Nem Bilong God i Kamap Ples Klia!

● Taim yu wokabaut long naispela ailan Orleans, klostu long Quebec City, Kanada, ol samting yu lukim i kamapim klia olsem ol man bilong bipo i bin sindaun long dispela ailan, ol i man bilong lotu. Yu inap lukim yet ol olpela liklik haus lotu bilong bipo arere long rot i raunim ailan, na olgeta wan wan liklik ples i gat haus lotu bilong ol yet.

Long taun Saint-Pierre i gat wanpela olpela haus lotu tru long Quebec em ol i bin wokim long yia 1717. Nau em i wanpela haus we ol i putim ol piksa na ol man inap kam lukim, tasol i gat wanpela samting long en em i narapela kain tru. Long banis antap long alta i gat rait tetragramaton​—⁠em 4-pela leta Hibru i makim nem bilong God bilong Baibel, em Jehova.

Long nau, ol man i no save harim nem bilong God insait long haus lotu Katolik o lukim long ol buk samting, wan wan taim tasol. Long wanpela pepa em Vatiken i bin kamapim long 2008, pop i tok ol Katolik i “no ken yusim o kolim” nem bilong God taim ol i mekim lotu, mekim ol singsing lotu, o beten. Tasol Baibel i kamapim klia olsem God Jehova i laik bai ol manmeri “i ken tokaut long biknem bilong [em] long olgeta hap bilong graun.”​—⁠Kisim Bek 9:⁠16.

Ol Witnes Bilong Jehova i pilim olsem sapos yumi laik amamasim God, i gat sampela samting moa yumi mas mekim winim pasin bilong raitim nem bilong em insait long wanpela haus. Long olgeta yia, long olgeta hap bilong graun, ol i tromoi olsem 1.5 bilion aua long skulim ol man long nem bilong God na laik bilong em. Na tu, ol i bin putim bek nem bilong God long ol ples stret bilong en long Baibel. Baibel em ol i wokim​—The New World Translation of the Holy Scriptures​—i bihainim stret tok ples bilong pastaim em ol i bin raitim Baibel long en na putim nem Jehova long olgeta ples stret bilong en long Baibel, inap olsem 7,000 taim. Kirap long taim ol i prinim Baibel New World Translation i kam inap long nau, ol bin prinim olsem 165,000,000 kopi bilong Baibel olgeta o hap bilong en, long 83 tokples. Sampela husat i no yusim nem bilong God ol i save askim, Bilong wanem mi mas yusim nem bilong God? Tasol mobeta ol i askim olsem, I gat wanem as na mi no yusim dispela nem?

[Piksa long pes 14]

Baibel New World Translation, we nem Jehova i stap olsem 7,000 taim, ol i bin prinim​—⁠Baibel olgeta o hap bilong en⁠—​long 83 tokples