Tren i Gat “Tit”

Wanpela man long Grik i raitim dispela stori bilong Kirap!

YU KEN tingting olsem yu stap namel long wanpela traipela baret i no op tumas na baret i pulap long ol gutpela diwai. Na sampela traipela ston i hangamap antap na long as bilong baret wanpela strongpela wara i baut baut. Yu ting yu stap wanpis long dispela ples, tasol nau yu harim wanpela pairap i stap longwe liklik. Man! Yu ting yu no inap lukim dispela kain samting long dispela ples i olsem i no gat man i raun long en. Tasol taim yu harim pairap bilong en, yu save​—wanpela tren i kam!

Taim pairap i kam klostu, nau yu lukim namel long ol longpela diwai wanpela liklik tren i gat ensin disel na em i pulim tupela ka tasol. Em i hatwok tru long go antap long maunten i antap tumas, olsem na isi isi em i go antap. Mipela i laik tok amamas long yu kam long Diakopton-Kalavrita Rak Relwe. Dispela rot bilong tren long distrik Peloponisos, long Grik, i narapela kain long ol rot bilong tren long Yurop. Long tok ples Grik ol i kolim dispela rot bilong tren olsem odontotós, insait bilong en i olsem “tit.” Bihain bai yu save bilong wanem dispela nem i gutpela nem.

I Gat Wok Bilong En?

Kalavrita em wanpela taun long noten Peloponisos na ol wok bisnis na hetkota bilong gavman bilong bosim dispela hap i stap long en. Na ol man i amamas long kam long dispela hap bilong lukim sampela haus bruder i gat nem na ol i bilong bipo yet. Na Kalavrita i gat nem tu, long wanem, em wanpela naispela taun tru i stap long ples daun namel long ol maunten, na gutpela bikbus i banisim taun, na planti liklik wara i sut i go antap, na win i gutpela na klinpela.

Long 1850 samting 6,000 manmeri i bin sindaun long dispela taun. Tasol ol bikpela maunten na ol ples nogut i save banisim taun, olsem na no gat rot bilong ol man bilong nambis na ol liklik ples i ken kam long Kalavrita. Na no gat ol gutpela rot o telefon samting, na bilong go i kam ol man bilong ples i mas tromoi planti aua na hatwok long wokabaut long donki na wilka samting. Wanpela rot ol man i save bihainim bilong kamap long nambis, em rot i save go daun long wanpela traipela baret na maunten ston. Wara Vouraikos i stap long as bilong dispela baret na em i ran i go kamap long ples Diakopton.

Klostu long yia 1900 ol i pasim tok pinis long wokim wanpela gutpela rot bilong tren long dispela hap, na dispela rot bai helpim tru ol man long kamap long ol taun long nambis. Tasol taim ol man i mekim wok ensinia i skelim rot tren bai ran long en, ol i kisim save olsem dispela rot bai go antap na go daun long ol bikpela maunten. Olsem na bilong tren i ken ran long dispela kain rot i mas i gat narapela kain rot bilong tren​—em rot rak.

Rak em wanem kain rot? Em kain rot tren inap go antap na go daun long ol bikpela maunten. Na namel long sampela hap ain ol i skruim wantaim bilong wokim rot bilong tren, ol i putim tit ain, olsem na taim tren i ran long en wanpela kain gia bilong tren bai pas long en na dispela i save helpim tren​—taim tren i go antap long maunten em i no ken kostan, na taim tren i go daun long maunten em bai go daun isi isi.

Long 3-pela hap, rot bilong tren bilong Diakopton-Kalavrita i go antap tru, olsem long olgeta 7-pela 7-pela mita em i go antap wanpela mita. Olsem na long dispela 3-pela hap, draiva bilong tren i mas pasim tren na putim dispela narapela kain gia i go daun long tit ain bilong rot. Orait, nau tren i ken kirap gen na ran isi isi.

Hatwok Long Wokim

Em ples maunten na ples nogut, olsem na em bikpela wok tru long wokim dispela rot bilong tren. Ol i makim wanpela kampani bilong Itali long wokim na ol i kirap long 1891. Bilong helpim ol long wokim gut rot, ol i no wokim op bilong rot i bikpela, nogat; braitpela bilong en i olsem 75 sentimita tasol.

