Bilong Wanem Ol i Wok Long Bagarap?

WANPELA MAN LONG INDIA I RAITIM DISPELA STORI BILONG KIRAP!

OL NAISPELA Bengal taiga, ol weldok, ol pisin sarus krein, ol trausel bilong bipo, na ol elefan bilong Esia—em sampela tasol bilong ol animal bilong India, em bagarap i wok long painim ol na ol bai no i stap moa. Tingim nambawan bikpela animal i save stap antap long graun, em elefan.

Planti man tru i save laikim ol tit bilong elefan. Japan em i wanpela ples i save mekim bikpela wok long tit bilong elefan, na long Saina tu planti man moa i laikim, em ples we planti i save yusim yet sopstik ol i wokim long ol tit bilong elefan. Planti man moa i laikim ol tit bilong elefan, na olsem wanem dispela i bagarapim moa yet ol elefan bilong Esia?

Sampela taim i go pinis nius The Times of India i tok: “Ol i no olsem ol elefan bilong Afrika, long wanem, long ol elefan bilong Esia wan wan elefan man tasol em ol i gat tit. Olsem na tit bilong ol bikpela elefan man, em i nambawan samting ol man i laik kisim. Ol i tok long olgeta yia ol man i save kilim i dai olsem wan handet elefan [man] long India, dispela i mekim na namba bilong ol elefan man i go liklik.” Dispela pasin bilong kilim ol i wok long bagarapim i stap bilong dispela animal na ol inap pinis olgeta.

Bilong Kisim Kom Tasol

Tingim tu animal rainoseros, em nambatu bikpela animal i stap antap long graun long nau. India na Nepal, em ol laspela hap ol man i lukautim bilong dispela animal raino i gat wanpela kom. Tasol, dispela pak Pobitara Wildlife Sanctuary long hap not-is bilong India, long provins Assam, em i inap olsem 38 skwe kilomita tasol, em liklik hap graun tasol bilong lukautim ol raino. Olsem na ol animal i save raun i go insait long ol hap graun bilong ol gaden i stap klostu na ol man i sutim ol o kilim ol long ol marasin i gat posin long en.

Ol man i kamapim wanpela rot i smat tru long kilim i dai ol raino. Long pak Pobitara Sanctuary, i gat tupela pawa lain i brukim pak. Ol man bilong kilim ol animal i yusim stik mambu long hukim wanpela waia i go long tupela pawa lain, na hap waia i hangamap i kam daun klostu long graun. Saveman bilong ol animal, em Vivek Menon i stori long wanem samting i kamap taim raino i kam pas long waia. “Taim bikpela strong bilong pawa i kisim raino, em i pulim win strong tupela taim na wantu bodi bilong en i krungut na em i pundaun . . . Dispela traipela animal i slip i go daun long sait bilong en na wantu tasol em i dai.”

Tarangu, ol i kilim dispela traipela animal bilong kisim tasol liklik kom bilong en, hevi bilong kom em wanpela kilogram tasol! Ol man i mekim ol bikpela wok bisnis tru long ol kom, dispela i mekim na bikpela bagarap i painim ol raino. Kom bilong raino i kain olsem gras i paspas na i strong olsem kapa bilong pinga bilong man.

Kilim Ol Animal Bilong Wokim Ol Laplap Shahtoosh

Ol antelop bilong Tibet, ol i kolim sairu, i save kamapim wanpela kain gras ol i kolim shahtoosh. Gras bilong en i liklik tru olsem na laplap ol wokim long en, yu inap subim insait long wanpela ring em sais bilong namba tu pinga. Pe bilong wanpela kain laplap olsem inap go antap long 16,000 dola, dispela i mekim na i no gat planti laplap i gat kain bikpela pe olsem. Tasol dispela i mekim wanem long ol antelop i save kamapim dispela gras?

Nius The Indian Express i tok: “Bilong wokim wanpela laplap shahtoosh, ol i mas kilim i dai faipela sairu.” Ol i tok ol bikhetman i save kilim i dai olsem 20,000 sairu long ol ples maunten bilong Tibet long olgeta yia. Maski i gat ol lo i lukautim ol antelop long ol man i no ken bagarapim ol, ol man i mekim yet dispela pasin. Na tu, long 1979 ol i bin putim tambu i pasim ol wok bisnis bilong gras shahtoosh. Tasol, kirap long dispela taim namba bilong ol sairu i wok long i go liklik.

Bilong Kisim Skin na Bun

Laip bilong ol taiga na ol arapela bikpela wel pusi long India i wok long bagarap tu. Long ol narapela hap, ol narapela lain taiga, olsem Kaspian taiga, Java taiga, na Bali taiga, ol man i ting ol dispela lain taiga ol i no stap moa. Kirap long yia 1900 samting, inap olsem 40,000 taiga i bin raun long bus bilong India. Kirap long dispela taim na i kam namba bilong ol i go liklik. Dispela i olsem, long wanem, ol man i wok long bagarapim ples bus ol i stap long en, na tu ol man i wok long kilim ol bilong kisim skin na wanpela kain bun bilong en em ol i ting i gat strong bilong oraitim man, em ol Saina i wokim marasin long en.

Buk The Secret Life of Tigers i stori long bagarap i painim ol taiga long wanem i no gat gutpela ples bus bilong ol i ken stap long en, na i tok: “Namba bilong ol taiga inap i go bikpela sapos i gat planti ol ples bus bilong ol long i stap long en. Taim i no gat planti ples bus, ol taiga yet i mekim na lain bilong ol i no go bikpela, long wanem, ol yet i save pait na kilim i dai arapela arapela, long kaikai na long hap graun bilong ol.”

Olsem wanem long ol arapela bikpela wel pusi long India? Long wanpela banis bilong ol animal long Junagadh, Gujarat, wanpela man i raun na lukluk long ol animal i lukim wanpela bokis i stap nating. Wanpela sain long ai bilong bokis i gat piksa bilong bikpela wel pusi sita bilong Esia na i gat rait long tok ples Gujarati, olsem: “Bikpela wel pusi sita i bin pinis long India long 1950 samting.”

Olsem Wanem Long Bihain?

I luk olsem i no gat gutpela samting bai kamap long ol animal bilong Indai, em ol animal ol man i wok long bagarapim ol. Ol samting i kamap pinis i soim olsem ol man i tingim ol yet tasol na ol i wok long bagarapim graun wantaim ol planti gutpela animal long en. Wanem samting bai kamap? Tok bilong God i gat strong, i stap long Baibel Holi, i kamapim olsem taim i klostu nau bilong dispela tok profet bai kamap tru: “Ol haiden i belhat tru, tasol taim bilong yu [God] long belhat em i kamap pinis. . . . Nau em i taim bilong bagarapim ol man i bin bagarapim graun.”​—KTH 11:18.

Wanem samting bai kamap taim God i bagarapim pinis ol man i bin wok long bagarapim graun na ol gutpela animal long en? Man! Em bai gutpela taim tru, laka? Ol man bai i no bagarapim moa ol kain kain animal. Dispela samting bai kamap aninit long wok bos bilong Kingdom Bilong God, em Jisas i bin lainim ol man long beten long en.​—Aisaia 11:6-9; Matyu 6:10.

[Ol Piksa long pes 16]

Sampela animal bilong India em ol man i wok long bagarapim

Pisin sarus krein

Bengal taiga

Elefan bilong Esia

Raino i gat wanpela kom

Antelop bilong Tibet

[Ol Kredit Lain]

Crane: Cortesía del Zoo de la Casa de Campo, Madrid; antelope: © Xi Zhi Nong/naturepl.com