‘Wanpela Samting Olsem Nil i Wok Long Sutim Skin’ Bilong Yu?
1 Yumi gat bikpela laik long inapim wok bilong yumi long autim gutnius inap long strong na save bilong yumi. Tasol i hatwok long planti brata na sista bilong yumi long mekim bikpela wok, long wanem, ol i gat bikpela sik o sampela hap bilong skin i bagarap olsem na i hatwok long ol long mekim bikpela wok olsem ol i laik mekim. Ating ol i bel hevi na ol i wok strong bambai dispela bel hevi i no ken daunim ol, na ating ol i mas mekim moa yet taim ol i lukim ol narapela i mekim bikpela wok autim tok.—1 Ko 9:16.
2 Gutpela Piksa Yumi Ken Bihainim: Wanpela samting olsem ‘nil i wok long sutim skin’ bilong Pol. Inap 3-pela taim em i beten askim Jehova long rausim dispela samting nogut i wok long pasim em, em dispela samting em i kolim olsem “wokboi bilong Satan,” na i save mekim nogut long em. Tasol maski dispela ‘nil i sutim skin’ bilong em, Pol i wok strong yet long karim hevi na mekim wok autim tok. Em i no sori long em yet o kamap man bilong toktok planti oltaim, nogat. Em i wok strong tru inap long skel bilong em. Samting i bin helpim em long karim dispela hevi, em dispela tok God i bin mekim long em: “Marimari bilong mi em inap long yu. Long wanem, strong bilong mi em i save kamap strong tru long man i no gat strong.” Dispela hevi bilong Pol i kamap samting bilong strongim em taim em i lain long karim dispela hevi na wet long Jehova na spirit holi long helpim em long sanap strong na karim dispela hevi.—2 Ko 12:7-10.
3 Rot Bilong Sanap Strong na Karim Hevi: Olsem wanem? Sampela sik i save putim hevi long yu long mekim wok bilong God? Sapos olsem, orait bihainim pasin na tingting bilong Pol. Maski sik bilong yu i bikpela na i no inap pinis nau long dispela taim, yu ken bilip strong long Jehova, em i save gut long ol samting yu mas kisim na em inap givim yu dispela bikpela strong i winim strong bilong yumi ol man. (2 Ko 4:7) Long rot bilong kongrigesen yu ken kisim helpim, olsem na no ken stap wanpis. (Snd 18:1) Sapos i hatwok long yu long insait long wok bilong autim tok long ol haus, painim ol gutpela rot bilong autim tok long kain kain taim na ples o autim tok long rot bilong telefon.
4 Maski wanpela samting olsem nil i sutim skin bilong yu na ating em i pasim yu liklik long mekim wok autim tok, yu no ken pilim olsem yu lusim dispela wok. Olsem Pol, yu tu inap mekim gut dispela wok bilong “autim tok long gutnius bilong marimari bilong God,” taim yu mekim wok inap long skel bilong yu. (Ap 20:24) Taim yu wok strong long mekim wok autim tok, yu mas save, Jehova i amamas tru long dispela.—Hi 6:10.