Faipela yia bihain long 1896, ol i bin rausim pinis planti ton ston. Na ol i bin boaim 9-pela rot i go insait long ol maunten, na wokim 6-pela bris. Long dispela taim ol i wokim ol raunpela bris long ston, tasol sampela yia bihain ol i rausim sampela na wokim ol long ain. Nau dispela nupela rot bilong tren i redi. Longpela bilong rot i olsem 23 kilomita na em i save go antap olsem 730 mita. Nau yu save liklik long stori bilong dispela rot bilong tren. Olsem wanem? Yu laik kalap long tren wantaim mipela na amamas long raun long en?

Gutpela Ples Tru

Yumi ken raun long tren Namba 1328, em tren i save raun long moningtaim, na wokabaut bilong en i save kirap long nambis bilong Diakopton. Taim tren i lusim ples, isi isi em i wokabaut i go. Maski yumi amamas long sindaun na raun long tren, ol asples i no tanim het liklik na lukluk​—ating planti taim ol i bin raun long tren. Tasol mipela i amamas tru long raun long en.

Bihain liklik mipela i lukim maus bilong wanpela traipela baret i op tumas. Man! Em gutpela samting tru bilong lukim! Long han kais wara i sut i go daun na baut baut na sapim gutpela rot namel long ol ston. Antap ol bikpela ston i hangamap i stap na rop bilong ol diwai pain i pas long ol. Man! Olgeta i slip olsem ol bai pundaun long mipela!

I gat ol gutpela gutpela diwai na purpur samting bilong bus na ol i pas pas. Isi isi tren i go insait long bus na i olsem han bilong sampela diwai i laik holim tren. Klostu 100 yia nau tren i raun long dispela hap, tasol bus long sampela hap bilong dispela baret i pas tumas na ol man i no inap wokabaut long en, ol inap lukim tasol taim ol i raun long tren.

Namba wan ples tren i kamap long en, em Niamata. Sampela fama i go daun na nau ol i wokabaut long lek bilong kamap long gaden bilong ol. Tren i kirap gen na wokabaut i go. Nau ol maunten i go antap moa. Tasol liklik taim bihain tren i sanap​—no gat hevi​—draiva bilong tren i mas putim dispela narapela kain gia i go daun na gia i ken pas long tit bilong rot na nau tren i no hatwok long go antap long ol maunten. Taim gia i go daun mipela pilim olsem ka mipela sindaun long en i ran gut, em i no seksek nabaut. Mipela lukim wanpela traipela maunten tren bai go antap long en, olsem na maski wanpela man klostu i bin raun long dispela hap planti taim na em i strongim bel bilong mipela, mipela i tingting planti.

Long banis bilong ol hap bilong baret i op moa, mipela i lukim ol bikpela hul long ol maunten ston. Ol asples i mekim wok long en taim ol i laik banisim sipsip bilong ol. Long han kais mipela lukim ol liklik hul long maunten na insait long ol i gat ol longpela samting olsem ais na i hangamap insait long ol hul. Long han kais na han sut, wara i save kalap i go daun insait long traipela baret, olsem na pairap i no liklik. Na long han kais mipela lukim hap maunten i bruk. Dispela i mekim na i gat ol liklik wara kalap i sut i go daun, tasol ol bai pinis taim bikpela wara i bungim ol. Mipela abrusim sampela man i taitim bun na wokabaut i go, ol i no laik kalap long tren.

Taim tren i wokabaut i go antap long wanpela bris i antap tumas, mipela lukim baret na wara long en i daun tru. Long wanpela hap braitpela bilong baret i liklik tru, olsem 2-pela mita tasol, na wanpela rot insait long maunten em tren i ran long en, em i stap arere long wanpela maunten i go antap tru.

Tren i brukim sampela bris na go insait long sampela rot moa i go insait long ol maunten, na bihain baret i op na mipela kamap long wanpela ples daun i op liklik. I no longtaim tumas na mipela kamap long namba 2 ples, em Kato Sakloru. Wanpela toksave long tren-stesin i tok, mipela i stap antap olsem 601 mita. I no gat planti haus long dispela ples na ol i stap hait insait long ol diwai arere arere long ples daun. Long dispela hap, win i narapela kain na ol asples i wanbel long tokim mipela olsem ol i no save lukim san planti taim, olsem na ples i tudak liklik. Mak bilong dispela ples daun i mekim, na ol diwai tu i pas pas, olsem na long olgeta de ol man inap lukim san inap sampela aua tasol. Tasol long taim bilong kol i no olsem, ol i lukim san inap liklik taim tasol.

