Bikpela Pusi Sita—I Ran Spit Moa Yet

WANPELA MAN LONG KENYA I RAITIM DISPELA STORI BILONG KIRAP!

SAN i strong tru long ples kunai. San i laik go daun na long kompas bilong lukluk longwe, mipela lukim wanpela lain animal ol i kolim Tomson gasel, em yelopela gras bilong ol i gat longpela mak long baksait bilong ol i lait gut tru. Klostu long ol, wanpela animal i sindaun antap long haus bilong ol waitpela binatang na em tu i lukluk long ol dispela gasel. Em wanpela sita em gras bilong en i gat makmak, na ol liklik pikinini i stap wantaim em. Braunpela ai bilong sita i skelim gut dispela lain gasel. Nau wantu tasol ol masol bilong en i go tait na isi isi em i apim skin bilong en na wokabaut i go long dispela hap ol gasel i stap long en. Ol pikinini bilong en i stap, ol i save ol i mas wetim mama i kam bek.

Isi isi sita i wokabaut i go klostu long ol gasel, na taim em i mekim olsem, em i hait baksait long ol liklik diwai na hap kunai. Em i wokabaut gut, na taim em i kam klostu tru long ol gasel olsem 200 mita samting, em i no meknais liklik. Wanpela gasel i bin apim het na lukluk i go long sita, tasol bihain em i kirap na kaikai gen. Orait, sita i kirap na wokabaut gen na i go klostu moa olsem 50 mita samting, tasol ol gasel i no save em i mekim olsem. Nau sita i kirap na ran. Olsem wanpela spring, sita i sut i go stret. Wantu tasol na dispela lain gasel i ran​—⁠ol i ran nabaut nabaut, tasol ai bilong sita i pas yet long gasel em i makim pinis bilong kilim. Sita i ran i go i go na ranim gasel, na maski em tu i wanpela animal bilong spit, klostu sita i kisim em.

Gasel i pret nogut na sut i go nabaut nabaut bilong lusim sita, tasol maski gasel i mekim olsem, em i no inap lusim dispela sita bilong spit. Taim sita i kam klostu tru olsem wanpela mita samting bilong kisim gasel, em i taitim wanpela lek bilong en bilong pundaunim gasel, tasol klostu sita yet i pundaun. Wantu tasol na gasel i ranawe pinis.

Sita i sotwin stret, olsem na em i ran isi isi gen na bihain em i sindaun na lukluk i go long ol pikinini i hangre. Mi kirap nogut na lukluk long meri bilong mi. Nau tasol mitupela i bin lukim spit narakain bilong dispela nambawan animal, em sita.

Bikpela Pusi Bilong Spit

Tru tumas, sita inap ran olsem win. Sita inap sanap i stap na insait long tupela sekon tasol, em inap kirap na ran spit inap 65 kilomita insait long wanpela aua! Sampela taim sita inap ran spit olsem 110 kilomita insait long wanpela aua! I no gat narapela animal i wokabaut long graun em inap ran olsem sita. Sapos yumi skelim spit bilong hos na dok bilong resis wantaim spit bilong sita​—⁠sita i win tru. Hos inap spit 72 kilomita insait long wanpela aua na dok inap spit 65 kilomita insait long wanpela aua. Tasol dispela narapela kain spit bilong sita i bilong sotpela taim tasol​—⁠em i no inap ran spit olsem i go longwe.

Sita i no bikpela animal, na lek i olsem bun nating, na baksait bilong en i raunpela liklik. Longpela tel bilong sita i save helpim ran bilong em, olsem na taim em i spit tru na baut em i no pundaun. Taim sita i siksti stret, em inap kalap i go longwe tru olsem 6-pela mita samting. Wanpela samting i save helpim sita long spit olsem, em narapela kain lek bilong en daunbilo​—⁠lek i olsem lek bilong dok, i no olsem bilong pusi. Em i save mekim wok long pinga bilong lek bilong holim strong moa yet graun.

Naispela Samting i Gat Makmak

Pes bilong sita i narapela kain na i nais tru. Tupela longpela blakpela mak i stap klostu long ai bilong en na kam daun long arere bilong maus i mekim na i olsem sita i pes drai. Sotpela gras bilong sita i yelo na braun, na i gat ol liklik makmak i stap long olgeta hap bilong en, tasol gras bilong bel i waitpela liklik. Taim sita i karim ol pikinini, gras bilong ol i braun, na kirap long nek i go daun long tel, ol i gat wanpela kain strongpela longpela gras.

