“Opim Tasol Ai Bilong Yu na Lukim”
OL PIKININI bilong yu i save lukim wanem samting? Pait? Pasin raskol? Win na wara samting i bagarap? Ol man i stap rabis? Sik? Tru tumas, ol dispela hevi i stap long taim bilong yumi. Tasol yu bin skulim ol long tingim ol gutpela samting bai kamap long bihain olsem Baibel i tok promis long en? Papamama bilong wanpela manki i gat 9-pela krismas, em Joel Pierson, ol i bin mekim olsem. Wanem samting i kamap long dispela?
Tingim samting Joel i bin raitim long stori “Opim Tasol Ai Bilong Yu na Lukim.” Dispela em nem bilong tok ol sumatin long ol skul long Vejinia, Yunaitet Stets, ol i mas raitim stori long en. Tingim stori bilong Joel em nius The Central Virginian, bilong Ogas 22, 1996, i bin kamapim na olsem wanem dispela i kamapim klia olsem ol samting Joel i lainim long Baibel i as bilong ol samting em i wetim. Em i tok:
“Opim tasol ai bilong yu na lukim, olgeta naispela naispela samting em God i laik ol i mas stap.
“Em gutpela tru sapos yumi kirap long wanpela moningtaim na kisim save olsem i no gat moa ol samting bilong bagarapim win na wara samting, a? Ol manmeri i stap bel isi na amamas—na nius i no stori long ol pasin raskol na pasin bilong kilim i dai ol man. Nogat.
“Ol manmeri i stap klostu, ol i wok wantaim bilong helpim pren bilong ol long wokim haus bilong em. Klostu long ol, yumi lukim ol narapela i wokim gaden. I no ol dispela samting tasol, nogat, tingting na bel bilong ol i stap stret na i klin. Olgeta i wok bung wantaim bilong helpim narapela narapela. Bai i no gat moa ol rabisman, na bai i gat planti kaikai inap long olgeta. Pasin wanbel na bel isi bai i stap long olgeta hap bilong graun. No gat wanpela man bai hangre o kisim sik gen. Ol gutpela gutpela samting i stap bilong yumi ken lukim. Man! Wanpela liklik pikinini i sindaun antap long wanpela taiga! I no taiga tasol i stap isi wantaim ol man, olgeta narapela animal tu i stap isi.
“Mi laik i stap long kain ples olsem. Yu laik i stap wantaim mi long dispela ples?”
Tru God i tok promis long ol kain blesing olsem Joel i stori long en? Tru tumas, em i tok promis olsem. Plis opim Baibel bilong yu na kaunim ol dispela tok promis olsem i stap long Song 46:8, 9; 67:6; 72:16; Aisaia 2:3, 4; 11:6-9; 33:24; 65:17-25; Matyu 6:9, 10; 2 Pita 3:13; KTH 21:3, 4.