Nambawan Tru Bilong Spit
Wanpela man long Saut Afrika i raitim dispela stori bilong Kirap!
HUSAT i gat dispela nem? Em sita, wanpela animal i winim ol narapela long ran spit tru taim em i ran long sotpela hap. Makmak long skin bilong wan wan sita i no wankain. Olsem na insait bilong nem sita long wanpela tok Sanskrit i olsem “skin i gat makmak.”
Sampela i tok, namba wan taim ol i lukim sita ol i bin lukim tasol ol longpela lek bilong en. Na sampela i tok, baksait bilong en i save go daun na het bilong en i liklik tumas. Tasol ol dispela samting i save helpim gut sita. Ol longpela lek bilong baksait i gat strong, na i save helpim sita long wokabaut na ran gut. Na tru tumas, dispela animal inap ran spit tru! Em inap sanap i stap na insait long sampela sekon tasol em inap kirap na spit i go inap 110 kilomita insait long wanpela aua.
God i bin wokim sita i gutpela tru bilong ran spit. Ol bun bilong en i no hevi, na bun bilong baksait i wok olsem wanpela spring. Na sita i gat bikpela bros, gutpela wetlewa, strongpela klok, na tel i helpim em long ran na em i no ken pundaun, na bikpela hul bilong nus i helpim em long pulim win hariap—olgeta dispela samting i wok wantaim bilong helpim dispela animal long spit tru, winim ol narapela animal. Tasol strong bilong sita i save pinis kwik. Bihain long em i ran spit inap 400 mita, em i mas malolo na skin i ken kol liklik.
Ol sita i no save birua tumas long ol man. Ann van Dyk i bin lukautim ol sita inap planti yia, na long buk bilong em, The Cheetahs of De Wildt, em i tok: “Taim ol i kaikai pinis, mi save amamas tru long stap wantaim ol famili pusi bilong mi inap liklik hap taim moa paslain long tudak i kamap. Mi bilip long ol na ol i bilip long mi, olsem na maski ol i no lain long stap gut wantaim ol man, mi save ol i no inap bagarapim mi.”
Tasol i no long olgeta taim ol man i bin mekim gut long sita. Ol man bilong painim abus long Afrika i mangal long kisim gutpela skin bilong en, na ol taun i kamap na pinisim bikpela hap bus ol sita inap ran long en. Dispela i mekim na namba bilong ol sita i go daun tru. Bipo long India i gat planti sita, tasol long 1952 i no gat wanpela i stap. Na tu, ol i no stap moa long ol kantri long hap is bilong Mediterenian.
Yumi ken amamas long nupela taim God bai kamapim, na ol man i gat pasin mangal, ol i no inap bagarapim moa ol animal! (Aisaia 11:6-9) Ating long dispela taim bai yu amamas tru long lukim sita, em dispela nambawan animal bilong spit em God i bin wokim.