Karim Hevi Bilong Pasin Teroris
WANPELA MAN LONG SPEN I RAITIM DISPELA STORI BILONG KIRAP!
LONG Mas 11, 2004, ol lain bilong biktaun Madrid, Spen, i harim bikpela pairap—10-pela bom i pairap long 3-pela narapela narapela tren stesin. Ol bom i pairap long wankain taim long 4-pela tren—190 manmeri i dai na 1,800 i kisim bagarap.
Ol dispela bom i bin pairap long moningtaim, long taim bilong ol manmeri i go long wok, olsem na olgeta tren i pulap tru na planti manmeri i dai. Aroa, wanpela meri i bin lukim dispela samting, em i tok: “Strong bilong bom i bikpela tru—mi lukim wanpela hap bilong tren i flai i go antap olsem wanpela mita. Taim mi lusim tren, ples i luk olsem bikpela pait i bin kamap. Mi lukim bodi bilong planti man i slip nabaut long graun na bel bilong mi i bagarap stret.” Dispela samting nogut i bin kamap long 10-pela hap long 4-pela tren. Ol teroris i bin kisim bom na putim insait long ol ruksak na lusim long ol dispela tren. Bihain ol i yusim ol mobail fon bilong pairapim ol dispela bom.
Em i gutpela samting tru sampela pasindia i no inap tingim bek dispela bagarap. Tasol planti handet manmeri, olsem Aroa, ol i mas karim hevi bilong dispela samting, long skin na long tingting bilong ol, inap longtaim tru. Aroa i tok: “Pairap bilong bom i bagarapim yau bilong mi na mi no inap harim gut, tasol samting i givim bikpela hevi moa yet long mi, em dispela samting nogut mi bin lukim na i stap yet long tingting bilong mi.”
Aroa i tok moa: “Mi wanpela Witnes Bilong Jehova, olsem na mi bin kisim planti gutpela helpim i mekim gut bel bilong mi. Planti Witnes long olgeta hap bilong graun i bin ring na salim pas long mi, na dispela i bin kirapim mi long tingim olsem, tru tumas, yumi wanpela bikpela lain brata i stap long olgeta hap. Na tu, Baibel i helpim yumi long save long as na ol dispela hevi i kamap. Mi helpim sampela wanwok bilong mi long save olsem Baibel i bin tok profet olsem long ‘long taim bilong las de,’ ol man bai bagarapim ol man nabaut na i no gat pasin sori. Na wok autim tok mi mekim fultaim, dispela tu i bin helpim mi long daunim bel hevi.”—2 Timoti 3:1-3.
Pedro em i wanpela bilong planti pasindia i bin kisim bikpela bagarap. Em i bin sanap 4-pela mita tasol longwe long bom i bin pairap long hap bilong tren em i stap long en. Pairap bilong bom i tromoi em i go daun long plua—em i kisim bikpela bagarap long het na em i no inap pulim gut win. Bihain long em i stap 5-pela de long haus sik, em i wok long kamap orait. Planti wanlain Witnes i bin go lukim em ol i strongim bel bilong em, na ol i kirapim tu tingting bilong ol nes. Wanpela nes i tok: “Insait long 26 yia, mi no bin lukim wanpela sikman i kisim planti visita na presen olsem Pedro i kisim.” Na Pedro i mekim gutpela tok amamas long lain bilong haus sik. Em i tok: “Ol i nambawan tru. Ol i bin mekim bikpela wok tru bilong helpim mi long orait gen.”
Planti man i kisim bagarap ol i bilong narapela kantri em nau tasol ol i bin kam sindaun long Spen. Manuel bilong Kuba i bin kisim bagarap taim namba wan bom i pairap long Atocha stesin, na em i hap i dai taim namba tu bom i pairap. Em i tok: “Skin bilong mi i slip long graun long hap bilong wetim tren na ol man i ran hariap lusim stesin ol i krungutim mi. Taim tingting i kamap klia gen, mi luksave olsem tupela bun bilong banis i bruk, wanpela lek i bagarap, na wanpela sait yau bilong mi i pas.”
Manuel i tok moa: “Insait long sampela minit tasol, ol lain bilong polis na paiaman na ambiulens ol i kamap, na ol i wok strong long helpim ol man. Ol i save gut wanem samting ol i mas mekim, na gutpela wok bilong ol i daunim pret bilong planti man. Ol i stretim rot bilong dokta i kam lukim mi, na tu, ol i mekim gutpela pasin long mi na sori long mi.”
