ating yu mas beten strong. (Filipai 4:⁠6) Yu mas beten olsem yu krai long Jehova.

Sapos yu hatwok long bosim tingting bilong yu o long daunim wanpela pasin i no stret, beten strong long Jehova! Krai long em na askim em long helpim yu long ol taim bilong traim. Sampela taim i hatwok long mekim olsem. Gary i tok: “Taim mi gat strongpela laik long mekim samting i no stret, mi strong long mi mas beten. Sampela taim mi save tingting, ‘Mi no gutpela man inap long mi ken toktok wantaim Jehova.’ Tasol maski mi ting olsem, mi save beten yet long em na askim em long helpim mi. Em i save strongim mi inap long mi no ken pundaun.” Maski pastaim yu hatwok, kamapim yet bel bilong yu long God.

Tasol olsem wanem sapos yu pilim olsem God i no harim beten bilong yu? Lora i hatwok long daunim pasin nogut bilong em long pilai long sem bilong em. Em i tok: “Mi bin toktok gut wantaim Jehova long dispela hevi, tasol mi hatwok long lusim.” Sampela taim ating God i laik save, yumi laik tru em i helpim yumi o nogat. (Skelim wantaim Song 88:​13, 14.) Olsem na yumi no ken les long beten! (Matyu 7:7; Rom 12:12) Lora i no les long mekim olsem. Na tu, em i kirap bihainim ol tok i stori long dispela hevi long ol buk na nius samting bilong Sosaiti Was Taua.c Bihain liklik, em i lukim gutpela samting i kamap long dispela. Em i tok: “Long olgeta taim mi bin sakim traim long mekim dispela pasin nogut, mi bin tok tenkyu long Jehova, long wanem, mi save em i helpim mi.” Tru, ating sampela taim bai yu pundaun gen taim yu wok long winim hevi bilong yu. Tasol sapos yu wok strong long winim na long laik bilong yu yet yu no mekim rong, God bai amamas ‘yu wok strong tru’ na em bai stap yet olsem Pren bilong yu.​—⁠2 Pita 1:⁠5.

Wok Wantaim God

Narapela rot bilong kisim helpim long God, em long bihainim singaut bilong em long kamap olsem wanpela “wanwok” bilong em. (1 Korin 3:⁠9) Olsem na yu mas helpim ol narapela long save long God. (Matyu 28:​19, 20) Taim yu bel hevi, ating yu pilim olsem yu no laik mekim wanpela wok. Tasol taim yu “wok strong long mekim wok bilong Bikpela” dispela inap helpim yu tru. (1 Korin 15:58) Taim yu mekim olsem, tingting bilong yu i no ken stap tasol long ol hevi bilong yu. (Skelim wantaim Sindaun 18:⁠1.) Robin, em bipo yumi bin stori long em, em i stori long ol hevi bilong em bipo, olsem: “Samting i bin helpim mi na mi no les, em wok bilong Jehova mi bin mekim!”

Taim yu wok wantaim God dispela inap helpim yu tu long rausim tingting olsem God i bin lusim yu. Taim tupela man i wok wantaim long inapim wanpela mak, ol i save pas gut moa olsem pren, a? Taim yu mekim wok autim tok, olgeta taim i gat sampela hatwok. Olsem na ating yu bai wok long askim God long helpim yu, a? Na taim God i blesim wok bilong yu, bai yu pilim tru pasin pren bilong em. Nau yu save God i bilip long yu olsem yu wanpela wanwok bilong em. Dispela inap strongim tru bel bilong yu.

Carol i no bin stap bel isi. Mama bilong em i bin kilim i dai skin bilong em yet, na olgeta taim papa i toknogutim Carol bilong daunim em. Tasol taim Carol i kisim 17 krismas em i kamap wanpela Witnes Bilong Jehova na em i insait long wok bilong autim tok. Em i bin mekim wok autim tok long olgeta de inap 10-pela yia pinis na nau em i tok: “Dispela wok i bin helpim mi tru, long wanem, mi lukim Jehova i blesim mi. Mi save tokim skin bilong mi yet olsem, ‘Sapos God i laikim mi, mi no samting nating.’ Jehova i mekim wok long mi bilong autim nem bilong em na dispela i mekim mi i stap bel isi moa.”

“Bikpela i Gutpela Tru”

Klostu ol birua i bagarapim King Devit, na bihain em i tok: “[God] i tekewe olgeta pret long bel bilong mi.” (Song 34:​4, 6; 1 Samuel 21:​10-12) Devit i save long ol hevi, olsem na em inap tok: “Yupela yet i mas traim na lukim na bai yupela i save olsem Bikpela i gutpela tru. Man i save bilip tru long Bikpela, em i ken i stap belgut tru.”​—⁠Song 34:⁠8.

Tru, ating bagarap i no inap painim yu olsem i laik painim Devit, tasol sampela taim ol hevi bai kamap. Taim ‘bel hevi’ bilong yu i bikpela, beten long God. (Song 25:17) No ken pret olsem God bai lusim yu na em i no inap stap moa olsem pren bilong yu. Taim yu wok long sanap strong na yu no les, na yu pilim pinis sampela samting Jehova i bin mekim bilong sambai na helpim yu, yu yet bai “traim na lukim” olsem “Bikpela i gutpela tru.” Na em bai stap Pren bilong yu inap oltaim.​—⁠Jems 4:⁠8.

[Ol Futnot]

[Piksa long pes 19]

Olsem wanem? God i save lusim ol pren bilong em long taim bilong hevi?