Krai bilong sita i olsem krai bilong sampela kain pisin. Dispela kain krai i save go longwe inap 2-pela kilomita na sita i save krai olsem bilong toktok wantaim ol pikinini bilong en na ol narapela sita.

Sita i no olsem ol narapela bikpela pusi olsem laion na lepat; sita i save stap isi. Taim sita i stap isi, krai bilong en i olsem krai bilong pusi yumi save lukautim. Sita i no pret tumas long ol man na ol man i save lukautim sampela sita. Tasol yumi no ken ting sita i olsem pusi yumi save lukautim. Taim sita i bikpela pinis, hevi bilong en i olsem 45 kilogram samting, na tit na pinga bilong en i sap tru, olsem na yumi inap kisim nogut long en. Sita i wanpela animal yumi mas was gut long en.

Taim sita i kamap nupela, em i no gat save long raun painim abus, mama i mas skulim em planti taim bilong mekim olsem. Sapos pikinini sita i go bikpela insait long wanpela banis animal samting, em i no gat save long pasin bilong ol sita long kisim abus. Taim mama na ol pikinini i kaikai wantaim, ol i stap isi, ol i no save pait long kaikai olsem ol laion i save mekim. Na long ol ples drai ol man i bin lukim sampela sita i kaikai melon i gat gutpela wara bilong en.

Ol turis i raun long sampela bikpela pak bilong ol animal long Afrika, ol i kirap nogut long pasin bilong ol dispela bikpela pusi sita long i stap isi na i no pret long man. Planti taim ol bikpela sita bai kam long bas bilong ol turis bilong sindaun long ples kol, o ol bai kalap i go antap long bas na lukluk i kam long windo bilong haus kepten. Ol pasindia i save kirap nogut long dispela na planti i save pret.

Pasin Bilong En Long Lukautim Pikinini

Sita meri inap karim 6-pela pikinini i liklik tru. Em i no pret long lukautim ol na em i save haitim ol gut tru. Taim ol i nupela i go inap long taim ol i gat sampela mun, sita i save senisim ples hait bilong ol planti taim. Tasol maski ol sita mama i mekim bikpela wok olsem bilong lukautim ol pikinini, sampela tasol (33 pesen) i no save kisim bagarap na i go bikpela.

Sita mama i gat bikpela wok tru long lukautim ol pikinini bilong en. Ol i gat bikpela strong na ol i no save les long pilai. Taim mama i malolo na meknaisim tel bilong en olsem olgeta bikpela pusi i save mekim, ol pikinini i amamas long ranim tel na kalap antap long en. Ol pikinini i save pilai olsem ol i pait na narapela i kaikaim narapela na ranim narapela, olsem na ol i no tingim ol birua em olgeta taim ol i stap.

Ol Narapela i Raun Painim Em

Sita i gat planti birua long bus olsem laion, lepat, na hai-ina. Tasol nambawan birua bilong sita em man. Naispela gras bilong sita i gat makmak i nambawan samting ol man i laikim bilong wokim klos, mat, na bilong mekim sampela samting moa long en. Ol man i bin kalabusim dispela animal bilong spit tru na lainim em long raun painim abus olsem wanpela spot. Tasol ol sita i no save kamapim pikinini insait long banis animal samting, olsem na bilong kisim sita bilong mekim kain spot olsem, ol man i raun long olgeta ples tru bilong en bilong kisim sita. Na narapela samting i bagarapim sita, em pasin bilong ol man long pinisim ples tru bilong en, olsem na long Is Afrika long nau, yumi inap painim sita long ol bikpela hap graun bilong lukautim ol animal na wan wan tasol long bikbus.

Long yia 1900 i gat 100,000 sita long 44 kantri. Long nau i gat olsem 12,000 sita tasol long 26 kantri, na planti bilong ol i stap long Afrika. Ol man i wok long lukautim dispela naispela pusi i gat makmak na em i no ken pinis, tasol namba bilong ol i wok yet long i go daun.

Sampela man i ting sita bai pinis olgeta. Tasol yumi ken amamas long save, bihain ol man bai mekim gut dispela wok God i bin putim long han bilong ol, olsem: “Mi putim ol pis na ol pisin na olkain animal bilong graun aninit long yupela.” (Stat 1:28) Long dispela taim tasol, ol naispela bikpela pusi olsem sita, bai ol i stap bilong amamasim ol man long graun i go inap oltaim.