Yu Ting Wanpela i Bin Wokim?

Maus Bilong Pisin Kingfisher

● Bulet tren bilong Japan i save ron spit inap olsem 300 kilomita long wanpela aua. I no gat narapela tren long olgeta hap bilong graun i save ron spit olsem. Wanpela as na dispela tren inap spit olsem, em taim ol i wokim dispela tren ol i bihainim pasin bilong wanpela liklik pisin​—⁠em kingfisher. Bilong wanem?

Tingim: Bilong kisim kaikai, dispela liklik pisin i save sut i go insait long wara, na wara i no save meknais tumas. Eiji Nakatsu, wanpela ensinia husat i save mekim ol tes ron bilong ol bulet tren, em i kirap nogut long dispela. Em i wok long tingting long olsem wanem dispela pisin inap flai long win we i gat liklik presa na sut i go stret insait long wara we i gat bikpela presa. Bekim bilong dispela askim bai stretim wanpela kain hevi bilong dispela bulet tren. Nakatsu i tok: “Taim wanpela tren i ron spit i go insait long wanpela tanel, dispela i kirapim presa long win na win i go bikpela, kain olsem taidel wev. Taim dispela win i ron spit olsem saun na kamap long hapsait bilong tanel, em i save kamapim bikpela nois na guria. Ol man i sindaun longwe long dispela tanel inap 400 mita ol i bin komplein long dispela.”

Orait, ol i mekim disisen long wokim fran bilong bulet tren wankain olsem maus bilong pisin kingfisher. Wanem samting i kamap long dispela? Nau bulet tren inap spit olsem 10 pesen moa na pawa em i yusim i go daun inap 15 pesen. Na tu, presa bilong win em tren i save kamapim i go daun inap 30 pesen. Olsem na nau i no gat bikpela nois moa taim tren i ron insait long tanel.

Yu ting wanem? Maus bilong pisin kingfisher i kamap nating o wanpela man i bin wokim?

[Ol Piksa Kredit Lain long pes 13]

Kingfisher diving: Woodfall/Photoshot; bullet train: AP Photo/Kyodo