Bihain Long Bagarap
Wankain olsem Aroa, dispela hevi i mekim na bel bilong Manuel i bagarap stret. Em i tok: “I no longtaim i go pinis, taim mi kalap long wanpela tren, mi pret nogut tru. Kwiktaim mi mas lusim. Na mi save tingting planti taim mi lukim wanpela long PMV samting i karim ruksak o kain samting olsem. Tasol mi winim planti narapela long kisim helpim, maski i no gat wanpela bilong famili bilong mi i stap long Spen. Planti handet Witnes i ring long mi, na wanpela famili Witnes i singautim mi i kam stap long haus bilong ol inap sampela de na bai mi no ken bel hevi long i stap wanpis. Dispela gutpela helpim mi bin kisim long bikpela lain brata bilong yumi i stap long olgeta hap i bin helpim mi long stap isi.”
Sergio em wanpela pasindia i no bin kisim wanpela bagarap, tasol long olgeta de em i save tingim yet ol samting em i bin lukim na bel bilong em i no stap isi. Em i bin sindaun long hap bilong tren namel long tupela hap bilong tren we narapela narapela bom i bin pairap. Olsem Manuel, em i tenkyu tru long gutpela helpim em i bin kisim long famili bilong em na ol wanlain Witnes. Em i tok: “Pasin bilong ol i kamapim klia olsem ol i laikim tru mi, na tu, i kirapim mi long tingim olsem mi insait long wanpela lain brata i pas gut wantaim em narapela i tingim tru narapela. Mi bin kisim dispela helpim long olgeta de, na planti manmeri i ring long mi i bin helpim mi long kamapim tingting bilong mi, em samting planti taim mi hatwok long mekim.”
Long sampela pasindia, samting ol i bin tingting planti long en i no wankain. Diego i bin sindaun klostu long wanpela bilong 4-pela bom i no bin pairap. Em i no kisim wanpela bagarap—em i stap gut taim em i lusim tren. Tasol em i tok: “Nau bel bilong mi i gat tok, long wanem, mi no bin traim long helpim ol man i bin kisim bagarap. Mi bin ranawe hariap wantaim planti handet narapela em ol i siksti i go lusim stesin.”
Ramón, wanpela yangpela man bilong Brasil, i bin sindaun long tren i gat bom long en. Pairap bilong bom i mekim na em i no inap tingting stret o mekim wanpela samting. Tasol tupela de bihain, em i kirap na insait long wok bilong autim tok bilong Kingdom long ol narapela. Em i bungim wanpela man bilong Potugal. Dispela man i tokim Ramón olsem em i wok long painim trupela lotu. Ramón i kirapim Baibel stadi wantaim dispela man na wantu em i stat long kam long ol miting Kristen. Ramón i tok: “Taim yu helpim ol arapela long ol samting bilong spirit, dispela i save mekim gut bel bilong yu yet.”
Ating sampela haptaim i mas lus pastaim na bai ol lain i bin kisim hevi long dispela bagarap ol i ken daunim ol hevi ol i bin kisim long skin na long bel. Sori tru, yumi stap long wanpela taim em maski yumi stap we, pait na bagarapim man inap kamap. Tru, ol samting bilong spirit inap helpim ol man long karim hevi bilong dispela bagarap, tasol Kingdom Bilong God em tasol bai pinisim tru tru pasin bilong pait na bagarapim man.—KTH 21:3, 4.
[Blok/Ol Piksa long pes 15]
OL SAMTING BILONG SPIRIT I HELPIM OL LONG KARIM HEVI
Manuel Suárez
“Taim mi no inap mekim yet wanpela samting na mi wet long go long haus sik, mi tingim tok bilong Sindaun 18:10: ‘Bikpela i olsem wanpela strongpela haus. Ol stretpela man i ken ran i go long en na i stap gut.’ Dispela tok i givim strong long mi.”
Aroa San Juan
“Taim hevi olsem i painim yumi, yumi save moa yet olsem yumi stap long taim bilong las de na yumi mas wok long tingim ol samting bilong spirit. Wok fultaim bilong mi long autim tok i bin helpim mi, na isi isi mi wok long kamap orait.”
Fermín Jesús Mozas
“Maski mi kisim sampela bagarap long het, mi helpim na strongim bel bilong sampela pasindia i bin kisim bagarap. Ating mi bin stap isi, long wanem, mi bilip long kirap bek, em samting God i bin tok promis long en na i save strongim yumi long kain taim olsem.”
Pedro Carrasquilla
“Taim mi stap long wod bilong ol man i gat bikpela sik, na bros i pen nogut tru, planti taim mi tingim tok bilong 1 Timoti 6:19. Dispela tok i strongim yumi long bungim planti samting bilong helpim yumi long bihain na bai yumi inap kisim dispela laip em i laip tru. Dispela ves i kirapim mi long tingim Paradais, em God i bin tok promis long givim long ol man i laikim em tru. Em samting yumi bilip na wet long en.”
[Piksa long pes 13]
Antap: Ol i helpim ol lain i bin kisim bagarap em ol i stap long ol rot bilong tren long Atocha stesin
[Kredit Lain]
Top: CORDON PRESS
[Piksa long pes 13]
Han sut: Bilong tingim ol man i bin dai