Nau tren i lusim Kato Sakloru na wokabaut gen. Nau rot i baut baut na em i ran namel long ol diwai wilo na kumarere. No gat maunten long dispela hap na arere long rot, wara Voraikos i ran. Mipela i amamas tru long lukim planti naispela samting na 65 minit bihain maski smok bilong bus i karamapim ples, mipela inap lukim ol haus bilong Kalavrita. Long dispela taun 3,000 man tasol i sindaun, tasol long olgeta yia planti turis i save kam. Sampela i kam bilong raun long ais long taim bilong kol, na sampela i kam, long wanem, ples i no hat o kol tumas na i gutpela long skin bilong ol, na ol i amamas long kaikai ol gutpela kaikai bilong ples.

‘No Inap Kisim Bagarap’

Taim mipela lusim tren na go daun, mipela toktok wantaim Ioanní, em gutpela draiva bilong tren, olsem na mipela i kamap gut long dispela hap. Em i tok: ‘Mi save amamas long raun olsem. Tasol long taim bilong kol i narapela kain. No gat planti man i raun long tren, olsem na mi pilim olsem mi stap wanpis namel long dispela traipela baret. Na sampela taim maunten i bruk, o ais i pundaun, o em i kol nogut tru, na planti taim smok bilong bus i karamapim ples. Tasol maski i olsem, mi no laik lusim dispela rot bilong tren na raun long narapela, nogat.’

Taim mipela askim Ioanní i gat wanpela man i bin bagarap long dispela tren o nogat, em i strong long tok: ‘Yu no inap kisim bagarap long dispela tren olsem yu inap kisim long haus bilong yu yet!’ Insait long 100 yia dispela tren i bin wok, wanpela liklik hevi tasol i bin kamap na i no gat wanpela man i bin kisim bikpela bagarap.

Namel long 1940 na 1959, sampela man i bin mekim wok long dispela narapela kain tren bilong autim “gutpela tok” long Kingdom bilong Jehova long ol man i stap long dispela longwe taun Kalavrita, na ol liklik ples klostu long en na i hatwok long kamap long ol. (Mak 13:10) I gat gutpela samting i bin kamap long wok bilong ol​—nau i gat wanpela liklik kongrigesen bilong ol Witnes Bilong Jehova long Kalavrita, na ol i givim bel tru long wok bilong ol.

Olsem na sapos wanpela taim yu kam long Grik bilong raun na lukim ol ples, i gutpela tru sapos yu go lukim dispela tren i gat “tit” (Dhiakoptón-Kalávrita “Odontotós”). Sapos yu mekim olsem, yu no inap tru lusim tingting long dispela gutpela raun bilong yu!

[Blok long pes 21]

“Haus Kot”

Dispela em nem ol asples i kolim long wanpela bikpela hul long maunten ston klostu long rot bilong tren. Bilong wanem ol i kolim hul olsem? Long wanem, ol ais i hangamap insait i wankain olsem ol man i sindaun insait long wanpela haus kot. Long hap bilong baksait sampela bikpela ais i wankain olsem ol patpela “jas” i sindaun i stap bilong harim kot. Na arere arere i gat sampela ais moa i makim ol “witnes” na ol “loya,” em ol i sindaun na harim tok. Na long maus bilong hul yu inap lukim tupela longpela ais i hangamap long rup bilong hul na i makim “ol man i kot” na ol i dai pinis.

[Ol Mep long pes 22]

(Bilong save ol dispela rait i stap we long pes, lukim buk o magasin)

Em rot bilong tren i gat “tit”

GRIK

Diakopton Kato Sakloru Kalavrita

[Ol Piksa long pes 23]

Blok antap: Tren-stesin bilong Mega Spileon

Daunbilo: Tren i gat “tit” i wokabaut i go antap long liklik kil bilong maunten